អាជ្ញាធរមូលដ្ឋាន និងប្រជាពលរដ្ឋរស់នៅជុំវិញចម្ការកៅស៊ូ ទំរីង រ៉ាប់បឺ (Tom Ring Rubber) នាស្រុកអន្លង់វែង ខេត្តឧត្តរមានជ័យ ឧស្សាហ៍មានការភ័យខ្លាច ដោយសារតែទាហាន១ក្រុមជាអ្នកការពារចម្ការកៅស៊ូទីនោះ តែងបង្កអំពើហិង្សា។ ក្រុមអ្នកភូមិបានអះអាងថា ជាច្រើនលើកមកហើយ ទាហាន១ក្រុមនៅក្នុងចម្ការកៅស៊ូ ទំរីង រ៉ាប់បឺ តែងប្រើអាវុធគំរាមកំហែងលើប្រជាពលរដ្ឋ ហើយគ្មានសមត្ថកិច្ចណាចេញមុខដោះស្រាយទេ។
ប្រជាពលរដ្ឋនៅភូមិអូរតាម៉េង នាឃុំអន្លង់វែង បានចោទប្រកាន់ទាហានខ្លះដែលការពារចម្ការកៅស៊ូ ទំរីង រ៉ាប់បឺ ថាបានប្រើហិង្សាវាយតប់លើរាងកាយ ហើយថែមទាំងយកអាវុធបាញ់មកលើពួកគេទៀតផង។
អ្នកភូមិអូរតាម៉េង ម្នាក់ គឺលោក នូ ធឿន។ លោកបានអះអាងកាលពីព្រឹកថ្ងៃអាទិត្យ ទី២៣ ខែមីនា ថា កាលពី៣ថ្ងៃមុន កូនប្រុសរបស់គាត់ឈ្មោះ ហុង វិចិត្រ អាយុ ២១ឆ្នាំ ត្រូវទាហាន ២នាក់ ដែលការពារចម្ការកៅស៊ូ ទំរីង រ៉ាប់បឺ ចាប់ខ្លួនវាយធ្វើបាប ព្រមទាំងយកកាំភ្លើងបាញ់ផង នៅពេលដែលកូនប្រុសរបស់គាត់រើបម្រះ ហើយព្យាយាមរត់គេចចេញពីការធ្វើទារុណកម្ម។
លោក នូ ធឿន៖ «កូនវាចេញពីធ្វើការពីក្នុងចម្ការដំឡូង លីផ្គាក់ លីពូថៅ ធុងទឹកកក។ ដើរមកក៏ជួបកាំភ្លើង ២ដើម គ្នា ២នាក់ មកពីកើតតាមដងផ្លូវក្រុមហ៊ុនហ្នឹង។ ដល់ក៏គេភ្ជង់ឱ្យទម្លាក់កាំបិតពូថៅ នៅពេលទម្លាក់កាំបិតពូថៅទៅ ក៏ស្រវាចាប់កូនខ្ញុំក្របួចកអាវ ច្របាច់កគ្នា រយះក ២-៣ដុំទៅ។ កូនខ្ញុំវារើរួច វារត់ទៅ! រត់បាញ់ធ្លុះមួកធ្លុះអី វាយ ២ស្វាយកាំភ្លើង។ ដល់ប្អូនខ្ញុំឈ្មោះ ឆេង ដូង នាំកូន ២នាក់រត់ទៅមើល ក៏បាញ់ប្អូនខ្ញុំ អ្នករត់មកសួរ ហើយនាំប្អូនខ្ញុំទៅឯផ្ទះ ក៏បាញ់ផ្អើលឯផ្ទះទៀតទៅ»។
ទោះយ៉ាងណា វិទ្យុអាស៊ីសេរី មិនអាចស្វែងរកការទាក់ទងអ្នកគ្រប់គ្រងក្រុមហ៊ុនចម្ការកៅស៊ូ ទំរីង រ៉ាប់បឺ ដើម្បីឆ្លើយតបចំពោះការចោទប្រកាន់នេះបានថាយ៉ាងណានៅឡើយ។
ចំណែកអាជ្ញាធរមូលដ្ឋានខ្លះបានបង្ហាញការមិនសប្បាយចិត្ត ចំពោះកងទាហានដែលការពារចម្ការកៅស៊ូនៅជិតភូមិរបស់ពួកគេនោះទេ។
មេភូមិអូរតាម៉េង លោក ញ៉ែម ប៊ុនចាន់ បានមានប្រសាសន៍ថា លោកបានដឹងរឿងរ៉ាវដែលទាហានការពារចម្ការកៅស៊ូ វាយធ្វើបាប និងបាញ់មកលើប្រជាពលរដ្ឋនោះ។ លោកមេភូមិបានបញ្ជាក់ថា លោកព្យាយាមបញ្ជូនព័ត៌មាននេះទៅអាជ្ញាធរថ្នាក់លើឱ្យជួយដោះស្រាយ ក៏ប៉ុន្តែការចាត់វិធានការហាក់មានភាពយឺតយ៉ាវ មិនស្របនឹងស្ថានការណ៍ទេ៖ «ឥឡូវនេះ ខ្ញុំបានធ្វើកំណត់ហេតុចូលក្នុងសាលាឃុំហើយ ហើយខ្ញុំឱ្យមន្ត្រីឃុំ និងប៉ូលិសហ្នឹង ឱ្យមកត្រួតពិនិត្យមើលកន្លែងកើតហេតុហ្នឹង ក៏ប៉ុន្តែមកដល់ពេលនេះហើយ មិនទាន់បានឃើញរៀបចំចេញមកទេ»។
អង្គការសិទ្ធិមនុស្សក្រៅរដ្ឋាភិបាល បានរកឃើញថា ក្នុងរយៈពេល ១សប្ដាហ៍នេះ អំពើហិង្សានៅក្នុងចម្ការកៅស៊ូ ទំរីង រ៉ាប់បឺ បានកើតមានចំនួន ២ករណីផ្សេងគ្នា។
អ្នកសម្របសម្រួលសមាគមការពារសិទ្ធិមនុស្សអាដហុក លោក ស្រី ណារ៉េន បានមានប្រសាសន៍ថា ជាច្រើនឆ្នាំមកហើយ បញ្ហាទំនាស់ដីធ្លីរវាងប្រជាពលរដ្ឋ និងក្រុមហ៊ុនចម្ការកៅស៊ូនៅតែកើតមាន ដោយសារតែកាលពីក្រុមហ៊ុនស្នើសុំដីសម្បទានសេដ្ឋកិច្ច គឺមានប៉ះពាល់ទៅលើដីភូមិ និងស្រែចម្ការមួយចំនួន។ រហូតមកដល់ពេលនេះ ការប៉ះពាល់ទាំងឡាយមិនទាន់បានដោះស្រាយឱ្យសមស្របនៅឡើយ។
លោក ស្រី ណារ៉េន បានបញ្ជាក់ថា កាលពីថ្ងៃទី១៧ ខែមីនា កន្លងទៅ បុរសចំណាស់ម្នាក់ឈ្មោះ ស៊ិន ស្ងួន អាយុ ៦៨ឆ្នាំ ជាអ្នកភូមិអូរតាម៉េង ក៏ត្រូវសមត្ថកិច្ចចាប់ខ្លួនដាក់ពន្ធនាគារ បន្ទាប់ពីគាត់បានកាប់កូនកៅស៊ូចំនួន ៣ដើម ក្នុងបំណងបញ្ចៀសភ្លើងព្រៃមិនឱ្យរាលឆេះដល់ផ្ទះរបស់គាត់។ លោក ស្រី ណារ៉េន បានចាត់ទុកសកម្មភាពរបស់ទាហានការពារចម្ការកៅស៊ូ ទំរីង រ៉ាប់បឺ ដែលប្រើកាំភ្លើងបាញ់គំរាមប្រជាពលរដ្ឋនោះថា ជាអំពើខុសច្បាប់។
ក្រុមអ្នកភូមិអូរតាម៉េង បានអះអាងថា ជាញឹកញាប់ ទាហាន ១ក្រុមដែលការពារចម្ការកៅស៊ូ ឧស្សាហ៍បាញ់បោះសេរី ដោយបង្កឱ្យប្រជាពលរដ្ឋភ័យខ្លាច និងភ្ញាក់ផ្អើល ក៏ប៉ុន្តែមិនដែលមានសមត្ថកិច្ចណាចេញមុខហាមឃាត់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។