មន្ត្រីស្ថានទូតកូរ៉េខាងត្បូង ប្រចាំកម្ពុជា បានបដិសេធចំពោះការលើកឡើងថា ស្ថានទូតកូរ៉េខាងត្បូង មានពាក់ព័ន្ធនឹងការប្រើអំពើហិង្សារបស់កងកម្លាំងអាជ្ញាធរកម្ពុជា វាយបង្ក្រាបលើកម្មករ ដែលបណ្ដាលឲ្យមនុស្សយ៉ាងតិច ៤នាក់បាត់បង់ជីវិត និងច្រើននាក់ផ្សេងទៀតត្រូវបានចាប់ខ្លួន និងរងរបួស។
កាលពីពេលថ្មីៗនេះ បណ្ដាញសារព័ត៌មានរបស់អាមេរិក មួយឈ្មោះ ហ្គូបប៊ល ប៉ុស្តិ៍ (Global post) បានសរសេរថា កូរ៉េខាងត្បូង បានលេចមុខជាតួអង្គក្រោយឆាកក្នុងការបង្ក្រាបលើក្រុមកម្មករ។ ហ្គូបប៊ល ប៉ុស្តិ៍ បានសរសេរទៀតថា ស្ថានទូតកូរ៉េខាងត្បូង សារភាពថាបានធ្វើយុទ្ធនាការក្រោយឆាក ដើម្បីការពារផលប្រយោជន៍ពាណិជ្ជកម្មរបស់ប្រជាជនកូរ៉េខាងត្បូង។ សារព័ត៌មានដដែលបានកត់សម្គាល់ថា យុទ្ធនាការក្រោយឆាករបស់ស្ថានទូតកូរ៉េខាងត្បូង នេះ បានប្រែក្លាយជាមានការប្រើកម្លាំងយោធា ដើម្បីអនុវត្តវិធានការសន្តិសុខ។
នៅក្នុងលិខិតដែលបង្ហោះលើទំព័រហ្វេសប៊ុក (Facebook) ផ្លូវការរបស់ស្ថានទូតកូរ៉េខាងត្បូង នៅថ្ងៃទី៦ ខែមករា ឆ្នាំ២០១៤ ផ្ញើជូនពលរដ្ឋរបស់ខ្លួនដែលកំពុងរស់នៅលើទឹកដីកម្ពុជា ស្ថានទូតកូរ៉េខាងត្បូង បានបញ្ជាក់ថា ពួកគេបានផ្ញើលិខិតទៅឲ្យលោកនាយករដ្ឋមន្ត្រី ហ៊ុន សែន ទៅ លោក សម រង្ស៊ី ប្រធានគណបក្សសង្គ្រោះជាតិ ទៅក្រសួងមហាផ្ទៃ ទៅក្រសួងយុត្តិធម៌ និងទៅអគ្គស្នងការដ្ឋាននគរបាលជាតិ ក្នុងបំណងស្នើឲ្យស្ថាប័នពាក់ព័ន្ធទាំងអស់នេះ ធ្វើឲ្យស្ថានភាពមានភាពប្រក្រតីភាពឡើងវិញ ដើម្បីសម្រួលដល់ដំណើរការអាជីវកម្មរបស់ក្រុមហ៊ុនកូរ៉េខាងត្បូង និងដើម្បីស្នើឲ្យស្ថាប័នទាំងនេះយកចិត្តទុកដាក់អំពីសុវត្ថិភាពរបស់បុគ្គលិក និងក្រុមហ៊ុនកូរ៉េខាងត្បូង។
មន្ត្រីប្រឹក្សាយោបល់ស្ថានទូតកូរ៉េខាងត្បូង ប្រចាំកម្ពុជា លោក លី ហ្យុងជុង (Lee Hyung Jong) បានទទួលស្គាល់ថា ស្ថានទូតរបស់លោកបានជូនដំណឹងអំពីការព្រួយបារម្ភរបស់ពលរដ្ឋ និងអ្នកវិនិយោគរបស់ខ្លួន ទៅឲ្យរដ្ឋាភិបាលកម្ពុជា ពិតប្រាកដមែន។ លោកថា នេះជារឿងធម្មតារបស់ស្ថានទូតបរទេស។ នៅពេលដែលទទួលបានដំណឹងអំពីការបារម្ភផ្សេងៗរបស់ពលរដ្ឋរបស់ខ្លួន ស្ថានទូតត្រូវផ្តល់ដំណឹងនេះដល់រដ្ឋាភិបាលម្ចាស់ផ្ទះ ឲ្យបានជ្រាប។ តែលោកថា ស្ថានទូតកូរ៉េខាងត្បូង មិនបានផ្តល់យោបល់ឲ្យរដ្ឋាភិបាលកម្ពុជា ថាត្រូវចាត់វិធានការជាក់លាក់ណាមួយលើក្រុមបាតុករនោះឡើយ។
លោក លី ហ្យុងជុង ក៏បានអះអាងថា នៅពេលដែលស្ថានទូតកូរ៉េខាងត្បូង ស្នើឲ្យអាជ្ញាធរកម្ពុជា យកចិត្តទុកដាក់ពីការព្រួយបារម្ភរបស់ពលរដ្ឋ និងក្រុមហ៊ុនរបស់ខ្លួន ស្ថានទូតបានស្នើឲ្យយកចិត្តទុកដាក់លើក្រុមហ៊ុនកូរ៉េខាងត្បូងទូទៅ ដែលនៅក្នុងព្រះរាជាណាចក្រកម្ពុជា មិនបានស្នើឲ្យអាជ្ញាធរការពារ ឬយកចិត្តទុកលើក្រុមហ៊ុនជាក់លាក់ណាមួយនោះទេ។ ហើយលោកថា ការបង្ក្រាបដោយហិង្សារបស់យោធាឆត្រយោង៩១១ នៅរោងចក្រ យ៉ាក ជីន (Yak Jin) ដែលជាក្រុមហ៊ុនរបស់កូរ៉េខាងត្បូង ក្បែរតំបន់សេដ្ឋកិច្ចពិសេស កាលពីពេលថ្មីៗនោះ ពុំមានទំនាក់ទំនងនឹងការផ្តល់ព័ត៌មានរបស់ស្ថានទូតទៅរដ្ឋាភិបាលកម្ពុជា នោះទេ។
តែទោះជាយ៉ាងណាក៏ដោយ លោក លី ហ្យុងជុង បានអះអាងថា ក្រុមរបស់លោកបានទាក់ទងនឹងកងយោធាកម្ពុជា នៅថ្ងៃទី៤ ខែមករា មួយថ្ងៃក្រោយការបង្ក្រាបរបស់កងកម្លាំងអាជ្ញាធរលើកម្មករ នៅក្បែរសួនឧស្សាហកម្មកាណាឌីយ៉ា។ លោកថា គោលបំណងនៃជំនួបនោះ គឺដើម្បីឲ្យអាជ្ញាធរកម្ពុជា ជួយយកចិត្តទុកដាក់បន្ថែមទៀតដល់សុវត្ថិភាពរបស់ក្រុមហ៊ុនកូរ៉េខាងត្បូង មួយចំនួន ដែលឋិតនៅក្នុងសួនឧស្សាហកម្មកាណាឌីយ៉ា ហើយដែលម្ចាស់ក្រុមហ៊ុនទាំងនោះព្រួយបារម្ភខ្លាំងពីក្រុមហ៊ុនរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។