អង្គការក្រៅរដ្ឋាភិបាលឈ្មោះ មូលនិធិ លី ពញារី បានទៅប្រមូលយកកុំព្យូទ័រ និងផ្ទាំងថាមពលអគ្គីសនីដើរដោយពន្លឺព្រះអាទិត្យ (Solar) ព្រមទាំងឧបករណ៍ភ្លេងជាច្រើនគ្រឿងពីសាលាបឋមសិក្សាខ្នារ នៅភូមិខ្នារ ឃុំខ្នារសណ្ដាយ នៃស្រុកបន្ទាយស្រី ចម្ងាយប្រមាណ ៣០គីឡូម៉ែត្រភាគខាងជើងឆៀងខាងលិចពីទីរួមខេត្តសៀមរាប។
ការប្រមូលយកសម្ភារទាំងនោះវិញ ជាសញ្ញាបញ្ជាក់ថា អង្គការបានបញ្ឈប់ការផ្ដល់ជំនួយទៅឲ្យសាលានេះទៀតហើយ ដោយសារតែគេរកឃើញថា នាយកសាលាបានកេងប្រវ័ញ្ចលើជំនួយខ្លះៗសម្រាប់កុមារ។
តើការកេងប្រវ័ញ្ចនោះក្នុងរូបភាពបែបណា?
ឪពុកម្ដាយសិស្សមួយចំនួនរស់នៅឃុំខ្នារសណ្ដាយ ស្រុកបន្ទាយស្រី សម្ដែងការសោកស្ដាយ ព្រមទាំងព្រួយបារម្ភទៅលើអនាគតកូនៗរបស់ពួកគេ ថាអាចនឹងមិនមានលទ្ធភាពសិក្សាបានច្រើនដូចមុនទៀតឡើយទៅលើជំនាញកុំព្យូទ័រ និងភាសាអង់គ្លេស ជាដើម។ ការព្រួយបារម្ភនេះ កើតមានឡើងនៅក្រោយពេលដែលអង្គការក្រៅរដ្ឋាភិបាលមួយឈ្មោះ មូលនិធិ លី ពញារី បានដកជំនួយចេញពីសាលាបឋមសិក្សាខ្នារ ដែលកូនៗរបស់គេធ្លាប់ទៅរៀនកុំព្យូទ័រ និងភាសាអង់គ្លេសដោយឥតគិតថ្លៃរយៈពេលជាច្រើនឆ្នាំមកហើយ។
ស្ត្រីវ័យកណ្ដាលម្នាក់ដែលជាអ្នកភូមិខ្នារ ក្នុងចំណោមឪពុកម្ដាយសិស្សជាច្រើនទៀត គឺលោកស្រី ចាវ ទុំ។ លោកស្រីមានប្រសាសន៍ថា កាលពីជិត ១សប្ដាហ៍មុន លោកស្រីមានអារម្មណ៍ក្ដុកក្ដួលយ៉ាងខ្លាំង បន្ទាប់ពីឃើញកុមារតូចៗជាច្រើននាក់ដើរចេញពីសាលាបឋមសិក្សាខ្នារ ហើយនាំគ្នាយំ។ លោកស្រីបានសួរក្មេងៗទាំងនោះថា នាំគ្នាយំរឿងអ្វី? ហើយពួកគេប្រាប់ថា គេយំពីព្រោះតែអង្គការបានដកយកកុំព្យូទ័រ និងថាមពលអគ្គិសនីដោយកម្លាំងព្រះអាទិត្យអស់ទៅហើយ ព្រមទាំងបិទថ្នាក់បង្រៀនភាសាអង់គ្លេស ធ្វើឲ្យពួកគេមិនបានរៀនទៀតឡើយ។
លោកស្រី ចាវ ទុំ បញ្ជាក់ថា ជំនួយរបស់មូលនិធិ លី ពញារី នៅក្នុងសាលាបឋមសិក្សាខ្នារ ពិតជាមានសារសំខាន់ខ្លាំងណាស់សម្រាប់ជួយកុមារតូចៗ និងក្មេងកំព្រាក្រីក្រ មានឱកាសល្អបានរៀនសូត្រសម្រាប់អនាគត៖ « ខ្ញុំយល់ថាឲ្យមូលនិធិគួរដាក់ជំនួយមកវិញមក ពីព្រោះអ្នកស្រុកនេះកំពុងតែខ្វះខាតលទ្ធភាពជួយកូនឲ្យរៀនសូត្រ។ កុមារខ្លះមិនមានសម្លៀកបំពាក់ទៅសាលារៀនទេ ពីព្រោះគ្មានឪពុកម្ដាយ »។
អ្នកភូមិខ្នារ ម្នាក់ទៀតក៏សម្ដែងការសោកស្ដាយប្រហាក់ប្រហែលគ្នាដែរ។ លោកស្រី ជាង សុភា មានប្រសាសន៍ថា លោកស្រីមានកូនតូចៗចំនួន ៣នាក់ដែលកំពុងរៀននៅសាលាបឋមសិក្សា។ ជាច្រើនខែមុន ពួកគេបានទៅរៀនភាសាអង់គ្លេសនៅសាលានោះ ដោយរូបគាត់មិនបានចំណាយប្រាក់ទេ ប៉ុន្តែនៅពេលដែលមូលនិធិ លី ពញារី បញ្ឈប់ការផ្ដល់ជំនួយឲ្យសាលានោះ គឺកូនៗរបស់គាត់បានបាក់ទឹកចិត្តយ៉ាងខ្លាំង ព្រមទាំងអស់សង្ឃឹមលើការរៀនសូត្រប្រចាំថ្ងៃ៖ « ដកចេញអ៊ីចេះ ខ្ញុំក៏បាក់ទឹកចិត្តដោយសារកូនដែរ។ កូនខ្ញុំក៏បាក់ទឹកចិត្តចំពោះការសិក្សា។ ខ្ញុំអង្គុយគិតថាមិនដឹងមានលទ្ធភាពរកលុយពីណាឲ្យកូនទៅរៀនកុំព្យូទ័រដូចពេលមុន ពីព្រោះគ្មានលុយ »។
ប្រភពព័ត៌មានខ្លះដែលផ្សព្វផ្សាយរឿងអាស្រូវរបស់សាលាបឋមសិក្សានៅតាមបណ្ដាញសង្គមហ្វេសប៊ុក (Facebook) បាននិយាយថា បញ្ហាដែលមូលនិធិ លី ពញារី បញ្ឈប់ការផ្ដល់ជំនួយទៅឲ្យសាលាបឋមសិក្សាខ្នារ នោះ ដោយសារតែនាយកសាលាកេងប្រវ័ញ្ចទៅលើរបបអាហារខ្លះៗដែលអង្គការបានផ្ដល់ឲ្យកុមារហូបជារៀងរាល់ព្រឹក។
ក៏ប៉ុន្តែនាយកសាលាបឋមសិក្សាខ្នារ លោក សួន សុហ៊ាន បានបដិសេធការចោទប្រកាន់នោះ ថាគឺជារឿងមិនពិត។ លោក សួន សុហ៊ាន មានប្រសាសន៍ថា កាលពី ៣-៤ឆ្នាំមុន រូបលោកធ្លាប់មានបញ្ហាតិចតួចជាមួយនឹងមូលនិធិ លី ពញារី ដោយសារតែអង្គការបានទម្លាក់លុយថ្លៃអាហារមកឲ្យសាលាគ្រប់គ្រង ហើយមានការលម្អៀងខ្លះៗ រូបលោកក៏បង្វិលការគ្រប់គ្រងលុយថ្លៃអាហារនោះទៅឲ្យអង្គការគ្រប់គ្រងវិញ។
លោក សួន សុហ៊ាន បញ្ជាក់ថា ការចោទប្រកាន់ថារូបលោកកេងប្រវ័ញ្ចលើរបបអាហារកុមារនោះ គឺមិនត្រឹមត្រូវទេ ពីព្រោះតែសាលាមិនបានគ្រប់គ្រងប្រាក់ទាំងនោះឡើយ៖ « ទាក់ទងនឹងសម្ភារ ឬក៏លុយកាក់ សាលាមិនបានទទួលមកគ្រប់គ្រងទេ សូម្បីតែវិក្រយបត្រចាយវាយលុយកាក់ ក៏សាលាមិនបានស៊ីញេទេ ដោយសារតែការងារទាំងអស់ គឺបុគ្គលិករបស់អង្គការទិញយកមកដាក់ជាមួយនឹងចុងភៅផ្ទាល់ »។
លោកនាយកសាលាបឋមសិក្សាខ្នារ ឲ្យដឹងថា រយៈពេល ១១ឆ្នាំមកហើយ មូលនិធិ លី ពញារី បានផ្ដល់ជំនួយឲ្យសាលារបស់លោក ដូចជាផ្ដល់សម្ភារសៀវភៅ ប៊ិច ព្រមទាំងសម្លៀកបំពាក់ឲ្យកុមារ ហើយជារៀងរាល់ខែ មូលនិធិ លី ពញារី តែងឧបត្ថម្ភអាហារឲ្យសិស្សបន្ថែមលើរបបអាហាររបស់អង្គការស្បៀងអាហារពិភពលោក ដូចជាសាច់ជ្រូក បន្លែ ព្រមទាំងអាហារក្រៀម និងទឹកផ្លែឈើកំប៉ុង ជាដើម។ បន្ថែមលើនេះ មូលនិធិបានផ្ដល់កុំព្យូទ័រសម្រាប់សិស្សរៀន ព្រមទាំងចេញថ្លៃឲ្យគ្រូទៅបង្រៀនភាសាអង់គ្លេសដល់កុមារផង។ លោកនាយកសាលានៅតែអះអាងថា លោកមិនបានធ្វើខុសដូចការចោទប្រកាន់ថា កេងប្រវ័ញ្ចលើជំនួយរបស់កុមារនោះទេ។
បច្ចុប្បន្ន សាលាបឋមសិក្សាខ្នារ គឺមានសិស្សចំនួនជាង ២៨០នាក់ បានចូលរៀនជាប្រចាំ ទាំងថ្នាក់មត្តេយ្យ ថ្នាក់បឋមសិក្សា និងថ្នាក់ទី៦ នៃអនុវិទ្យាល័យ។
កាលពីថ្ងៃទី២០ ខែកុម្ភៈ អ្នកគ្រប់គ្រងមូលនិធិ លី ពញារី បានដាក់ពាក្យទៅមន្ទីរអប់រំ យុវជន និងកីឡាខេត្តសៀមរាប ដោយស្នើសុំដកយកកុំព្យូទ័រចំនួន ១០គ្រឿង ផ្ទាំង Solar ថ្នាក់កុំព្យូទ័រចំនួន ១០គ្រឿង ឧបករណ៍អេឡិចត្រូនិក ៣ឈុត ឧបករណ៍ភ្លេង ២០ដើម ម៉ាស៊ីនបញ្ចាំង Slide ១គ្រឿង និងផ្ទាំងបញ្ចាំង Slide ១គ្រឿងពីសាលាបឋមសិក្សាខ្នារ ដោយបញ្ជាក់ថា មូលនិធិ លី ពញារី បានជួយសាលានេះរយៈពេល ១១ឆ្នាំ ហើយយល់ថាសាលានេះរឹងមាំអាចជួយទ្រទ្រង់ការអប់រំដោយខ្លួនឯងបាន។
ប្រធានមន្ទីរអប់រំ យុវជន និងកីឡាខេត្តសៀមរាប លោក សយ ទិត្យាវង្ស មានប្រសាសន៍ថា លោកមិនបានរកឃើញថា នាយកសាលានោះបានកេងប្រវ័ញ្ចជំនួយរបស់អង្គការ ដែលជាមូលហេតុធ្វើឲ្យមូលនិធិ លី ពញារី បញ្ឈប់ការផ្ដល់ជំនួយតទៅទៀត៖ « ដូចជាមិនមានដូចការចោទប្រកាន់នោះទេ ការដែលមូលនិធិ លី ពញារី ដកយកសម្ភារពីសាលានោះ ដោយសារតែសាលានោះរឹងមាំ ហើយគេយកទៅជួយសាលាផ្សេងទៀត »។
ទោះជាយ៉ាងណា ស្ថាបនិកមូលនិធិ គឺអ្នកស្រី លី ពញារី អះអាងថា បញ្ហាដែលអង្គការរបស់អ្នកស្រីដកសម្ភារ និងបញ្ឈប់ការផ្ដល់ជំនួយឲ្យសាលាបឋមសិក្សាខ្នារ នោះ ដោយសារតែម្ចាស់ជំនួយ និងអ្នកស្ម័គ្រចិត្តបរទេសជាច្រើនមិនសប្បាយចិត្តចំពោះភាពមិនប្រក្រតីជាច្រើន។ អ្នកស្រី លី ពញារី បញ្ជាក់ថា ជាច្រើនឆ្នាំមកហើយ អ្នកស្រីមិនពេញចិត្តជាមួយនាយកសាលា ដែលមិនបានសហការលើការងារឲ្យជាប់លាប់ ព្រមទាំងការកេងប្រវ័ញ្ចលើរបបអាហាររបស់កុមារ ជាដើម៖ « កាលពីមុនដំបូង អង្គការបានប្រគល់ប្រាក់ឲ្យគាត់ទៅទិញម្ហូប ជាលទ្ធផលគាត់ទិញសម្ភារមកទុកក្នុងឃ្លាំងឲ្យវារលួយចោល ភាពមិនប្រក្រតីទី២ គឺមានការបាត់ម្ហូប »។
អង្គការមូលនិធិ លី ពញារី ឲ្យដឹងថា បេសកកម្មរបស់អង្គការនេះតាំងតែពីឆ្នាំ២០០៦ មក គឺជួយជ្រោមជ្រែងដល់កុមារ និងយុវជនក្រីក្រច្រើនរយនាក់នៅខេត្តសៀមរាប និងខេត្តព្រះវិហារ ឲ្យមានលទ្ធភាពបានរៀនសូត្រ ព្រមទាំងបន្តការសិក្សារហូតដល់ថ្នាក់ឧត្តម។ ពេលនេះថ្វីត្បិតតែអង្គការមូលនិធិ លី ពញារី បញ្ឈប់ការផ្ដល់ជំនួយទៅឲ្យសាលាបឋមសិក្សាខ្នារ ក្តី ក៏អង្គការនៅតែគិតគូរដល់កុមារជាច្រើននៅទីនោះ ពីព្រោះតែកុមារទាំងអស់បានស្ថិតនៅក្នុងបេះដូងនៃមូលនិធិ លី ពញារី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។