កម្មករប្រមាណ ១ពាន់នាក់ នៃរោងចក្រ អូសេអង់ (Oceans) ព្រមព្រៀងផ្អាកការទាមទាររបស់ខ្លួនបណ្ដោះអាសន្ន ដោយពួកគេត្រូវឋិតនៅក្នុងភាពស្ងៀមស្ងាត់មួយរយៈ ដើម្បីរង់ចាំដំណោះស្រាយរបស់ក្រុមប្រឹក្សាអាជ្ញាកណ្ដាល។
ការព្រមព្រៀងនេះ កើតឡើងនៅក្រោយពេលដែលការចរចាជាថ្មីទៀតរវាងតំណាងកម្មករ និងភាគីរោងចក្រ នៅព្រឹកថ្ងៃទី១៣ ខែមិថុនា នៅតែមិនអាចរកដំណោះស្រាយអោយសះជា ហើយភាគីទាំង២សម្រេចបញ្ជូនសំណុំរឿងវិវាទនេះទៅក្រុមប្រឹក្សាអាជ្ញាកណ្ដាល។
ក្នុងរយៈពេលចំនួន១អាទិត្យ ឬ ១០ថ្ងៃ គិតចាប់ពីថ្ងៃបញ្ជូនសំណុំរឿងទៅកាន់ក្រុមប្រឹក្សាអាជ្ញាកណ្ដាល ក្រុមកម្មកររោងចក្រ អូសេអង់ បានយល់ព្រមនូវលក្ខខណ្ឌដែលអោយពួកគេផ្អាកការតវ៉ាតាមគ្រប់រូបភាព ជាពិសេស គឺការធ្វើបាតុកម្មហែក្បួនតាមផ្លូវសាធារណៈ។
ការសម្រេចបញ្ជូនសំណុំរឿងដោះស្រាយវិវាទការងារ ទៅដល់ក្រុមប្រឹក្សាអាជ្ញាកណ្ដាលនេះ បានធ្វើឡើងក្រោយពីការចរចាច្រើនសប្ដាហ៍កន្លងមកនេះ រវាងសម្ព័ន្ធសហជីពចលនាកម្មករ តំណាងកម្មករ តំណាងរោងចក្រ អូសេអង់ ក្រោមការសម្របសម្រួលពីក្រសួងការងារ បណ្តុះបណ្តាលវិជ្ជាជីវៈ និងអាជ្ញាធរ ខណ្ឌពោធិ៍សែនជ័យ ភាគីរោងចក្រនៅតែផ្តល់ប្រាក់ខែជូនកម្មករ ១៥ដុល្លារ រីឯកម្មករទាមទារពី ៥០% ទៅ ១០០% ដោយសារការព្យួរការងារកម្មករជាង ១.៦០០នាក់ របស់រោងចក្រ អូសេអង់ ធ្វើឡើងតក់ក្រហល់។
អគ្គលេខាធិការរងគណៈកម្មការដោះស្រាយកូដកម្មបាតុកម្ម នៃក្រសួងការងារ លោក វង្ស សុវណ្ណ ថ្លែងថា ក្រសួងអស់លទ្ធភាពក្នុងការជួយសម្របសម្រួលទៅតាមសំណើរបស់កម្មករ និងស្នើសុំឲ្យថៅកែយល់ព្រមតាមការទាមទារ។ លោកបន្តថា ភាគីទាំង២សុំបញ្ជូនសំណុំរឿងវិវាទការងារ ទៅដោះស្រាយតាមផ្លូវច្បាប់ដែលអាចស្វែងរកដំណោះស្រាយបានលឿន៖ «ការទាមទាររបស់បងប្អូនយើង គាត់នៅតែទាមទារឲ្យប្រាក់ឈ្នួល ១០០% ទៅលើការព្យួរ ប៉ុន្តែខាងនិយោជកគាត់មិនទាន់ឯកភាពរឿងហ្នឹង ថាសុំចាំទៅអាជ្ញាកណ្ដាលសិន។ អ៊ីចឹងលទ្ធផលខាងអាជ្ញាកណ្ដាលយ៉ាងណានោះ គឺបងប្អូនយើងគាត់ឯកភាពថា នឹងទទួលយកតាមក្រុមប្រឹក្សាអាជ្ញាកណ្ដាលហើយ។ ហើយខ្ញុំក៏សង្ឃឹមថា ក្រុមប្រឹក្សាអាជ្ញាកណ្ដាលគាត់មានការវិនិច្ឆ័យល្អជូនដល់ភាគីទាំងសងខាង»។
កាលពីការដោះស្រាយសប្ដាហ៍មុន ក្រុមប្រឹក្សាអាជ្ញាកណ្ដាលបានបិទសំណុំរឿងវិវាទនៅរោងចក្រ អូសេអង់ នេះម្តងរួមមកហើយ ដោយសារតែភាគីរោងចក្រមិនមានវត្តមានក្នុងអង្គសវនាការ។
រដ្ឋបាលរោងចក្រ អូសេអង់ លោក ជឹម សុផាត ឲ្យដឹងថា តំណាងកម្មករ និងខាងរោងចក្រ បានឯកភាពគ្នានៅចំពោះមុខការសម្របសម្រួលរបស់មន្ត្រីក្រសួងការងារ និងអាជ្ញាធរខណ្ឌពោធិ៍សែនជ័យ សុំឲ្យក្រុមប្រឹក្សាអាជ្ញាកណ្ដាលសើរើដោះស្រាយបណ្ដឹងវិវាទការងាររោងចក្រ អូសេអង់ ឡើងវិញ។ លោកបន្តថា ការចរចានៅថ្ងៃសុក្រ ទី១៣ ខែមិថុនា មិនបាននិយាយពីប្រាក់ខែរង់ចាំការងារ ៥០% ឬ ១០០% នោះទេ គ្រាន់តែបានឯកភាពគ្នាឲ្យដោះស្រាយនៅក្រុមប្រឹក្សាអាជ្ញាកណ្ដាល៖ «បាននិយាយគ្នាហើយ គឺគ្រាន់តែមានការព្រមព្រៀងគ្នាទៅក្រុមប្រឹក្សាអាជ្ញាកណ្ដាល ទៅដោះស្រាយ។ រឿងទាក់ទងនឹងគាត់ស្នើលុយសុំអីទាក់ទងដូចពីមុន យើងអត់បាននិយាយទាំងអស់»។
តំណាងកម្មករ និងជាសហជីពមូលដ្ឋាន លោក ឆេង ស៊ីណន ថ្លែងប្រាប់កម្មករថា ក្នុងរយៈពេលរង់ចាំការដោះស្រាយរបស់ក្រុមប្រឹក្សាអាជ្ញាកណ្ដាល សហជីពសុំឲ្យកម្មករផ្អាកការតវ៉ាប្រហែលជា១អាទិត្យ ទៅ ១០ថ្ងៃ។ ប៉ុន្តែបើសិនការដោះស្រាយរបស់ក្រុមប្រឹក្សាអាជ្ញាកណ្ដាលមិនឆាប់រហ័ស និងមិនយុត្តិធម៌ ក្រុមកម្មករងើបតវ៉ាទ្រង់ទ្រាយធំ៖ «រឿងនេះពួកខ្ញុំសង្ឃឹមថា ក្រុមប្រឹក្សាអាជ្ញាកណ្ដាលនឹងធ្វើការដោះស្រាយទៅតាមអ្វីដែលជាស្ថានភាពជាក់ស្តែង ដែលបងប្អូនគាត់កំពុងតែមានទុក្ខកង្វល់ពីអ្វីដែលក្រុមហ៊ុនគាត់ព្យួរការងារ ដែលមិនស្របតាមនីតិវិធីច្បាប់នោះ»។
នៅខាងក្នុងរោងចក្រ អូសេអង់ មានក្រុមកម្មការិនីច្រើនរយនាក់បានសម្រាកក្នុងរោងចក្រ។ ពួកគេអះអាងថា ជួយការពារម៉ាស៊ីនដេរដែលជាប្រាក់សំណងរបស់គេ ប្រសិនបើខាងរោងចក្រចាញ់ក្តី។
រដ្ឋបាលរោងចក្រ អូសេអង់ លោក ជឹម សុផាត ឲ្យដឹងថា រោងចក្រ អូសេអង់ បានដំណើរការដេរខោអាវម៉ាកល្បីៗប្រមាណជា ១៥ឆ្នាំមកហើយ មានកម្មករ ១.៦០០នាក់ បានធ្វើការឲ្យរោងចក្រតាំងពីទីតាំងចាស់នៅជិតមន្ទីរពេទ្យរុស្ស៊ី។
ក្រុមកម្មករឲ្យដឹងថា តម្លៃឈ្នួលពលកម្មរបស់ពួកគេ ១០៤ដុល្លារក្នុង១ខែ ថោកជាងរោងចក្រដែលនៅសងខាងរោងចក្រ អូសេអង់ នេះ។ ទោះបីប្រាក់ខែតិច ពួកគេបានធ្វើការរហូតដល់ថ្ងៃទី២៤ ខែឧសភា ឆ្នាំ២០១៤ ទើបថៅកែព្យួរការងារ ដោយមិនបានប្រកាសប្រាប់ជាមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។