និស្សិតសាកលវិទ្យាល័យភូមិន្ទភ្នំពេញ ដាក់ញត្តិជូនក្រសួងអប់រំ យុវជន និងកីឡា និងវិទ្យាស្ថានជាតិអប់រំ ដើម្បីទាមទារដាក់បញ្ចូលមុខវិជ្ជាទស្សនវិជ្ជា ចូលទៅក្នុងកម្មវិធីបង្រៀនថ្នាក់វិទ្យាល័យ។ មន្ត្រីក្រសួងអប់រំ ព្រមទទួលយកញត្តិ និងសន្យាឆ្លើយតបក្រុមនិស្សិតនៅពេលក្រោយ។
យុវជន ឌី ដារ៉ូ តំណាងនិស្សិតទស្សនវិជ្ជា ឆ្នាំទី៣ នៃសាកលវិទ្យាល័យភូមិន្ទភ្នំពេញ ដែលយកញត្តិដាក់ជូនក្រសួងអប់រំ ឲ្យដឹងថា មន្ត្រីរដ្ឋបាលក្រសួងអប់រំ បានទទួលយកញត្តិពួកគេនៅព្រឹកថ្ងៃទី៤ ខែកក្កដា និងសន្យាឆ្លើយតបសំណូមពរនាពេលខាងមុខ។
តំណាងនិស្សិតរូបនេះបញ្ជាក់ថា គោលបំណងដាក់ញត្តិ គឺចង់ឲ្យក្រសួងអប់រំ ដាក់មុខវិជ្ជាទស្សនវិជ្ជា នៅដាច់ដោយឡែកពីមុខវិជ្ជាផ្សេងនៅក្នុងកម្មវិធីសិក្សាសិស្សថ្នាក់វិទ្យាល័យ៖ «អ្វីដែលពួកយើងទាមទារហ្នឹង គឺដាក់ទស្សនវិជ្ជាចូលទៅសិស្សវិទ្យាល័យ។ ភ្ជាប់ជាមួយហ្នឹងដែរ គឺអត់ឲ្យមុខវិជ្ជាដទៃក្រៅពីមុខវិជ្ជាទស្សនវិជ្ជាហ្នឹង ប្រឡងចូលទៅក្នុងមុខវិជ្ជា ដើម្បីទៅបង្ហាត់មុខវិជ្ជាទស្សនវិជ្ជា។ អត់ឲ្យមុខវិជ្ជាផ្សេង ឧទាហរណ៍ច្បាប់ ឬសង្គម ជាដើម ទៅប្រឡងចូលបង្ហាត់មុខវិជ្ជាទស្សនវិជ្ជា ពីព្រោះមូលដ្ឋានរបស់ទស្សនវិជ្ជាហ្នឹង មូលដ្ឋានគ្រឹះរបស់វា អ្នកទស្សនវិជ្ជាបានរៀន ប៉ុន្តែពួករៀនច្បាប់ និងសង្គមមួយចំនួនហ្នឹង គាត់អាចប្រឡងចូលដែរ ដែលធ្វើឲ្យពួកយើងពិបាកប្រណាំងប្រជែងការងារជាដើម»។
ក្នុងកម្មវិធីសិក្សានៅវិទ្យាល័យក្នុងពេលបច្ចុប្បន្ននេះ ពុំមានមុខវិជ្ជាទស្សនវិជ្ជាដាច់ដោយឡែកឡើយ គឺមានបញ្ជ្រាបបន្តិចបន្តួចចូលទៅក្នុងមុខវិជ្ជាសិក្សាសង្គម។
ទាក់ទិនបញ្ហានេះ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានសាទរចំពោះសំណើរបស់ក្រុមនិស្សិត ដោយលោកចាត់ទុកថា មុខវិជ្ជាទស្សនៈជាមុខវិជ្ជាដ៏មានសារសំខាន់សម្រាប់យុវជន ព្រោះបានបណ្ដុះគំនិតដល់យុវជនទូទៅឲ្យមានគំនិតស្នេហាជាតិ៖ «លើសពីហ្នឹងថែមទៀត ខ្ញុំចង់ឲ្យក្រសួងអប់រំ ហ្នឹង ត្រូវតែដំឡើងពិន្ទុទៅលើប្រវត្តិវិទ្យា ដូចជាទស្សនវិជ្ជាសព្វបែបយ៉ាងឲ្យស្មើទៅនឹងពិន្ទុមុខវិជ្ជាគណិតវិទ្យា ឬមុខវិជ្ជាខ្មែរ ដើម្បីឲ្យទាក់ទាញឲ្យសិស្សានុសិស្សយកចិត្តទុកដាក់រៀនសូត្រ នូវមុខវិជ្ជាទស្សនវិជ្ជា ព្រោះយើងគិតថា មុខវិជ្ជាហ្នឹងដើរតួនាទីសំខាន់ក្នុងការបង្កើត ឬបណ្ដុះនូវគំនិតស្នេហាជាតិ»។
យ៉ាងណាក៏ដោយ មិនទាន់មានចម្លើយពីថ្នាក់ដឹកនាំមន្ត្រីក្រសួងអប់រំ ទៅលើញត្តិរបស់តំណាងក្រុមនិស្សិតមកពីសាកលវិទ្យាល័យភ្នំពេញនៅឡើយទេ ប៉ុន្តែមន្ត្រីរដ្ឋបាលក្រសួងអប់រំ ដែលចេញទទួលយកញត្តិនិស្សិត បានសន្យាថា នឹងដាក់ញត្តិជូន លោក ហង្ស ជួនណារ៉ុន រដ្ឋមន្ត្រីក្រសួងអប់រំ ពិនិត្យ និងផ្តល់ចម្លើយពេលក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។