កម្មកររោងចក្រ នូវខប (Now Corp) ជាង ១ពាន់នាក់តវ៉ាបិទផ្លូវជាតិលេខ ៤១ នៅព្រឹកថ្ងៃទី៤ ធ្នូ នេះ ដើម្បីទាមទារឲ្យអាជ្ញាធរស្វែងរកដំណោះស្រាយជាមួយថៅកែរោងចក្រ ឲ្យបញ្ឈប់អ្នកគ្រប់គ្រងក្នុងរោងចក្រនោះ ស្នើសុំដំឡើងលុយថ្លៃបាយថ្ងៃត្រង់ក្នុងម្នាក់ ៤ពាន់រៀល និងសាងសង់កន្លែងហូបបាយក្នុងរោងចក្រ។
អ្នកគ្រប់គ្រងបុគ្គលិក ៣នាក់នោះ មានលោក ម៉េត វាសនា អ្នកគ្រប់គ្រងផ្នែកច្បាប់ លោក ម៉េត ប្រធានគ្រប់គ្រងទូទៅ (Production Manager) និងលោក រិទ្ធ បុគ្គលិករដ្ឋបាល។
លោក ហេង សារឿន តំណាងសហព័ន្ធសហជីពមិត្តភាពកម្មករ បានឲ្យដឹងតាមទូរស័ព្ទថា នៅព្រឹកម៉ោងជាង ៧ព្រឹក កម្មករបានបិទផ្លូវមុខរោងចក្រឆ្ពោះទៅស្ពានគុណគ្រូ ស្ថិតនៅភូមិជើងអក ឃុំលំហាច ស្រុកអង្គស្នួល ខេត្តកណ្ដាល។ បន្ទាប់មកលោកអភិបាលស្រុកអង្គស្នួល ក៏បានចុះអន្តរាគមន៍សុំបើកផ្លូវ ដោយសន្យាថា នឹងជួយដោះស្រាយ តែត្រូវរង់ចាំមន្ត្រីមន្ទីរការងារខេត្តសិន។
នៅម៉ោងជិត ១២ថ្ងៃត្រង់ កម្មករបានតវ៉ាបិទផ្លូវម្ដងទៀត បន្ទាប់ពីគ្មានការដោះស្រាយពីអាជ្ញាធរពាក់ព័ន្ធ ដូចការសន្យា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។