តំណាងសហជីពនៅកម្ពុជា ព្រួយបារម្ភចំពោះករណីដួលសន្លប់របស់កម្មករ ដែលកើតមានជាបន្តបន្ទាប់។ ទន្ទឹមគ្នានេះដែរ ពួកគេបានទទូចឲ្យរដ្ឋាភិបាលដោះស្រាយករណីនេះឲ្យមានប្រសិទ្ធភាព។ ការស្នើនេះ ស្របពេលមានកម្មករជាច្រើនរយនាក់តាមបណ្ដារោងចក្រជាច្រើនបានដួលសន្លប់នៅប៉ុន្មានថ្ងៃជាប់គ្នាៗមកនេះ។
ក្រុមសហជីពលើកឡើងថា ករណីដួលសន្លប់របស់កម្មករប៉ុន្មានថ្ងៃជាប់គ្នានេះ ភាគច្រើនបណ្តាលមកពីការបរិភោគអាហារមិនគ្រប់គ្រាន់ ធ្វើការលើសម៉ោង បរិយាកាសក្នុងរោងចក្រមិនល្អ ធំក្លិនថ្នាំពីសម្ភារៈ និងពុលដោយសារសារធាតុគីមី។
ទាក់ទងនឹងករណីកម្មករដួលសន្លប់នេះដែរ ប្រធានសហភាពការងារកម្ពុជា និងជាប្រធានសម្ព័ន្ធសហជីពស៊ីខៅឌូ (C-CAWDU) លោក អាត់ ធន់ បានឲ្យដឹងថា បើគិតចាប់ពីថ្ងៃ២៩ ខែមិថុនា រហូតមកដល់ពេលនេះមានកម្មករជិត ១០០នាក់ តាមរោងចក្រនៅភ្នំពេញ ទាំងតាមបណ្ដាខេត្តមួយចំនួនទៀត ក្នុងនោះដូចជាខេត្តកណ្ដាល កំពង់ស្ពឺ និងតាកែវ បានដួលសន្លប់។
លោកថា ចំនួននេះគឺជាចំនួនកម្មករដួលសន្លប់ដែលមានស្ថានភាពធ្ងន់ធ្ងរប៉ុណ្ណោះ ដោយមិនរាប់បញ្ចូលចំនួនកម្មករជាច្រើនរយនាក់ផ្សេងទៀតដែលបានដួលសន្លប់មានស្ថានភាពស្រាលនោះទេ។
លោក អាត់ ធន់ ថា បញ្ហានេះបណ្ដាលមកពីមូលហេតុពីរធំៗ គឺបញ្ហាសុខភាពកម្មករ និងបញ្ហាប្រាក់ឈ្នួលទាប៖ «ដោយសារកម្មករខ្លួនឯងផ្ទាល់មានសុខភាពខ្សោយ គួបផ្សំនឹងបរិស្ថានកន្លែងការងារមិនល្អផង បានធ្វើឲ្យកម្មករដួលសន្លប់។ ម្យ៉ាង បញ្ហាប្រាក់ខែទាប ក៏ជាមូលហេតុចម្បងផងដែរ»។
ប្រធានសហជីពរូបនេះ ជំរុញឲ្យរដ្ឋាភិបាល និងបណ្ដារោងចក្រកាត់ដេរទាំងអស់ គិតគូរដោះស្រាយបញ្ហាដួលសន្លប់របស់កម្មករនៅកម្ពុជា តាមរយៈការដោះស្រាយបញ្ហាប្រាក់ឈ្នួលកម្មករ ដើម្បីឲ្យកម្មករមានលទ្ធភាពថែរក្សាសុខភាព និងបរិភោគគ្រប់គ្រាន់ ត្រូវមានក្រុមចុះត្រួតពិនិត្យតាមបណ្ដារោងចក្រ ហើយរោងចក្រទាំងអស់ត្រូវតែធានាថា មានលក្ខខណ្ឌស្តង់ដារ និងបរិយាកាសល្អ៖ «បរិយាកាសខាងក្នុងរោងចក្របានធ្វើឲ្យការដកដង្ហើមរបស់កម្មករខ្វះអុកស៊ីហ្សែន។ ជាងនេះទៅទៀត ខ្ញុំសូមស្នើទៅរដ្ឋាភិបាល និងម្ចាស់រោងចក្រទាំងអស់ យកចិត្តទុកចំពោះកម្មកររបស់ខ្លួន»។
ជាមួយគ្នានេះដែរ ប្រធានសហជីពសហព័ន្ធកម្មករខ្មែរ លោក ហេ លីម ដែលបានជួយសង្គ្រោះកម្មករដួលសន្លប់នៅរោងចក្រ ភី.ភី.អូ (PPO) ប្រមាណជាង ៤០នាក់ កាលពីព្រឹកថ្ងៃទី២ ខែកក្កដា សម្ដែងក្តីបារម្ភលើការដួលសន្លប់កម្មករដែរថា កម្មករដែលដួលសន្លប់ភាគច្រើនមានអាការៈក្អួតចង្អោរ វិលមុខ អស់កម្លាំង ដែលបង្កឡើយដោយខ្វះខ្យល់អុកស៊ីហ្សែន នៅក្នុងរោងចក្រ។
លោកបន្តថា នៅពេលកម្មករដួលសន្លប់កាន់ច្រើន នឹងប៉ះពាល់ដល់ដំណើរផលិតកម្ម និងជីវភាពរស់នៅរបស់កម្មករ ដូច្នេះរដ្ឋាភិបាលត្រូវតែដោះស្រាយបញ្ហានេះជាបន្ទាន់៖ «ខ្ញុំយល់ថា បណ្ដាម្ចាស់រោងចក្រទាំងអស់ ត្រូវដោះស្រាយបញ្ហានេះ ព្រោះពេលមានករណីកម្មករដួលសន្លប់ វាប៉ះពាល់ច្រើនណាស់ដល់ជីវភាពកម្មករ និងសេដ្ឋកិច្ចជាតិ»។
របាយការណ៍របស់សហជីពសេរីកម្មករឲ្យដឹងថា ក្នុងឆ្នាំ២០១៤ កម្មករដួលសន្លប់ និងរងគ្រោះថ្នាក់ការងារប្រមាណជាង ១.៤៣០នាក់ ដោយហេតុផលថា ហូបមិនគ្រប់គ្រាន់ ធ្វើការលើសម៉ោង ពុលកាវ ធំក្លិនថ្នាំពីសម្ភារៈ គ្មានសេវាសុខភាព និងដោយសារពុលជាតិគីមីជាដើម។
របាយការណ៍របស់របបជាតិសន្តិសុខសង្គម (ប.ស.ស) បានឲ្យដឹងថា មានរោងចក្រចំនួន ១១ទូទាំងប្រទេស ដែលមានកម្មករជាង ៥០០នាក់ បានដួលសន្លប់នៅក្នុងឆមាសទី១ (គិតចាប់ពីខែមករា រហូតដល់ខែមិថុនា) នៅក្នុងឆ្នាំ២០១៥។ ចំនួននេះមានការថយចុះបើប្រៀបធៀបនឹងរយៈពេលដូចគ្នានឹងឆ្នាំមុនដែលមានកម្មករសន្លប់រហូតដល់ជាង ៨៩០នាក់។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ផេង សួរ បាននៅឡើយនៅថ្ងៃទី២ ខែកក្កដា។ ប៉ុន្តែរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ធ្លាប់ប្រាប់អ្នកកាសែតកាលពីថ្ងៃទី២០ ខែសីហា កន្លងទៅថា ករណីដួលសន្លប់របស់កម្មករនៅតែបន្តមាន ហើយក្រសួងនឹងចាត់វិធានការផ្លូវច្បាប់ រួមនឹងការផាកពិន័យចំពោះថៅកែក្រុមហ៊ុន សហគ្រាសណាដែលមិនបានអនុវត្តតាមការណែនាំរបស់ក្រសួង។ លោកបន្តថា ក្រសួងនឹងរឹតបន្តឹងបទដ្ឋានអនាម័យ និងសុវត្ថិភាពការងារបន្ថែមទៀត ពិសេសរោងចក្រសហគ្រាសណាដែលធ្លាប់មានប្រវត្តិករណីដួលសន្លប់។
ការស្រាវជ្រាវរបស់ក្រសួងការងាររកឃើញថា មូលហេតុដែលធ្វើឲ្យកម្មករដួលសន្លប់ ដោយសារបរិយាកាសការងារ គួបផ្សំនឹងបញ្ហាសុខភាព និងបញ្ហាតានតឹងអារម្មណ៍ ឬស្ត្រេស (Stress) របស់កម្មករ។ ករណីដួលសន្លប់កើតឡើងច្រើនបំផុតគឺនៅក្នុងរដូវក្ដៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។