ស្ថាប័នចំនួន៣៩ រាប់តាំងពីអង្គការសង្គមស៊ីវិល រដ្ឋាភិបាល និងវិស័យឯកជន ជួបប្រជុំពិគ្រោះយោបល់គ្នាសាជាថ្មីម្ដងទៀតជាលើកទី៤ នៅថ្ងៃទី២៨ មេសា ដើម្បីរិះរកចំណុចផែនការរួមគ្នា ក្នុងការផ្ដល់ឱកាសដល់យុវជនក្រីក្រតាមរយៈការផ្ដល់ការបណ្ដុះបណ្ដាលជំនាញវិជ្ជាជីវៈ។
កម្មវិធីនេះ នឹងជួយរួមចំណែកពង្រឹងគុណភាពកម្លាំងពលកម្មជំនាញបន្ថែមទៀត ខណៈទីផ្សារការងារនៅប្រទេសកម្ពុជា កំពុងខ្វះធនធានមនុស្ស ពិសេសកម្មករជំនាញផ្នែកបច្ចេកទេស។
កង្វះជំនាញ ឬការធ្វើការខុសជំនាញ ជាហេតុផលចម្បងៗដែលនាំឲ្យកម្លាំងពលកម្មជំនាញនៅក្នុងទីផ្សារការងារកម្ពុជា នៅតែខ្វះខាត បើទោះបីជារបាយការណ៍បានបង្ហាញថា អត្រាភាពគ្មានការងារធ្វើ មិនទាន់ស្ថិតក្នុងកម្រិតប្រកាសអាសន្នក៏ដោយ។ បន្ថែមពីលើនេះ យុវជនដែលបោះបង់ការសិក្សាក្នុងកម្រិតវិទ្យាល័យ ឬយុវជនក្រីក្រ យុវជនជនបទ ដែលស្ថិតក្នុងវ័យពលកម្ម ក៏ជាក្រុមមនុស្សដែលខ្វះជំនាញ ចំពេលដែលទីផ្សារការងារត្រូវការពួកគេ។
ទីប្រឹក្សាកម្មវិធីប្រយុទ្ធក្រីក្ររបស់កុមារនៃអង្គការសង្គ្រោះកុមារ (Save the Children) អ្នកស្រី សម្បត្តិ រតនា ថ្លែងថា ការធ្វើការរួមគ្នាជាធ្លុងមួយនៃភាគីពាក់ព័ន្ធ មិនថាតែក្នុងចំណោមអង្គការសង្គមស៊ីវិល វិស័យឯកជន ឬរដ្ឋាភិបាលនោះទេ នឹងអាចដោះស្រាយបញ្ហាកង្វះជំនាញ និងអាចរួមគ្នាអភិវឌ្ឍយុវជននៅកម្ពុជា បានប្រសើរ។
អ្នកស្រីបន្ថែមទៀតថា ក្រុមការងារសម្របសម្រួលសម្រាប់ការបណ្ដុះបណ្ដាលជំនាញវិជ្ជាជីវៈ និងការងារដល់យុវជននេះ នឹងសហការគ្នាផ្ដល់ការអភិវឌ្ឍជំនាញការងារ និងផ្ដល់ព័ត៌មានស្ដីពីជំនាញការងារដល់យុវជន ពិសេសយុវជនដែលបោះបង់ការសិក្សា ឬអ្នកគ្មានឱកាស៖ «អ្វីដែលយើងមើលឃើញ ប្រមើលមើលពីវិស័យរបស់យើង គឺយើងអាចដោះស្រាយបញ្ហាយុវជនជាច្រើន ទាក់ទងនឹងបញ្ហាធ្វើការខុសជំនាញ ហើយនិងទីផ្សារការងារ តាមរយៈការបង្កើតឲ្យមានឱកាសទទួលបានព័ត៌មានជំនាញដែលត្រូវការ ហើយសម្រាប់មុខជំនាញហ្នឹងមួយ តើមុខតំណែងហ្នឹងមួយគាត់ត្រូវការជំនាញអ្វីខ្លះ?»។
ការសិក្សាមុខជំនាញបច្ចេកទេស និងវិជ្ជាជីវៈ ហាក់មិនត្រូវយុវជនផ្ដល់តម្លៃ ខណៈអ្នកជំនាញអះអាងថា ជំនាញបច្ចេកទេសនេះឯងដែលទីផ្សារការងារកំពុងត្រូវការ។
នាយករងនៃវិទ្យាស្ថានអភិវឌ្ឍន៍សហគ្រិនភាពកម្ពុជា-ឥណ្ឌា លោក ម៉ិល ផូ ជំរុញឲ្យយុវជនចាប់យកជំនាញបច្ចេកទេស៖ «ស្រុកខ្មែរសព្វថ្ងៃ ត្រូវការច្រើនណាស់ ទាក់ទងនឹងការបណ្ដុះបណ្ដាលវិជ្ជាជីវៈជំនាញខ្លីនេះឯង។ ទាក់ទងការតបណ្ដាញអគ្គិសនីតាមអគារ ការដំឡើងម៉ាស៊ីនត្រជាក់ ការបោះពុម្ពផ្សាយ គឺជាជំនាញមួយដែលកំពុងត្រូវការយ៉ាងខ្លាំងក្នុងទីផ្សារ។ ប្រសិនបើយុវជនដែលមិនមានការងារធ្វើ យុវជនដែលបោះបង់ការសិក្សា ក្រឡេកមើលការបណ្ដុះបណ្ដាលវិជ្ជាជីវៈ។ ក្នុងពេលដែលប្អូនសិក្សាវគ្គជំនាញនេះ សង្ឃឹមមុតមាំថា ងាយស្រួលរកការងារធ្វើ ហើយទីផ្សារកំពុងតែត្រូវការ»។
ទីប្រឹក្សាទីភ្នាក់ងារជាតិមុខរបរ និងការងារ កញ្ញា អ៊ូច ជាច័ន្ទមល្លិកា បញ្ជាក់ថា ក្រៅពីជំនាញបច្ចេកទេស លក្ខណៈសម្បត្តិអត្តចរិតរបស់យុវជន ក៏ជាឧបសគ្គដែលរារាំងដល់យុវជនពិបាកប្រកួតប្រជែងក្នុងទីផ្សារការងារ៖ «បុគ្គល ឥឡូវ ខ្វះនូវជំនាញបច្ចេកទេសមិនសូវពេញលេញ ហើយជំនាញទន់របស់ពួកគាត់ ទាក់ទងនឹងការប្រាស្រ័យទាក់ទង ការធ្វើការងារជាក្រុម ការដោះស្រាយបញ្ហាគឺនៅខ្សោយទៀត»។
ទិន្នន័យរបស់វិទ្យាស្ថានជាតិស្ថិតិ (NIS) បង្ហាញថា អត្រាគ្មានការងារធ្វើរបស់យុវជនមានតិចតួច ក្នុងអត្រា ២,៤ភាគរយ ក៏ប៉ុន្ដែអ្នកស្រី សម្បត្តិ រតនា គូសបញ្ជាក់ថា យុវជននៅខ្វះខាតជំនាញវិជ្ជាជីវៈ និងធ្វើការមិនត្រូវជំនាញ ដែលទាមទារឲ្យបង្កើនគុណភាពអប់រំ និងបណ្ដុះបណ្ដាលជំនាញបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។