អ្នកភូមិនៅកំពង់ឆ្នាំងបារម្ភមិនមានទេសចរទៅកម្សាន្តនៅភ្នំនាងកង្រីអំឡុងបុណ្យចូលឆ្នាំ
2015.03.31
មន្ទីរទេសចរណ៍ខេត្តកំពង់ឆ្នាំង គ្រោងដាក់មន្ត្រីរបស់ខ្លួនចុះរៀបចំសន្តិសុខ សណ្ដាប់ធ្នាប់ និងសោភ័ណភាពនៅតាមរមណីយដ្ឋាន និងទីវត្តអារាមមួយចំនួនក្នុងថ្ងៃបុណ្យចូលឆ្នាំប្រពៃណីជាតិ។ ប៉ុន្តែវត្តគិរីភក្ដី ឬតំបន់ភ្នំនាងកង្រី នៅស្រុកកំពង់លែង មិនត្រូវបានបញ្ចូលក្នុងគម្រោងនេះទេ ដោយយល់ថា មិនសូវមានអ្នកទៅកម្សាន្ត ឬធ្វើបុណ្យច្រើនដូចបណ្ដាវត្តដទៃទៀតក្នុងខេត្តកំពង់ឆ្នាំង។
ភ្នំនាងកង្រី គឺជាតំបន់ភ្នំ និងមានវត្តអារាមទាក់ទងនឹងរឿងព្រេងនិទានខ្មែរ ប៉ុន្តែតំបន់នេះត្រូវបានមន្ត្រីរាជការ និងប្រជាពលរដ្ឋអះអាងថា រៀងរាល់ឆ្នាំក្នុងឱកាសបុណ្យចូលឆ្នាំប្រពៃណីជាតិ ពុំសូវមានមនុស្សច្រើនទៅកម្សាន្ត ឬធ្វើបុណ្យដាក់បាត្រ ក្រៅពីពុទ្ធបរិស័ទចំណុះជើងវត្តនោះទេ។ តំបន់ភ្នំនាងកង្រី មានមនុស្សទៅលេងច្រើនតែរដូវបុណ្យភ្ជុំបិណ្ឌ ដែលអាចធ្វើដំណើរតាមទូកទៅដល់ជើងភ្នំតែម្ដង។
ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី មានប្រសាសន៍នៅថ្ងៃទី៣០ ខែមីនា ថា នៅក្នុងរយៈពេលបីថ្ងៃនៃពិធីបុណ្យចូលឆ្នាំនេះ លោកនឹងចាត់មន្ត្រី ១១នាក់ ដើម្បីជួយរៀបចំសន្តិសុខ សណ្ដាប់ធ្នាប់ និងអនាម័យជាមួយអាជ្ញាធរមូលដ្ឋាន និងកម្លាំងប្រដាប់អាវុធ។ ការរៀបចំនេះ គឺនៅតាមទីវត្តអារាម និងទីប្រជុំជនសំខាន់ៗដែលមនុស្សនាំគ្នាសម្រុកទៅលេងច្រើន៖ «ដើម្បីរៀបចំសណ្ដាប់ធ្នាប់យានយន្តគ្រប់ប្រភេទ កន្លែងលក់ដូរឲ្យមានរបៀបរៀបរយ និងអនាម័យ ដូចជាអ្នកលក់ដូរអីត្រូវមានថង់សម្រាប់ដាក់សំរាម ឬកាកសំណល់តាមការណែនាំរបស់យើង ឲ្យគាត់វេចខ្ចប់ទុកម្ដុំ ហើយគាត់អាចទៅចោលនៅគំនរសំរាមដែលមណ្ឌលកម្សាន្តហ្នឹងមាន ឬគាត់អាចដុតកម្ទេចនៅគេហដ្ឋានរបស់គាត់។ យើងមិនអនុញ្ញាតឲ្យចោលពាសវាលពាសកាលតទៅទៀតទេ»។
លោកបញ្ជាក់ថា ទីតាំងដែលគ្រោងរៀបចំនោះ គឺមាននៅវត្តត្រឡែងកែង វត្តពោធិរុក្ខារាម ឋិតនៅស្រុកកំពង់ត្រឡាច វត្តថ្មកែវ វត្តត្រពាំងស្នោ ឋិតនៅស្រុករលាប្អៀរ និងវត្តខ្លុងពពក ឋិតនៅស្រុកទឹកផុស។ ទីវត្តអារាមទាំងនេះ តែងតែមានមនុស្សក្មេងចាស់សម្រុកទៅកម្សាន្ត និងលេងល្បែងប្រជាប្រិយច្រើន។ លោកថា ចំពោះវត្តគិរីភក្ដី នៅតំបន់ភ្នំនាងកង្រីវិញ មិនសូវមានមនុស្សទៅលេងទេ ព្រោះនៅរដូវប្រាំងទឹកទន្លេរាក់ លំបាកធ្វើដំណើរតាមទូក ឬកាណូត ហើយត្រូវជិះម៉ូតូ ឬដើរច្រើនម៉ោងទៀតទើបដល់។ ភ្នំនាងកង្រី មិនទាន់អភិវឌ្ឍអ្វីទេ ប៉ុន្តែវាឋិតនៅជាតំបន់ត្រៀមទុកអភិវឌ្ឍទេសចរណ៍។
ប្រជាពលរដ្ឋមួយចំនួនរស់នៅស្រុកកំពង់លែង និងក្រុងកំពង់ឆ្នាំង ចង់ឃើញការអភិវឌ្ឍទេសចរណ៍នៅតំបន់ភ្នំនាងកង្រី ដើម្បីរក្សាកេរ្តិ៍ឈ្មោះភ្នំនាងកង្រី ដែលទាក់ទងរឿងព្រេងនិទាន ពុទ្ធិសែន នាងកង្រី ឬព្រះនាង ១២។ ពលរដ្ឋរំពឹងថា ក្រៅពីរក្សាកេរ្តិ៍ឈ្មោះនេះ អ្នកភូមិក៏ទទួលបានការរីកចម្រើនផ្នែកសេដ្ឋកិច្ចគ្រួសារដែរ តាមរយៈការលក់ដូរចំណីអាហារ និងវត្ថុអនុស្សាវរីយ៍ផ្សេងៗជូនភ្ញៀវទេសចរ។
ពលរដ្ឋម្នាក់រស់នៅក្បែរភ្នំនាងកង្រី នៃឃុំត្រងិល ស្រុកកំពង់លែង លោក ហម អឿន ថ្លែងថា ប្រសិនបើតំបន់ភ្នំនាងកង្រី អភិវឌ្ឍឲ្យក្លាយទៅជាតំបន់ទេសចរណ៍ នឹងមានមនុស្សច្រើននៅក្នុង និងក្រៅខេត្ត សម្រុកមកលេង ហើយពេលនោះកេរ្តិ៍ឈ្មោះភ្នំនាងកង្រីកាន់តែល្បីសុះសាយថែមទៀត។ លោកថា បច្ចុប្បន្ននៅទីវត្តគិរីភក្ដី និងតំបន់ភ្នំនាងកង្រី គឺពុំមានអ្វីគួរឲ្យទាក់ទាញអារម្មណ៍ទេ៖ «នេះវាដូចថាជាភ្នំប្រវត្តិសាស្ត្រ ហើយមនុស្សតែងតែនឹកចង់ឃើញវារបៀបម៉េចអីយ៉ាងម៉េចណា? ប៉ុន្តែបើខ្ញុំធម្មតាៗវាអត់មានអីប្លែកផង បើមានស្ពានដូចសម្ដេច (លោកនាយករដ្ឋមន្ត្រី ហ៊ុន សែន) នឹងមានរមណីយដ្ឋាន ធ្វើអីទាក់ទាញភ្ញៀវទេសចរ បើខែនេះស្ងាត់ឈឹងតែម្ដង»។
ចំណែកកម្មករលីសែងអីវ៉ាន់ដាក់ទូកដទៅមកក្រុងកំពង់ឆ្នាំង ស្រុកកំពង់លែង លោក យ៉ាន សារិទ្ធិ មានប្រសាសន៍បណ្ដើរ ក្រឡេកមើល និងចង្អុលរៀបរាប់ទៅភ្នំនាងកង្រីបណ្ដើរថា ទាំងនៅរដូវវស្សា និងរដូវប្រាំង លោកតែងតែអង្គុយលេងមើលទេសភាពភ្នំនាងកង្រីពីក្រោមដើមពោធិ៍មាត់ទន្លេផ្សារក្រោមទៅ។ លោកថា លោកចាប់អារម្មណ៍ភ្នំនេះ តែបើធ្វើដំណើរទៅលេងទីនោះនៅរដូវប្រាំង នឹងជួបការលំបាកធ្វើដំណើរ ដោយមានបន្លា និងព្រៃច្រើនតាមផ្លូវ៖ «មានភាពសក្ដិសិទ្ធិដូចថា គាត់ (អាចារ្យនៅវត្តគិរីភក្ដី) តែងនិយាយថា អ្នកសច្ចំនៅក្នុងហ្នឹងប្រសិនកុហកគេ នឹងជួបតាមអំពើហ្នឹង គ្រាន់តែថា ទៅតាមកាណូតទេសចរណ៍អ៊ីចឹង យើងទៅនិយាយពាក្យអីយើងបានហ្នឹង! នៅក្នុងហ្នឹងមានអាស្រម ប៉ុន្តែមិនទាន់មាននរណាទៅអភិវឌ្ឍ»។
ទាក់ទងបញ្ហានេះ ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី ថ្លែងបញ្ជាក់ថា កាលពីចុងឆ្នាំ២០១៣ មានក្រុមហ៊ុនឯកជនមួយចាប់អារម្មណ៍តំបន់ភ្នំនាងកង្រី ហើយចង់អភិវឌ្ឍតំបន់នេះទៅជាតំបន់ទេសចរណ៍ ប៉ុន្តែនៅពេលចុះសិក្សាឃើញថា គម្រោងហ្នឹងធ្វើឲ្យប៉ះពាល់ដល់ប្រជាពលរដ្ឋច្រើនគ្រួសារពេក ក៏សម្រេចផ្អាកទៅវិញ៕