អភិបាលខេត្តព្រះសីហនុ និងប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ច្រានចោលព័ត៌មានដែលថា មានការប្ដូរឈ្មោះឆ្នេរអូរឈើទាល ទៅជាឆ្នេរសម្ដេចតេជោសែន ក្នុងគម្រោងអភិវឌ្ឍន៍ឆ្នេរសមុទ្រខេត្តព្រះសីហនុ របស់រដ្ឋាភិបាល។
ការបំភ្លឺជាលាយលក្ខណ៍អក្សររបស់មន្ត្រីរដ្ឋាភិបាលពេលនេះ ធ្វើឡើងបន្ទាប់ពីមានមតិរិះគន់ជាបន្តបន្ទាប់ពីប្រជាពលរដ្ឋ ពិសេសក្រុមយុវជនតាមរយៈបណ្ដាញសង្គមហ្វេសប៊ុក (Facebook) នៅក្នុងប៉ុន្មានថ្ងៃកន្លងមកនេះ។
រដ្ឋបាលខេត្តព្រះសីហនុ បានចេញសេចក្តីប្រកាសព័ត៌មានមួយចុះថ្ងៃពុធ ទី២២ ខែមិថុនា ជូនប្រជាពលរដ្ឋរស់នៅខេត្តព្រះសីហនុ សាធារណជន ពិសេសភ្ញៀវទេសចរជាតិ និងអន្តរជាតិ ឲ្យជ្រាបថា កន្លងមកមានលេចឮព័ត៌មាន និងមានការបង្ហោះព័ត៌មាននៅក្នុងបណ្ដាញសង្គមហ្វេសប៊ុកថា មានការកែប្រែឈ្មោះឆ្នេរអូរឈើទាល ទៅជាឆ្នេរសម្ដេចតេជោសែនជំនួសវិញ។ ក្នុងន័យនេះ រដ្ឋបាលខេត្តព្រះសីហនុ បានអះអាងថា ទាំងរាជរដ្ឋាភិបាលកម្ពុជា គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ទាំងថ្នាក់ជាតិ និងខេត្ត ពុំមានផែនការប្ដូរឈ្មោះឆ្នេរដែលមានស្រាប់ក្នុងខេត្តនេះទេ។
ប្រកាសរបស់រដ្ឋបាលខេត្តព្រះសីហនុ បានបញ្ជាក់ប្រាប់ប្រជាពលរដ្ឋ សាធារណជន ឬភ្ញៀវជាតិ និងអន្តរជាតិ កុំឲ្យយល់ច្រឡំទៅលើព័ត៌មានថា មានការកែប្រែឈ្មោះឆ្នេរអូរឈើទាលឲ្យសោះ ព្រោះជាព័ត៌មានមិនពិតទេ។
កាលពីថ្ងៃទី១៨ ខែមិថុនា អាជ្ញាធរខេត្តព្រះសីហនុ និងវិស័យឯកជន បានធ្វើពិធីក្រុងពាលីបើកសម្ពោធគម្រោងសាងសង់ខ្លោងទ្វារច្រកចូលឆ្នេរសមុទ្រនៅតាមឆ្នេរមួយចំនួននាខេត្តទេសចរណ៍មួយនេះ។ ហើយឆ្នេរអូរឈើទាល ត្រូវសាធារណជន ពិសេសអ្នកប្រើប្រាស់បណ្ដាញសង្គមហ្វេសប៊ុកសង្ស័យថា បានប្ដូរឈ្មោះទៅជាឆ្នេរសម្ដេចតេជោសែនជំនួសវិញ។ ត្រង់ចំណុចនេះ នាំឲ្យមានការរិះគន់មន្ត្រីគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងអាជ្ញាធរខេត្តព្រះសីហនុ ជាបន្តបន្ទាប់ពីសំណាក់អ្នកប្រើប្រាស់បណ្ដាញសង្គម។
ទាក់ទិនបញ្ហានេះ អភិបាលខេត្តព្រះសីហនុ លោក យន្ត មីន មានប្រសាសន៍ថា រដ្ឋាភិបាលមិនមានគម្រោងប្ដូរឈ្មោះឆ្នេរអូរឈើទាល ដាក់ជំនួសឈ្មោះប្រមុខដឹកនាំនោះទេ ប៉ុន្តែរាល់ការភ័ន្តច្រឡំរបស់សាធារណជន និងមានការរិះគន់តាមបណ្ដាញសង្គមកន្លងមក គឺដោយសារតែអ្នកជំនាញគូរប្លង់នៃខ្លោងទ្វារចូលឆ្នេរសមុទ្រដែលថ្នាក់ដឹកនាំគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា បានដាក់ឲ្យមានការប្រកួតប្រជែងស្នាដៃលើគម្រោងនេះ ត្រូវស្ថាបត្យករទាំងនោះគូរ ឬចេញប្លង់ ហើយដាក់ឈ្មោះទៅតាមការពេញចិត្ត ឬយល់ឃើញផ្ទាល់ខ្លួនពួកគេតែប៉ុណ្ណោះ ដែលករណីនេះ ប្រមុខដឹកនាំមិនបានដឹងទេ៖ « តំបន់ខ្លោងទ្វារនៅឆ្នេរអូរឈើទាល ហ្នឹង អ្នកគូរប្លង់ ឬស្ថាបត្យករដែលគូរគម្រោងប្លង់យកទៅប្រកួតប្រជែងនៅគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា គាត់បានគូរ និងដាក់ឈ្មោះតាមការពេញចិត្ត ឬយល់ឃើញរបស់លោក ដោយដាក់ថា ឆ្នេរសម្ដេចតេជោសែន ជំនួសឲ្យឆ្នេរអូរឈើទាល។ ប៉ុន្តែករណីនេះមិនមែនរដ្ឋាភិបាលជាអ្នកសម្រេចទេ។ សូមឲ្យបងប្អូនកុំយល់ច្រឡំ ឆ្នេរអូរឈើទាល គឺនៅដដែលទេ មិនមានដូរ ឬកែប្រែឈ្មោះដើម ហើយដាក់ជំនួសឈ្មោះថ្នាក់ដឹកនាំនោះទេ »។
បញ្ហានេះដែរ មន្ត្រីសង្គមស៊ីវិល និងប្រជាពលរដ្ឋមួយចំនួនរស់នៅខេត្តព្រះសីហនុ បង្ហាញទស្សនៈថា ទោះក្នុងកាលៈទេសៈណាក៏ដោយ ពួកគេមិនចង់ឲ្យរដ្ឋាភិបាលកែប្រែ ឬប្ដូរឈ្មោះឆ្នេរដែលមានឈ្មោះស្រាប់ទៅឈ្មោះផ្សេង នាខេត្តទេសចរណ៍មួយនេះទេ។
ក្រុមប្រជាពលរដ្ឋ និងភ្ញៀវទេសចរជាតិ បានលើកឡើងប្រហាក់ប្រហែលគ្នាថា ប្រសិនជាថ្នាក់ដឹកនាំគណៈកម្មាធិការអភិវឌ្ឍន៍ឆ្នេរសមុទ្រ ពិសេសរដ្ឋាភិបាល ប្ដូរឈ្មោះឆ្នេរមួយចំនួននៅខេត្តព្រះសីហនុ អាចនាំឲ្យបាត់បង់អត្តសញ្ញាណដើម ឬបាត់បង់កេរដំណែលរបស់ថ្នាក់ដឹកនាំជំនាន់មុនបន្សល់ទុក។ ពួកគេមានចម្ងល់ថា មន្ត្រីនៅតាមក្រសួង ឬស្ថាប័នរដ្ឋមួយចំនួន មុននឹងចង់ប្ដូរឈ្មោះតំបន់ ឬទីតាំងណាមួយ គួរមានការពិគ្រោះយោបល់ ឬឆ្លងកាត់ការពិភាក្សាគ្នាជាមួយស្ថាប័នជំនាញពាក់ព័ន្ធឲ្យបានល្អិតល្អន់ជាមុនសិន ព្រោះនាំឲ្យបាត់បង់កិត្តិយសប្រមុខដឹកនាំទៅវិញទេ៖ « យើងយល់ថា ឆ្នេរអូរឈើទាល បើសិនជារដ្ឋាភិបាលដូរទៅជាឆ្នេរតេជោវិញ នឹងបាត់បង់អត្តសញ្ញាណឆ្នេរអូរឈើទាលទៀតនាថ្ងៃអនាគត។ ហើយពលរដ្ឋនឹងមានការភ័ន្តច្រឡំ។ ខ្ញុំចង់ឲ្យរក្សាឈ្មោះឆ្នេរចាស់ ឲ្យនៅដដែល ហើយបើដូរឈ្មោះថ្មីខ្ញុំពិបាកហៅ ហើយពលរដ្ឋនៅទូទាំងប្រទេសគេធ្លាប់ស្គាល់តែឆ្នេរអូរឈើទាលទេកន្លងមក។ សូមឲ្យរដ្ឋាភិបាលរក្សាឈ្មោះឆ្នេរអូរឈើទាលឲ្យនៅដូចដើមវិញ »។
ស្រដៀងគ្នាដែរ អ្នកស្រី ជៀប សុធារី មន្ត្រីសម្របសម្រួលសមាគមអាដហុក (ADHOC) ខេត្តព្រះសីហនុ ស្ថិតក្នុងចំណោមសង្គមស៊ីវិលច្រើនស្ថាប័នទៀត ផ្តល់ទស្សនៈថា រដ្ឋាភិបាលគួររក្សាឈ្មោះដើមដែលមានស្រាប់របស់ឆ្នេរ ឬទីតាំងនីមួយៗឲ្យគង់វង្ស ប្រសើរជាងលុបបំបាត់។ អ្នកស្រីបន្តថា បើសិនជារដ្ឋាភិបាល ឬគណៈកម្មាធិការអភិវឌ្ឍន៍ឆ្នេរសមុទ្រកម្ពុជា ស្ថាបនាឆ្នេរថ្មី ហើយមិនទាន់មានឈ្មោះ គឺអាចដាក់ឈ្មោះថ្មីដោយបង្ហាញពីអត្តសញ្ញាណជាខ្មែរ។
អ្នកស្រី សុធារី បង្ហាញការព្រួយបារម្ភថា ប្រសិនបើទៅថ្ងៃអនាគត ប្រទេសកម្ពុជា មានការប្រែប្រួល ឬឈានដល់មានការផ្លាស់ប្ដូរថ្នាក់ដឹកនាំប្រទេស ហើយសមិទ្ធផលផ្សេងៗរបស់ថ្នាក់ដឹកនាំជំនាន់មុន ត្រូវគេប្ដូរឈ្មោះចោល គឺវាអយុត្តិធម៌សម្រាប់ថ្នាក់ដឹកនាំជំនាន់មុន ដែលខិតខំកសាងស្នាដៃជូនប្រជាពលរដ្ឋ និងសង្គមជាតិទាំងមូល។ ងាកមកព័ត៌មានប្ដូរឈ្មោះឆ្នេរអូរឈើទាលវិញ អ្នកស្រី សុធារី សំណូមពរថា រដ្ឋាភិបាលមិនគួរប្ដូរឈ្មោះទីតាំងផ្សេងៗ ឬលុបបំបាត់អត្តសញ្ញាណរបស់ថ្នាក់ដឹកនាំជំនាន់មុនបន្សល់ទុកចោលនោះទេ ប៉ុន្តែផ្ទុយទៅវិញ គួរតែរួមគ្នាអភិរក្ស និងថែរក្សាកេរដំណែលគ្រប់ជំនាន់បន្សល់ទុកឲ្យបានគង់វង្ស ទុកសម្រាប់យុវជនជំនាន់ក្រោយបានស្គាល់៖ « ខេត្តព្រះសីហនុ ពីដើមឡើយត្រូវបានរៀបចំឡើងដោយអតីតព្រះមហាក្សត្រ ព្រះករុណា សម្ដេចព្រះនរោត្តម សីហនុ។ ហើយទាក់ទងឆ្នេរអូរឈើទាលវិញ ប្រជាពលរដ្ឋភាគច្រើនបានស្គាល់ឆ្នេរនេះច្បាស់ថាជាឆ្នេរអូរឈើទាល ហើយតំបន់នេះមានអនុស្សាវរីយ៍ជាច្រើនដែលបន្សល់ទុកពីជំនាន់សម្ដេចតាដឹកនាំប្រទេស មានដូចជាថ្នល់ក្រាលកៅស៊ូនៅប្របឆ្នេរអូរឈើទាលនេះ ប៉ុន្តែបច្ចុប្បន្នត្រូវគេឃុបឃិតជីកកាយបំផ្លាញភស្តុតាងចោល។ ដូច្នេះការរក្សាឈ្មោះដែលមាននៅក្នុងប្រវត្តិសាស្ត្រតាំងពីដើមរៀងមក មិនគួរឲ្យមានការផ្លាស់ប្ដូរ ឬបំផ្លាញវត្ថុតាងប្រវត្តិសាស្ត្រនេះចោលទេ »។
កាលពីថ្ងៃទី១៨ ខែមិថុនា នៅលើទំព័រហ្វេសប៊ុករបស់លោក ជា សុផារ៉ា បានបង្ហោះរូបភាពនៃគម្រោងប្លង់ខ្លោងទ្វារច្រកចូលឆ្នេរសមុទ្រមួយចំនួន មានឆ្នេរអូរឈើទាល ជាដើម ដោយបញ្ជាក់ថា ឆ្នេរសមុទ្រខេត្តព្រះសីហនុ បានចាប់ផ្ដើមសាងសង់នៅថ្ងៃទី១៨ ខែមិថុនា ឆ្នាំ២០១៦ ហើយមានការចូលរួមគាំទ្រពីប្រជាពលរដ្ឋ និងសប្បុរសជនច្រើនកុះករ។
រូបភាពមួយក្នុងចំណោមរូបភាពជាច្រើនសន្លឹក ឬប្លង់ បានសរសេរដាក់ឈ្មោះខ្លោងទ្វារច្រកចូលសមុទ្រនៃឆ្នេរអូរឈើទាលនាពេលបច្ចុប្បន្ន ត្រូវដាក់ឈ្មោះជា ឆ្នេរសមុទ្រសម្ដេចតេជោសែន វិញ។
ទោះបីជាបែបនេះក្តី លោក យន្ត មីន អភិបាលខេត្តព្រះសីហនុ នៅថ្ងៃទី២២ ខែមិថុនា បានបញ្ជាក់ថា មិនមានការប្ដូរឈ្មោះឆ្នេរអូរឈើទាល ដោយដាក់ជំនួសឈ្មោះប្រមុខដឹកនាំនោះទេ ប៉ុន្តែវាគ្រាន់តែជាគម្រោងគូរប្លង់របស់ស្ថាបត្យករដែលគូរប្លង់ខ្លោងទ្វារចូលសមុទ្រ ដើម្បីប្រកួតប្រជែងនៅគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា តែប៉ុណ្ណោះ សូមសាធារណជនកុំយល់ច្រឡំ៖ « វិស្វករគេគូរស្រមើស្រមៃ និងចង់ដាក់ឈ្មោះខ្លោងទ្វារច្រកចូលទៅសមុទ្រ ដើម្បីប្រកួតប្រជែងដោយគេនឹកចង់ដាក់ឈ្មោះឆ្នេរសម្ដេចតេជោសែន ក៏គេដាក់អ៊ីចឹងទៅ និងមានការបន្ទរពីអ្នកពេញចិត្តក៏បានដាក់ថាអ៊ីចឹងទៅ។ ប៉ុន្តែសម្រាប់អ្នកគេមិនពេញចិត្ត ក៏មានការរិះគន់ជាបន្តបន្ទាប់។ តែតាមការពិត រឿងនេះសម្ដេចតេជោលោកមិនបានដឹងទេ បើលោកដឹង នឹងមានការខឹងសម្បាជាក់ជាមិនខានទេ »។
ទាក់ទិនបញ្ហានេះ អ្នកប្រើប្រាស់បណ្ដាញសង្គមហ្វេសប៊ុកមួយចំនួន បានបង្ហាញការយល់ឃើញរបស់ពួកគេតែរៀងៗខ្លួន ដោយមានអ្នកខ្លះបានគាំទ្រឲ្យមានការប្ដូរឈ្មោះឆ្នេរអូរឈើទាល ទៅជាឆ្នេរសម្ដេចតេជោសែន និងមានសារខ្លះ បង្ហាញការមិនពេញចិត្ត និងបានបង្ហោះសាររិះគន់រដ្ឋាភិបាលតាមបណ្ដាញសង្គម ដែលពួកគេសង្ស័យថាមានគម្រោងប្ដូរឈ្មោះឆ្នេរអូរឈើទាលនាខេត្តព្រះសីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។