ទណ្ឌិត សោម ឯក ដែលសាលាដំបូងរាជធានីភ្នំពេញ កាលពីខែកញ្ញា ឆ្នាំ២០១០ បានផ្ដន្ទាទោសឲ្យជាប់ពន្ធនាគារចំនួន ១៨ឆ្នាំ បានចេញពីពន្ធនាគារហើយនៅយប់ថ្ងៃទី៨ ខែតុលា ឆ្នាំ២០១៦។
ប្រភពមួយសុំមិនបញ្ជាក់ឈ្មោះដោយបារម្ភពីសុវត្ថិភាពផ្ទាល់ខ្លួន ប្រាប់អាស៊ីសេរីនៅថ្ងៃទី៩ តុលា ឲ្យដឹងថា លោក សោម ឯក បានរត់គេចពីពន្ធនាគារដោយសារមន្ត្រីពន្ធនាគារប៉េស្ស៊ី (PJ) ធ្វើទារុណកម្មខ្លាំងពេក។
ប្រភពនោះបញ្ជាក់ថា ប្រធានពន្ធនាគារប៉េស្ស៊ីគាបសង្កត់អ្នកទោស ធ្វើបាបអ្នកទោសផ្សេងទៀតដោយប្រើដំបងប៉ុនកដៃវ៉ៃខ្នងបែកឈាម ហើយឆក់ខ្សែភ្លើង ជាដើម។
ទោះបីជាយ៉ាងណា អគ្គនាយករងនៃអគ្គនាយកដ្ឋានពន្ធនាគារ លោក នុត សាវនា មិនអត្ថាធិប្បាយចំពោះព័ត៌មាននេះទេនៅថ្ងៃទី៩ តុលា។
លោក សោម ឯក ត្រូវតុលាការចោទប្រកាន់ថា ជាមេខ្លោងនៃចលនារណសិរ្សរួបរួមជាតិ រូបសញ្ញាក្បាលខ្លា ដែលបានបង្កៃគ្រឿងផ្ទុះកាលពីថ្ងៃទី២៩ ខែកក្កដា ឆ្នាំ២០០៧ នៅទីក្រុងភ្នំពេញ ដើម្បីបំផ្លាញស្តូបមិត្តភាពកម្ពុជា-វៀតណាម ប៉ុន្តែមិនបានសម្រេច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។