អាជ្ញាធរខេត្តកំពង់ចាម បញ្ជាក់ថា សមត្ថកិច្ចបានត្រៀមកម្លាំងជាច្រើនពាន់នាក់ ដើម្បីរក្សាសន្តិសុខសុវត្ថិភាពជូនប្រជាពលរដ្ឋនាឱកាសបុណ្យចូលឆ្នាំប្រពៃណីជាតិ។ អាជ្ញាធរលើកឡើងថា សមត្ថកិច្ចនឹងខិតខំធ្វើយ៉ាងណារក្សាសុវត្ថិភាពជូនពលរដ្ឋឲ្យបានល្អប្រសើរ រហូតទទួលបានការលើកសរសើរពីសំណាក់ពលរដ្ឋទូទៅ ឬទទួលបានជ័យលាភីពីថ្នាក់លើថែមទៀតផង។
ស្នងការនគរបាលខេត្តកំពង់ចាម លោក បែន រ័ត្ន មានប្រសាសន៍នៅថ្ងៃទី១៣ មេសា ថា អាជ្ញាធរខេត្ត បានតៀមកងកម្លាំងប្រមាណ ២ពាន់នាក់ ដើម្បីរៀបចំសណ្ដាប់ធ្នាប់ សន្តិសុខ ព្រមទាំងសម្របសម្រួលចរាចរណ៍ឲ្យបានប្រសើរនៅក្នុងឱកាសបុណ្យចូលឆ្នាំ ដែលមានរយៈពេល ៤ថ្ងៃនេះ។ លោកបន្តថា អាជ្ញាធរបានត្រៀមកម្លាំងដាក់នៅតំបន់គោលដៅសំខាន់ៗ ដូចជានៅតាមទីផ្សារ រមណីយដ្ឋាន និងតាមវត្តអារាម កំពង់ចម្លង ព្រមទាំងដាក់កម្លាំងចរាចរណ៍នៅជិត ២០គោលដៅ។
លោកបន្តថា មន្ត្រីចរាចរណ៍កាន់តែរឹតបន្តឹងការត្រួតពិនិត្យស្ថានភាពបើកបររបស់ប្រជាពលរដ្ឋបន្ថែមទៀត។ ស្នងការរូបនេះបញ្ជាក់ថា ការត្រួតពិនិត្យស្ថានភាពចរាចរណ៍ គឺមិនមែនមានគោលដៅចង់ផាកពិន័យយកប្រាក់ពីប្រជាពលរដ្ឋនោះទេ ប៉ុន្តែធ្វើយ៉ាងណាបង្កើនការប្រុងប្រយ័ត្នដល់ពួកគាត់ ជៀសវាងមានគ្រោះថ្នាក់កើតឡើងដោយយថាហេតុ ពីព្រោះគ្រោះថ្នាក់ចរាចរណ៍ ធ្វើឲ្យប៉ះពាល់ដល់ក្រុមគ្រួសារ និងសង្គមជាតិទាំងមូល៖ « ខ្ញុំប្ដេជ្ញាចិត្តថា នឹងប្រឹងប្រែងដើម្បីឲ្យទទួលបានជ័យលាភីក្នុងការការពារសន្តិសុខ សុវត្ថិភាព សណ្ដាប់ធ្នាប់នៅខេត្តកំពង់ចាម »។
ស្នងការដដែលឲ្យដឹងទៀតថា សមត្ថកិច្ចបានផ្សព្វផ្សាយប្រាប់ប្រជាពលរដ្ឋឲ្យប្រុងប្រយ័ត្នចំពោះបញ្ហាគ្រោះអគ្គីភ័យ ទាំងភ្លើងចង្ក្រាន ភ្លើងធូបទាន និងភ្លើងអគ្គិសនីផ្សេងៗ ជាដើម ក្នុងនោះសមត្ថកិច្ចបានត្រៀមឡានទឹក ៤ស្ថានីយទូទាំងខេត្ត ព្រមទាំងសហការជាមួយក្រុមហ៊ុនឯកជនលើបញ្ហានេះទៀតផង។ លោកបន្ថែមថា បើទោះបីជាមន្ត្រីនគរបាលទាំងអស់ ត្រូវត្រៀមលក្ខណៈការពារសន្តិសុខ សុវត្ថិភាពជូនពលរដ្ឋក៏ដោយ ប៉ុន្តែជាគោលការណ៍ ពួកគាត់ត្រូវប្ដូរវេនគ្នាដើម្បីឈប់សម្រាកទៅចូលរួមធ្វើបុណ្យទានជួបជុំប្រពន្ធកូន និងមានថវិកា ព្រមទាំងសម្ភារៈឧបត្ថម្ភខ្លះ ដើម្បីលើកទឹកចិត្តដល់ពួកគាត់។
អភិបាលស្តីទីខេត្តកំពង់ចាម លោក ជឹម លាវ មានប្រសាសន៍ថា អាជ្ញាធរខេត្តបានរៀបចំស្ថានភាពក្រុង និងនៅតាមកន្លែងកម្សាន្តមួយចំនួនឲ្យកាន់តែមានលក្ខណៈប្រសើរឡើង។ ជាមួយគ្នានេះ គ្រប់ស្ថាប័ន អង្គភាព ឬមន្ទីរ គេបានរៀបចំចងបដា ដោយមានអត្ថន័យអបអរពិធីបុណ្យចូលឆ្នាំថ្មី និងមានភ្លើងពណ៌ផ្សេងៗ ដើម្បីលំអសម្រស់ ជាដើម។ លោកសង្ឃឹមថា នឹងមានប្រជាពលរដ្ឋច្រើនមកលេងកម្សាន្តនៅក្នុងទឹកដីខេត្តមួយនេះនាឱកាសបុណ្យចូលឆ្នាំថ្មី៖ « នៅក្រុងកំពង់ចាម យើងជ្រើសរើសយកវត្តនគរក្នុង គឺប្រាសាទនគរបាជ័យ ដើម្បីលេងល្បែងកម្សាន្តនៅតំបន់នោះ »។
ខេត្តកំពង់ចាម មានវត្តអារាមជាង ៣០០វត្ត និងមានរមណីយដ្ឋានមួយចំនួន ដូចជារមណីយដ្ឋានវត្តនគរបាជ័យ ឬប្រសាទវត្តនគរ រមណីយដ្ឋានទឹកឆា ភ្នំប្រុសភ្នំស្រី វត្តហានជ័យ ឬភ្នំហានជ័យ។ ក្រៅពីនេះ ពលរដ្ឋអាចនាំគ្នាទៅលេងបឹងធំ ដែលជាបឹងធម្មជាតិ។ លើសពីនេះទៀត ពួកគាត់អាចនាំគ្នាទៅលេងរមណីយដ្ឋានកោះប៉ែន ឬទឹកដីកោះប៉ែន ដោយត្រូវឆ្លងស្ពានឫស្សីចេញពីក្រុងកំពង់ចាម ហើយពួកគាត់អាចគយគន់សម្រស់ទឹកដីកោះប៉ែន ព្រមទាំងដំណាំហូបផ្លែដែលមានជាច្រើននៅទីនោះ។
ក្រៅពីជួយការពារសន្តិសុខជូនពលរដ្ឋ ស្នងការនគរបាលខេត្ត អំពាវនាវឲ្យប្រជាពលរដ្ឋប្រុងប្រយ័ត្នបន្ថែមទៀត ទាំងការបើកបរ និងដើរលេងកម្សាន្ត ព្រមទាំងរាយការណ៍មកសមត្ថកិច្ចគ្រប់ពេល ខណៈឃើញមានមនុស្សគួរឲ្យសង្ស័យ ឬមានហេតុអាក្រក់បម្រុងនឹងកើតមានឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។