ពលរដ្ឋអាមេរិក ជាង ៥០នាក់នៃទីភ្នាក់ងារស្ម័គ្រចិត្ត ភីស.ឃ័រ (Peace Corps) បានបង្ហាញវត្តមានក្នុងប្រទេសកម្ពុជា ដោយសន្យាថា នឹងចុះតាមសហគមន៍ជនបទក្នុងខេត្តមួយចំនួន ដើម្បីផ្តល់ការអប់រំភាសាអង់គ្លេស និងអប់រំផ្នែកសុខភាពសាធារណៈ ជូនប្រជាពលរដ្ឋ ពិសេសយុវជនកម្ពុជា ឲ្យចេះពីវិធីរៀបចំខ្លួន ឬបង្កើតជំនាញចិញ្ចឹមជីវិតឲ្យបានប្រសើរនាថ្ងៃអនាគត។
វត្តមានទីភ្នាក់ងារ ភីស.ឃ័រ សហរដ្ឋអាមេរិក ពេលនេះ ទទួលបានការស្វាគមន៍ពីសំណាក់មន្ត្រីជាន់ខ្ពស់នៃរាជរដ្ឋាភិបាលកម្ពុជា ដោយអះអាងថា នឹងអាចចូលរួមជំរុញឲ្យមានការរីកចម្រើនផ្នែកវិស័យអប់រំ និងសុខភាពសាធារណៈ នៅទីជនបទបានប្រសើរនាថ្ងៃខាងមុខ។
ពិធីធ្វើសច្ចាប្រណិធានចូលបំពេញការងាររបស់ទីភ្នាក់ងារស្ម័គ្រចិត្ត ភីស.ឃ័រ ក្រុមថ្មីពេលនេះ ធ្វើឡើងនៅគេហដ្ឋាន លោក វីល្លៀម ថត (William E. Todd) ឯកអគ្គរដ្ឋទូតអាមេរិក ប្រចាំកម្ពុជា ក្នុងទីក្រុងភ្នំពេញ កាលពីព្រឹកថ្ងៃសុក្រ ទី១២ ខែកញ្ញា។
លោក វីល្លៀម ថត ឲ្យដឹងថា ក្រុមថ្មីនៃទីភ្នាក់ងារ ភីស.ឃ័រ មកកម្ពុជា ពេលនេះ មានសមាជិកចំនួន ៥៣នាក់ នឹងមកបំពេញការងាររយៈពេល ២ឆ្នាំ តាមខេត្តចំនួន១៥ ក្នុងប្រទេសកម្ពុជា។ លោកបន្តថា អ្នកស្ម័គ្រចិត្ត ភីស.ឃ័រ ទាំងនេះ នឹងទៅរស់នៅជាមួយគ្រួសារខ្មែរ និងធ្វើការនៅតាមសហគមន៍ជនបទ មានដូចជា បង្រៀនភាសាអង់គ្លេសដល់យុវជន អប់រំសុខភាពសាធារណៈ អប់រំទប់ស្កាត់អំពើហិង្សាក្នុងគ្រួសារ អប់រំអំពីការអភិវឌ្ឍមុខជំនួញខ្នាតតូច ឬកសាងជំនាញភាពជាអ្នកដឹកនាំ ដល់យុវជន ជាដើម។
លោក វីល្លៀម ថត បានផ្តាំផ្ញើ និងមានជំនឿថា ភ្នាក់ងារ ភីស.ឃ័រ ក្រុមទី៨ថ្មីបំផុតនៅកម្ពុជា នឹងបំពេញការងារដោយការទទួលខុសត្រូវខ្ពស់ ព្រមទាំងផ្តល់នូវជំនាញផ្សេងៗពិតប្រាកដល់យុវជន និងពលរដ្ឋក្រីក្ររស់នៅទីជនបទទៅតាមជំនាញរៀងៗខ្លួន។
គិតចាប់តាំងពីឆ្នាំ២០០៧ មក អ្នកស្ម័គ្រចិត្តនៃទីភ្នាក់ងារ ភីស.ឃ័រ សហរដ្ឋអាមេរិក បានចុះមកបំពេញការងារក្នុងប្រទេសកម្ពុជា មានសមាជិកចំនួន ៤០០នាក់ហើយ ហើយពួកគេបានចុះធ្វើការងារនៅតាមខេត្តចំនួន១៥ ក្នុងប្រទេសកម្ពុជា។
លោក វីល្លៀម ថត ឲ្យដឹងថា វត្តមានរបស់ទីភ្នាក់ងារ ភីស.ឃ័រ នៅកម្ពុជា គឺធ្វើឡើងតាមការអញ្ជើញរបស់រាជរដ្ឋាភិបាលកម្ពុជា។
នៅក្នុងពិធីធ្វើសច្ចាប្រណិធាននៃទីភ្នាក់ងារ ភីស.ឃ័រ លោក អេង ហួត រដ្ឋលេខាធិការក្រសួងសុខាភិបាល និងលោក ពិន ចំណាន រដ្ឋលេខាធិការក្រសួងអប់រំ យុវជន និងកីឡា ប្រកាសសាទរ និងចូលរួមសហការជាមួយអ្នកស្ម័គ្រចិត្តទាំងនេះ។ លោក ពិន ចំណាន ដែលចូលរួមក្នុងពិធីសច្ចាប្រណិធានរបស់ទីភ្នាក់ងារ ភីស.ឃ័រ មានប្រសាសន៍ជាភាសាអង់គ្លេស ដោយចាត់ទុកវត្តមានទីភ្នាក់ងារស្ម័គ្រចិត្ត ភីស.ឃ័រ ក្រុមថ្មីនេះ ថានឹងអាចចូលរួមចំណែកដល់ការអប់រំភាសាអង់គ្លេសបានទូលំទូលាយ។ ហើយក៏ជាផ្នែកមួយចូលរួមចំណែកក្នុងការអភិវឌ្ឍប្រទេស ជាមួយរាជរដ្ឋាភិបាលកាន់តែប្រសើរនាថ្ងៃអនាគត។
នៅក្នុងពិធីនោះ លោក ពិន ចំណាន បានបដិសេធមិនផ្តល់សម្ភាសជាភាសាខ្មែរដល់វិទ្យុអាស៊ីសេរី ទេ រួចក៏ឡើងជិះឡានចាកចេញទៅ។
ផ្ទុយពីនេះ សម្រាប់ទីភ្នាក់ងារ ភីស.ឃ័រ សហរដ្ឋអាមេរិក ពួកគេបែរជាផ្តល់បទសម្ភាសន៍ដល់អ្នកសារព័ត៌មានជាភាសាខ្មែរ ជំនួសភាសាអង់គ្លេស ដែលជាភាសាកំណើតរបស់ពួកគេទៅវិញ។
កញ្ញា អ៊ុលកា ហ្វូស្ទ័រ (Miss. Olka Forster) និងលោក ម៉ាត ប្រូនី (Matt Brunee) ស្ថិតក្នុងចំណោមអ្នកស្ម័គ្រចិត្ត ភីស.ឃ័រ ទាំង ៥៣នាក់ បានផ្តល់បទសម្ភាសន៍ជាភាសាខ្មែរថា ពួកគេប្ដេជ្ញានឹងយកចំណេះដឹង ដើម្បីចែករំលែកដល់យុវជន និងពលរដ្ឋកម្ពុជា ឲ្យមានជំនាញពិតប្រាកដក្នុងបេសកកម្មពីរឆ្នាំនៅកម្ពុជា។
ធ្លាប់ជាគ្រូបង្រៀនភាសាអង់គ្លេសថ្នាក់វិទ្យាល័យនៅសហរដ្ឋអាមេរិក លោក ម៉ាត ប្រូនី មានប្រសាសន៍ថា រូបគាត់ និងភរិយា បានស្ម័គ្រចិត្តដោយរីករាយចុះមកបម្រើការងារនៅកម្ពុជា។ លោកមានក្តីរំពឹងថា រយៈពេលពីរឆ្នាំ បើយុវជនកម្ពុជា ខិតខំរៀនភាសាអង់គ្លេស នឹងអាចចេះនិយាយ និងសរសេរភាសាអង់គ្លេសបានល្អ។ ដូចរូបគាត់ គឺទើបរៀនភាសាខ្មែរបាន ២ខែ គឺអាចនិយាយភាសាខ្មែរ និងផ្តល់បទសម្ភាសន៍ដល់អ្នកកាសែតបានមួយចំនួនដែរ៖ «ខ្ញុំមានអារម្មណ៍សប្បាយចិត្ត ព្រោះបានមកធ្វើការជាមួយប្រជាជនកម្ពុជា និងរៀនអំពីវប្បធម៌នៅក្នុងប្រទេសនេះ។ ខ្ញុំ គឺជាគ្រូបង្រៀនភាសាអង់គ្លេស ខ្ញុំនឹងធ្វើការជាមួយកូនសិស្សនៅស្រុកខ្មែរ។ ខ្ញុំគិតថា ខ្ញុំឲ្យឱកាសច្រើនសម្រាប់ក្មេងៗនៅប្រទេសខ្មែរ ឬប្រទេសកម្ពុជា។ ខ្ញុំចង់ពង្រឹងសមត្ថភាពសរសេរសម្រាប់ប្រជាជនកម្ពុជា និងខ្ញុំចង់បង្កើនឲ្យពលរដ្ឋកម្ពុជា ចេះហាត់ប្រាណផងដែរ»។
មិនខុសគ្នាទេ សម្រាប់ កញ្ញា អ៊ុលកា ហ្វូស្ទ័រ ដែលត្រូវចុះទៅបំពេញការងារនៅខេត្តសៀមរាប ក៏បានអះអាងថា នឹងព្យាយាមផ្តល់នូវជំនាញផ្នែកសុខាភិបាល ឬសុខភាពសាធារណៈ ជូនដល់ពលរដ្ឋកម្ពុជា នៅតាមទីជនបទឲ្យបានល្អបំផុត។ ជាងនេះ កញ្ញា អ៊ុលកា ហ្វូស្ទ័រ ដែលមានសម្បុរខ្មៅរលើប ក៏នឹងព្យាយាមយល់ និងរៀនសូត្រពីរបៀបរស់នៅ ការហូបចុក ព្រមទាំងស្វែងយល់ពីវប្បធម៌របស់ប្រជាជនកម្ពុជា ឲ្យបានច្បាស់លាស់ ដើម្បីយកទៅផ្សព្វផ្សាយឲ្យពិភពលោកដឹងបន្ត នៅពេលវិលទៅអាមេរិក វិញ៖ «ខ្ញុំចុះជួយផ្នែកសុខភាព និងអប់រំអំពីសុខភាពសាធារណៈដល់ពលរដ្ឋ។ នៅសហរដ្ឋអាមេរិក ខ្ញុំជានិស្សិតរៀនអំពីវប្បធម៌នៅលើពិភពលោក និងធ្វើការជាមួយជំងឺអេដស៍នៅក្នុងទីក្រុងខ្ញុំ»។
ត្រង់ចំណុចនេះ លោក វីល្លៀម ថត ឯកអគ្គរដ្ឋទូតសហរដ្ឋអាមេរិក ថ្លែងបញ្ជាក់ថា អ្នកស្ម័គ្រចិត្តម្នាក់ៗនៃទីភ្នាក់ងារ ភីស.ឃ័រ គឺត្រូវបានជ្រើសរើសតាមរយៈការដាក់ពាក្យសុំប្រកួតប្រជែងយ៉ាងហ្មត់ចត់នៅសហរដ្ឋអាមេរិក។ ទីភ្នាក់ងារនេះមានប្រុសមានស្រី គឺមានអាយុចន្លោះពី ២២ឆ្នាំ ដល់ ៧៥ឆ្នាំ ហើយមកពីក្រុមជនជាតិ ឬក្រុមជនជាតិភាគតិចខុសៗគ្នាជាច្រើន។
ទីភ្នាក់ងារ ភីស.ឃ័រ បានបង្កើតឡើងដោយអតីតប្រធានាធិបតីអាមេរិក ចន ខេនីឌី (John F. Kennedy) នៅក្នុងឆ្នាំ១៩៦១ ក្នុងបំណងលើកកម្ពស់សន្តិភាពពិភពលោក និងមិត្តភាព។ ហើយគោលដៅរបស់ ភីស.ឃ័រ គឺកសាងសមត្ថភាពរបស់បុរស និងស្ត្រីនៅតាមបណ្ដាប្រទេសដែលមានការចាប់អារម្មណ៍ និងដើម្បីលើកកម្ពស់ការយល់គ្នាទៅវិញទៅមករវាងសហរដ្ឋអាមេរិក និងប្រទេសដទៃទៀតនៅលើសកលលោក។
ស្ថានទូតអាមេរិក ឲ្យដឹងថា កាលពីឆ្នាំ២០១១ ទីភ្នាក់ងារ ភីស.ឃ័រ បានប្រារព្ធខួបលើកទី៥០ឆ្នាំរបស់ខ្លួន។ ហើយចាប់តាំងពីឆ្នាំ១៩៦១ មក មានអ្នកស្ម័គ្រចិត្តចំនួនជាង ២សែន ១ម៉ឺន ៥ពាន់នាក់ បានបម្រើការងារក្នុងទីភ្នាក់ងារនេះនៅតាមប្រទេសចំនួន១៣៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។