ប្រជាពលរដ្ឋរស់នៅភូមិគីឡូម៉ែត្រលេខ៩ សង្កាត់ច្រាំងចំរេះ១ ខណ្ឌឫស្សីកែវ បានត្អូញត្អែរពីការរំខានដោយសំឡេងបូមខ្សាច់ និងកំពុងព្រួយបារម្ភការបាក់ច្រាំងទន្លេ។
បុរសអ្នកភូមិម្នាក់ក្នុងចំណោមអ្នកភូមិផ្សេងទៀតដែលត្អូញត្អែរ គឺលោក សុស ភឿង បានឲ្យដឹងនៅថ្ងៃទី១១ កុម្ភៈ ថា ពលរដ្ឋនៅតំបន់នោះកំពុងធុញទ្រាន់ចំពោះសំឡេងរំខានដោយម៉ាស៊ីនបូមខ្សាច់ជាច្រើនគ្រឿង ដែលបើកចេញចូលមកដឹកជញ្ជូន និងបូមខ្សាច់នៅទន្លេមេគង្គ ចាប់ពីម៉ោងប្រមាណ ៥ ទៅម៉ោង ៦ព្រឹក រហូតដល់យប់ម៉ោង៦ ដល់ម៉ោង ៧យប់ក្នុងមួយថ្ងៃៗ ដែលបានដំណើរការប្រមាណ ៦ខែមកហើយ។
លោកថា ពលរដ្ឋបានឃើញឈ្មោះនៅលើសាឡង់ និងកប៉ាល់បូមនោះសរសេរជាអក្សរវៀតណាម ថា ក្រុមហ៊ុន លី យ៉ុងផាត់ ករណីនេះ ពួកគេបានដាក់លិខិតសុំឲ្យអាជ្ញាធរចុះត្រួតពិនិត្យ និងភ្ជាប់ដោយស្នាមមេដៃពលរដ្ឋប្រមាណ ១ពាន់នាក់ តែគ្មានដំណោះស្រាយសោះ៖ «កប៉ាល់ និងម៉ាស៊ីនវាហ្នឹងមកចតហូរហែពេញទឹកពេញដីហ្នឹង។ ម៉ាស៊ីនបូមខ្សាច់ ៦គ្រឿង ហើយកប៉ាល់ហ្នឹងនិយាយឲ្យចំទៅ បើសិនថារាប់ៗមិនអស់ទេចេញចូលៗ មួយថ្ងៃវាស់ៗល្ងាច គ្មានម៉ោងសម្រាកទេ និយាយឲ្យចំទៅ សាឡង់ហ្មងបណ្ដោយសុទ្ធតែ ១០០ម៉ែត្រអីណោះ ហើយនិងម៉ាស៊ីនធំៗចង់ប៉ុនៗឡាននោះ និយាយពីឡើងចង់បែកកណ្ដាស់ត្រចៀកនោះ មិនទុកចិត្តដែរមើលទៅដីឡើងខ្ទរដីអស់ហើយ»។
ឆ្លើយតបទៅនឹងក្ដីបារម្ភនេះ ចៅសង្កាត់ច្រាំងចំរេះ១ លោក ហ៊ុយ មូរ៉ា មានប្រសាសន៍ថា អាជ្ញាធរបានដឹងអំពីការរំខានដល់ពលរដ្ឋនេះជាយូរណាស់មកហើយ។ លោកថា អាជ្ញាធរបានជូនដំណឹងលែងឲ្យមានដេប៉ូខ្សាច់នៅត្រើយខាងនោះទៀត ឯការនៅសំឡេងរំខាននោះ គឺដោយសារតែក្រុមហ៊ុននេះត្រូវដឹកជញ្ជូនខ្សាច់នៅសេសសល់ប៉ុណ្ណោះ។ យ៉ាងណា លោកឆ្លើយថា អាជ្ញាធរសង្កាត់មិនបានដឹងថា ក្រុមហ៊ុនដឹកជញ្ជូននោះមានឈ្មោះអ្វីនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។