ក្រុមអាជីវករបានរៀបរាប់បញ្ជាក់ដោយចាត់ទុកវិធានការរបស់អាជ្ញាធរ និងក្រុមនាយទុនរកស៊ីសង់ផ្សារឯកជន ដែលបានព្យាយាមបណ្ដេញពួកគាត់មិនឲ្យលក់ដូរនៅផ្សារទីតាំងចាស់នោះ ថាជាការគាបសង្កត់ កេងចំណេញធ្វើបាបពីប្រជាពលរដ្ឋអ្នកលក់ដូរតូចតាច ដើម្បីបម្រើផលប្រយោជន៍របស់ខ្លួន។
អ្នកលក់ដូរនៅផ្សារចក្រី ម្នាក់ អ្នកស្រី ឡាយ សុខគាង ថ្លែងបញ្ជាក់នៅថ្ងៃទី២១ មករា ថា ផ្សារចក្រី សង់ថ្មី ដែលក្រុមអាជ្ញាធរបង្ខំឲ្យប្រជាពលរដ្ឋទៅលក់ដូរថ្មីនោះ មានទីតាំងនៅក្នុងព្រៃឆ្ងាយពីផ្លូវ និងឆ្ងាយពីកន្លែងរស់នៅរបស់ប្រជាពលរដ្ឋ។ អ្នកស្រី ឡាយ សុខគាង ថ្លែងបន្តថា ទាំងកន្លែងជួល និងកន្លែងសេវាកម្មគ្រប់បែបយ៉ាងក្នុងផ្សារថ្មីនោះ មានតម្លៃខ្ពស់ខុសពីទីតាំងចាស់ ដែលធ្វើឲ្យអ្នកលក់ដូរក្នុងផ្សារ ពុំទទួលបានផលកម្រៃពីការលក់ដូររបស់ខ្លួនឡើយ។
អ្នកស្រី ឡាយ សុខគាង៖ «អ្នកណាយកច្រើនម៉ែត្របង់ច្រើនទៅ មួយម៉ែត្រមួយខែមួយម៉ឺន បើយក ៥ម៉ែត្រមួយខែ៥ម៉ឺន។ ហើយនៅទីតាំងចាស់ហ្នឹង មួយខែក្មួយបង់តែ ២ម៉ឺនទេ ហើយនៅមិនចង់រត់រួចផង អាឡូវបួនប្រាំម៉ឺនមួយខែទៀត រត់អត់រួចទេពូ នៅថ្លៃទឹកថ្លៃភ្លើង ហើយនៅភាស៊ីទៀត។ មុនដំបូងថាមួយម៉ែត្រហ្នឹង ៨ពាន់ក្នុងមួយខែ ដល់ពេលអាជីវករសុខចិត្តថាព្រមទៅខាងនោះ ឥឡូវឡើងថ្លៃមួយម៉ឺន។ ហើយភ្លើងហ្នឹងអត់តខ្លួនឯងបានទេ តកន្លែងដីទីផ្សារថ្មីហ្នឹងហ្មង»។
រីឯអាជីវករលក់ដូរនៅផ្សារចក្រី ម្នាក់ទៀត លោក វឿន វ៉ៃ ថ្លែងបញ្ជាក់ដោយស្នើឲ្យអាជ្ញាធរដោះស្រាយឲ្យប្រជាពលរដ្ឋបានលក់ដូរនៅទីកន្លែងផ្សារចក្រីចាស់ដូចដើមវិញ។ លោកថ្លែងបន្តថា ទីតាំងផ្សារថ្មីនោះ ជួបការលំបាក នៅឆ្ងាយពីទីប្រជុំជនដែលពុំមានមនុស្សចេញចូលទិញរបស់របរច្រើន ដូចផ្សារចាស់ដែលស្ថិតនៅជិតផ្លូវនោះឡើយ៖ «ហើយអ៊ីចឹងតម្លៃ តម្លៃតូបហ្នឹងយើងជួល ហើយយើងធ្វើតូបខ្លួនយើងការពារ ហើយទារៗហ្នឹងថ្លៃពេក ទឹកភ្លើងក៏វាថ្លៃដែរ។ កាលយើងនៅនោះ កន្លែងចាស់យើងទឹកភ្លើងតម្លៃថោកទេ ហើយទៅណោះរត់ម៉េចរួច ប្រជាពលរដ្ឋឥឡូវលក់ដូរក៏អត់សូវដាច់ដែរ ឥឡូវគ្មានមនុស្សណានៅ គិតទៅ មើលនៅភ្នំពេញ ក៏ដូចគ្នាដែរ វាពិបាកណាស់អ្នករកស៊ីគាបអ៊ីចឹងពេក។ គាបសង្កត់ថាឲ្យយើងទៅរើទៅកន្លែងថ្មីទៅ បើយើងអត់ទៅបាន យើងទៅម៉េចកើត បើកន្លែងថ្មីលក់ដាច់ទៅគេទៅហើយ»។
ផ្សារចក្រី ស្ថិតនៅចម្ងាយប្រមាណ ២០០ម៉ែត្រពីជាយដែននៃប្រទេសវៀតណាម ស្ថិតនៅភូមិករគោ នៃឃុំករគោ ស្រុកព្រះស្ដេច ខេត្តព្រៃវែង។ សព្វថ្ងៃ ផ្សារមួយនេះមានអាជីវករលក់ដូរប្រហែលជិត ១០០តូប ហើយក្រុមអាជ្ញាធរមូលដ្ឋាន និងនាយទុនរកស៊ីសង់ផ្សារឯកជន បានចាក់ដីសង់ផ្សារចក្រីថ្មី ជំនួសផ្សារចាស់ដែលមានចម្ងាយឆ្ងាយពីផ្សារចក្រីចាស់ ប្រមាណជិត ៣០០ម៉ែត្រ។
ទាក់ទងនឹងបញ្ហានេះ អភិបាលស្រុកព្រះស្ដេច លោក ប៉ិច សុង មានប្រសាសន៍បញ្ជាក់ថា អាជ្ញាធរបានអភិវឌ្ឍទីតាំងនៅតំបន់ផ្សារចក្រី ដោយទីតាំងនៃផ្សារចក្រីចាស់ ជាកន្លែងលិចទឹកនៅរដូវវស្សា មានទីធ្លាតូចចង្អៀត គ្មានសោភ័ណភាព។ លោក ប៉ិច សុង ថ្លែងបន្តថា ចំពោះបញ្ហារវាងអាជ្ញាធរមូលដ្ឋាន និងក្រុមអាជីវករនោះ លោកនឹងធ្វើការសម្របសម្រួលឲ្យអាជីវករបានលក់ដូរទៅតាមសំណើរបស់ប្រជាពលរដ្ឋ៖ «ផ្សារហ្នឹងគេដាក់ឲ្យធ្វើជាផ្សារអភិវឌ្ឍន៍ អ៊ីចឹងកន្លែងលក់ចាស់វានៅកន្លែងទំនាប វាទាបវាផុកវាជាំដល់ខែទឹកលិចមកវាលិច ដល់ឥឡូវគេចាក់ដីកន្លែងថ្មី ខែទឹកលិចក៏វាអត់លិចដែរ។ សម្រួលថា អ្នកណាព្រមទៅទីតាំងថ្មីទៅ អ្នកណាមិនព្រមនៅទីតាំងចាស់ហ្នឹងទៅ អាហ្នឹងក្នុងនាមអាជ្ញាធរដែនដីសម្របសម្រួលអ៊ីចឹង»។
តែយ៉ាងណា ក្រុមអាជីវករឲ្យដឹងថា នៅព្រឹកថ្ងៃទី២១ មករា ក្រុមអាជ្ញាធរមូលដ្ឋានមានមេភូមិ និងប៉ូលិសផង បាននាំកម្លាំងទៅបង្ខំដោយគាបសង្កាត់ឲ្យពួកគាត់ចាកចេញពីទីកន្លែងដែលខ្លួនលក់ដូរចាស់ រួចទៅលក់ដូរកន្លែងថ្មីជំនួសវិញ។ ប៉ុន្តែ ក្រុមអាជីវករប្រឆាំងតវ៉ាចំពោះសកម្មភាពរបស់អាជ្ញាធរនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។