សាច់ញាតិ​និង​អ្នក​គាំទ្រ​ធ្វើ​ពិធី​បួងសួង​ឲ្យ​តុលាការ​ផ្ដល់​យុត្តិធម៌​ឲ្យ​លោក ឌិន ពុទ្ធី

ដោយ ហ៊ុំ ចំរើន
2017-01-01
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
សាច់ញាតិ និង​អ្នក​គាំទ្រ​លោក ឌិន ពុទ្ធី ធ្វើ​បុណ្យ​សុំ​សេចក្ដី​សុខ និង​ឲ្យ​តុលាការ​ផ្ដល់​យុត្តិធម៌​ជូន​ជន​ត្រូវ​ចោទ​ឲ្យ​បាន​ឆាប់​រហ័ស នៅ​ផ្ទះ​លោក ឌិន ពុទ្ធី ភូមិ​សាមគ្គីមានជ័យ សង្កាត់​ប៉ោយប៉ែត ក្រុង​ប៉ោយប៉ែត ខេត្ត​បន្ទាយមានជ័យ ថ្ងៃ​ទី​១ ខែ​មករា ឆ្នាំ​២០១៧។ Photo Provided
សាច់ញាតិ និង​អ្នក​គាំទ្រ​លោក ឌិន ពុទ្ធី ធ្វើ​បុណ្យ​សុំ​សេចក្ដី​សុខ និង​ឲ្យ​តុលាការ​ផ្ដល់​យុត្តិធម៌​ជូន​ជន​ត្រូវ​ចោទ​ឲ្យ​បាន​ឆាប់​រហ័ស នៅ​ផ្ទះ​លោក ឌិន ពុទ្ធី ភូមិ​សាមគ្គីមានជ័យ សង្កាត់​ប៉ោយប៉ែត ក្រុង​ប៉ោយប៉ែត ខេត្ត​បន្ទាយមានជ័យ ថ្ងៃ​ទី​១ ខែ​មករា ឆ្នាំ​២០១៧។ Photo Provided
Photo Provided

សាច់ញាតិ និង​អ្នក​គាំទ្រ​លោក ឌិន ពុទ្ធី ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា ប្រមាណ ៧០​នាក់ នៅ​ក្រុង​ប៉ោយប៉ែត ខេត្ត​បន្ទាយមានជ័យ នៅ​ព្រឹក​ថ្ងៃ​ទី​១ ខែ​មករា ឆ្នាំ​២០១៧ ធ្វើ​បុណ្យ​បួងសួង​សុំ​ឲ្យ​វត្ថុ​ស័ក្ដិសិទ្ធិ ជួយ​ឲ្យ​លោក ឌិន ពុទ្ធី ឆាប់​បាន​ចេញ​ពី​ពន្ធនាគារ។

ប្អូន​ប្រុស​បង្កើត​របស់​ជន​ត្រូវ​ចោទ គឺ​លោក ឌិន ធីរិទ្ធ ឲ្យ​ដឹង​នៅ​ថ្ងៃ​ទី​១ មករា ថា ពិធី​នេះ​រៀបចំ​ឡើង​នៅ​ផ្ទះ​របស់​លោក ឌិន ពុទ្ធី នៅ​ភូមិ​សាមគ្គីមានជ័យ សង្កាត់​ប៉ោយប៉ែត ដោយ​ចាប់​ផ្ដើម​ពី​ម៉ោង​ប្រមាណ ៩​ព្រឹក​ដល់​ម៉ោង ១២​កន្លះ​ថ្ងៃ​ត្រង់។

លោក​អះអាង​ថា អ្នក​ចូលរួម​ពិធី​បុណ្យ​រួម​មាន​ប្រពន្ធ​លោក ឌិន ពុទ្ធី ប្អូន​បង្កើត ប្អូន​ថ្លៃ បង​ថ្លៃ និង​សហការី​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា និង​អ្នក​គាំទ្រ​លោក ឌិន ពុទ្ធី នៅ​ក្រុង​ប៉ោយប៉ែត ចូលរួម​ប្រហែល ៧០​នាក់។ លោក​បន្ថែម​ថា គោល​បំណង​ដែល​រៀបចំ​ពិធី​បុណ្យ​នេះ ធ្វើ​ឡើង​ដើម្បី​សុំ​សិរី​សួស្ដី​ក្នុង​ឱកាស​ឆ្លង​ឆ្នាំ​២០១៧ ផង និង​ធ្វើ​បុណ្យ​សុំ​ឲ្យ​វត្ថុ​ស័ក្ដិសិទ្ធិ​ទាំងឡាយ​ដែល​ថែរក្សា​ប្រទេស​កម្ពុជា បន្ទន់​ចិត្ត​តុលាការ​ខេត្ត​បន្ទាយមានជ័យ និង​មន្ត្រី​ពាក់ព័ន្ធ ដើម្បី​ឲ្យ​ផ្ដល់​យុត្តិធម៌​ជូន​ដល់​លោក ឌិន ពុទ្ធី ឲ្យ​មាន​សេរីភាព​ឲ្យ​បាន​ឆាប់​រហ័ស៖ «ខ្ញុំ​ត្រូវ​ធ្វើ ព្រោះ​ដោយសារ​តែ​ឃុំ​គាត់​មាន​ភាព​យុត្តិធម៌​ពេក។ មិន​ថា​ខ្ញុំ សូម្បី​តែ​ពលរដ្ឋ​នៅ​ក្នុង និង​ក្រៅ​ប្រទេស ដែល​លេង​ហ្វេសប៊ុក (facebook) ក៏​បាន​មើល​ឃើញ​ដែរ ហើយ​អ្នក​ខ្លះ​ដែល​បាន​មក​ចូលរួម​មាន​ការ​ក្ដុកក្ដួល​ក្នុង​ចិត្ត​ស្ទើរ​គ្រប់​គ្នា ដោយសារ​ការ​អាណិត​អាសូរ​គាត់»

អាស៊ីសេរី ពុំ​អាច​ទាក់ទង​អាជ្ញាធរ​ខេត្ត​បន្ទាយមានជ័យ ដើម្បី​សុំ​អត្ថាធិប្បាយ​ពី​ការ​ធ្វើ​បុណ្យ​នេះ​បាន​ទេ នៅ​ថ្ងៃ​ទី​១ មករា។

ទោះ​ជា​យ៉ាង​នេះ​ក្ដី មន្ត្រី​សម្របសម្រួល​សមាគម​ការពារ​សិទ្ធិ​មនុស្ស​អាដហុក (ADHOC) ខេត្ត​បន្ទាយមានជ័យ លោក ស៊ុំ ច័ន្ទគា មាន​ប្រសាសន៍​ថា បញ្ហា​នេះ​គឺ​ជា​ជំនឿ​ផ្លូវ​ចិត្ត​របស់​ពលរដ្ឋ ដែល​ពួក​គាត់​មាន​ចិត្ត​ស្រឡាញ់ និង​គាំទ្រ​លោក ឌិន ពុទ្ធី ដើម្បី​បង្ហាញ​ឲ្យ​តុលាការ​មើល​ឃើញ​ថា ជន​ជាប់​ចោទ​ជា​មនុស្ស​ធ្វើ​ការងារ​ដើម្បី​ប្រយោជន៍​នៅ​ក្នុង​សង្គម​ជាតិ​នា​ពេល​កន្លង​ទៅ។ លោក​សង្កត់​ធ្ងន់​ថា កន្លង​ទៅ ពលរដ្ឋ​ដែល​លោក ឌិន ពុទ្ធី ធ្លាប់​ជួយ​រួម​មាន អ្នក​រត់​ម៉ូតូ​ឌុប កម្មករ​អូស​រទេះ បុគ្គលិក​កាស៊ីណូ និង​អាជីវករ​លក់​ដូរ​នៅ​ផ្សារ​រ៉ុងក្លឿ ប្រទេស​ថៃ ជាដើម៖ «អ៊ីចឹង​នេះ​ជា​សារ​មួយ​សម្រាប់​ដល់​ប្រព័ន្ធ​យុត្តិធម៌ ឲ្យ​គិត​មើល​អ្វី​ដែល​ជា​ទង្វើ​ល្អ​របស់​អង្គការ​ដែល​ធ្វើ​ឡើង​ដើម្បី​ផល​ប្រយោជន៍​មនុស្សធម៌ មិន​គួរ​ណា​ដាក់​ស្ថាន​ទម្ងន់​ទោស ឬ​ក៏​ដាក់​ទោស​ទណ្ឌ​ដល់​ពួក​គាត់​នោះ​ទេ»

លោក ស៊ុំ ច័ន្ទគា បន្ថែម​ថា តុលាការ​គួរ​តែ​ឲ្យ​ជន​ត្រូវ​ចោទ​បាន​នៅ​ក្រៅ​ឃុំ​បណ្ដោះអាសន្ន ហើយ​ធ្វើ​ការ​ស៊ើប​អង្កេត​រក​ការ​ពិត​ដោះស្រាយ​តាម​ក្រោយ។

សេចក្ដី​ប្រកាស​ព័ត៌មាន​របស់​ក្រសួង​មហាផ្ទៃ កន្លង​មក​បង្ហាញ​ថា កាល​ពី​ថ្ងៃ​ទី​២២ ខែ​ធ្នូ ឆ្នាំ​២០១៦ កន្លង​ទៅ លោក ឌិន ពុទ្ធី បាន​រោទ៍​ម៉ាស៊ីន​ឡាន ហើយ​បើក​បុក​នាយ​រង​ប៉ុស្តិ៍​នគរបាល​អន្តោប្រវេសន៍​ម្នាក់​នៅ​ច្រក​ទ្វារ​អន្តរជាតិ​ប៉ោយប៉ែត ធ្វើ​ឲ្យ​ដួល​បោក​ក្បាល​ទៅ​នឹង​ថ្នល់​សន្លប់​បាត់​ស្មារតី។ ចំណែក​តំណាង​អយ្យការ​អម​សាលា​ដំបូង​ខេត្ត​បន្ទាយមានជ័យ បាន​សម្រេច​បើក​ការ​ស៊ើប​អង្កេត​សួរ​ទៅ​លោក ឌិន ពុទ្ធី ពី​បទ​បង្ក​ហិង្សា​ដោយ​ចេតនា មាន​ស្ថាន​ទម្ងន់​ទោស។ ប៉ុន្តែ​សាក្សី និង​អ្នក​គាំទ្រ​លោក ឌិន ពុទ្ធី ជាច្រើន​នាក់​អះអាង​ថា ឡាន​របស់​លោក​មិន​បាន​បើក​បុក​មន្ត្រី​ប៉ូលិស​នោះ​ទេ។

កាល​ពី​ថ្ងៃ​ទី​២៩ ធ្នូ សាច់ញាតិ និង​អ្នក​គាំទ្រ​ប្រមាណ ៥០​នាក់ ធ្វើ​បាតុកម្ម​បិទ​ផ្លូវ​ច្រក​អន្តរជាតិ​ប៉ោយប៉ែត ម្ដង​រួច​មក​ហើយ ដើម្បី​ឲ្យ​តុលាការ​ទម្លាក់​ការ​ចោទ​ប្រកាន់​ទៅ​លើ​លោក ឌិន ពុទ្ធី។

ជន​ត្រូវ​ចោទ ត្រូវ​បាន​តុលាការ​ឃុំ​ខ្លួន​នៅ​ពន្ធនាគារ​ខេត្ត​បន្ទាយមានជ័យ នៅ​រសៀល​ថ្ងៃ​ទី​២៤ ធ្នូ រហូត​មក​ទល់​ពេល​នេះ មិន​ទាន់​ដោះលែង​នៅ​ឡើយ។ សាច់ញាតិ និង​អ្នក​គាំទ្រ​អះអាង​ថា ពួក​គាត់​នឹង​ដាក់​ពាក្យ​ស្នើសុំ​ទៅ​អាជ្ញាធរ​ខេត្ត ធ្វើ​បាតុកម្ម​តវ៉ា​ក្នុង​ពេល​ឆាប់ៗ​បន្ត​ទៀត ប្រសិន​បើ​តុលាការ​មិន​ផ្ដល់​យុត្តិធម៌​ជូន​ជន​ត្រូវ​ចោទ​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

sepo rann

ពី usa

why can not you guys post that video clips ? afraid ?

Jan 02, 2017 12:35 PM

គេហទំព័រ​ទាំងមូល