ក្រុមគ្រូបង្រៀនបានត្អូញត្អែរ និងសម្ដែងការមិនពេញចិត្តទៅលើទង្វើរបស់មន្ត្រីអប់រំស្រុក ដែលបានកាត់ប្រាក់ខែបង្រៀនបន្ថែមម៉ោងរបស់ពួកគាត់ ថាជាបញ្ហាអំពើពុករលួយដែលធ្វើឲ្យស្ថាប័នមួយនេះមានប្រវត្តិកេរ្តិ៍ឈ្មោះមិនល្អ និងមិនគួរគប្បីកើតមាននៅក្នុងសង្គមមួយនេះឡើយ។
លោកគ្រូបង្រៀនបឋមសិក្សានៅស្រុកព្រះស្ដេច ខេត្តព្រៃវែង ម្នាក់សុំមិនបញ្ចេញឈ្មោះ មានប្រសាសន៍នៅថ្ងៃទី៩ កក្កដា ថា មន្ត្រីអប់រំស្រុកព្រះស្ដេច កាត់ប្រាក់ខែបន្ថែមម៉ោង ៩% គឺមានចំនួនច្រើនណាស់។ ហើយបញ្ហានេះ ធ្វើឲ្យប៉ះពាល់ដល់ការទ្រទ្រង់ជីវភាពប្រចាំថ្ងៃរបស់ពួកគាត់៖ «គ្រូបង្រៀនពីរពេលហ្នឹង គឺប្រាក់បង្រៀនពេលថ្ងៃ ចំពោះគ្រូដែលសាលាហ្នឹងខ្វះគ្រូអីចឹង ត្រូវការយកគ្រូដដែលយកមកបង្រៀនមួយថ្នាក់ទៀត។ អ៊ីចឹង គាត់បង្រៀនពីរពេល គឺពេលព្រឹកមួយពេល ហើយពេលថ្ងៃមួយពេល។ ហើយប្រាក់ដែលគេកាត់ គឺកាត់ប្រាក់ពេលល្ងាច»។
លោកបន្ថែមថា ប្រាក់ខែបង្រៀនបន្ថែមម៉ោងជំនួសគ្រូដែលខ្វះនេះ គឺចាប់ពី ៦ ទៅ ៨ខែ ទើបគេបើកឲ្យ ហើយគេកាត់យកពីពួកគាត់នៅពេលបើកតែម្ដង។
ឆ្លើយតបទៅនឹងបញ្ហានេះ ប្រធានការិយាល័យអប់រំស្រុក លោក សរ ឈឿន មានប្រសាសន៍ថា ការិយាល័យអប់រំស្រុកមិនដែលមានគោលការណ៍កាត់ប្រាក់ខែមន្ត្រីក្រោមឱវាទដូចការលើកឡើងរបស់លោកគ្រូអ្នកគ្រូនោះឡើយ៖ «ទេការប្រាក់ខែនេះ ខ្ញុំដូចជាមិនមានគោលការណ៍អ្វីទេ។ នេះគ្រាន់តែថាជាការសម្របសម្រួលងាយអាយអ្វីទេ។ ដល់ទៅកាត់ប្រាក់ខែ ៨-៩% ខ្ញុំអត់មានគោលការណ៍ឲ្យកាត់ទេ»។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានឲ្យដឹងជុំវិញបញ្ហានេះថា ជារឿងដដែលៗ ហើយមន្ត្រីអប់រំតែងប្រកែកមិនព្រមទទួលការពិតដែលខ្លួនបានប្រព្រឹត្តឡើយ៖ «ការអះអាងការបដិសេធរបស់មន្ត្រីការិយាល័យអប់រំស្រុក គ្រាន់តែជាការប្រកែក ហើយមិនហ៊ានទទួលខុសត្រូវទេ។ អ្វីដែលលោកគ្រូអ្នកគ្រូបានលើកឡើងសម្ដែងពីរឿងការពិតហើយ។ យើងដឹងហើយការសម្រេចចិត្ត និងហ៊ានមកជម្រាបវិទ្យុអាស៊ីសេរី ថាមានការកាត់លុយអីហ្នឹង គាត់ជាការសម្រេចចិត្តចុងក្រោយរបស់គាត់។ ហើយអ្វីដែលគាត់លើកឡើងហ្នឹង សុទ្ធតែជាការពិត»។
លោកបន្តថា ក្រសួងអប់រំ គួរតែនាំជនដែលបានប្រព្រឹត្តអំពើពុករលួយមកផ្ដន្ទាទោសឲ្យបានធ្ងន់ធ្ងរ ទៅលើមន្ត្រីខិលខូចណាដែលបានប្រព្រឹត្ត និងដើម្បីពង្រឹងវិស័យអប់រំកម្ពុជាឲ្យបានប្រសើរឡើង។
នៅក្នុងស្រុកព្រះស្ដេច មានសាលារៀនសរុប ៥៩សាលា និងមានគ្រូបឋមសិក្សាបង្រៀនបន្ថែមម៉ោងប្រមាណជាង ៣០០នាក់។ ដោយគ្រូបង្រៀនបន្ថែមម៉ោងម្នាក់អាចទទួលបានប្រាក់បន្ថែមពី ១៧ម៉ឺន ទៅ ២៥ម៉ឺនរៀលក្នុងមួយខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។