អ្នករត់តាក់ស៊ីដឹកអ្នកដំណើរនៅខេត្តបាត់ដំបង រិះគន់មន្ត្រីប៉ូលិសចរាចរណ៍ខេត្តនេះ ថាដាក់កុងត្រូលជជុះបង្កភាពអនាធិបតេយ្យតាមដងផ្លូវសំខាន់ៗក្រវាត់ក្រុង និងយកប្រាក់ពីរថយន្តដឹកអ្នកដំណើរ ធ្វើឲ្យប៉ះពាល់ដល់ប្រជាពលរដ្ឋ។ អ្នករត់តាក់ស៊ី អំពាវនាវឲ្យស្នងការនគរបាលខេត្តបាត់ដំបង បញ្ឈប់ប៉ូលិសចរាចរណ៍កុំឲ្យដាក់កុងត្រូលយកប្រាក់ពីរថយន្តដឹកអ្នកដំណើរដោយគ្មានសណ្ដាប់ធ្នាប់ទៀត។
អ្នករត់តាក់ស៊ីពីក្រុងបាត់ដំបង ទៅក្រុងប៉ោយប៉ែត ខេត្តបន្ទាយមានជ័យ សម្ដែងការមិនពេញចិត្តនឹងប៉ូលិសចរាចរណ៍នៅក្រុងបាត់ដំបង ដែលដាក់កុងត្រូលគាបសង្កត់យកប្រាក់ពីរថយន្តដឹកអ្នកដំណើរ ដោយមិនគិតទុក្ខលំបាករបស់ប្រជាពលរដ្ឋ។
ក្រុមអ្នករត់តាក់ស៊ី ថ្លែងនៅថ្ងៃទី៩ វិច្ឆិកា ថា ប៉ូលិសចរាចរណ៍ដាក់កុងត្រូលត្រួតពិនិត្យរថយន្តធ្វើដំណើរតាមដងផ្លូវក្រវាត់ក្រុងបាត់ដំបង យ៉ាងអនាធិបតេយ្យអស់ជាច្រើនឆ្នាំមកហើយ ដោយពុំបានសម្រួលចរាចរណ៍ដល់អ្នកធ្វើដំណើរទៅមកតាមផ្លូវពិតប្រាកដនោះទេ ប៉ុន្តែប៉ូលិសចរាចរណ៍បែរជាអង្គុយចាំយកប្រាក់ពីរថយន្តដឹកអ្នកដំណើរលើសចំណុះពី ៥ពាន់រៀល ទៅជាង ១ម៉ឺនរៀលទៅវិញ ជាពិសេសនៅចំណុចរង្វង់មូលព្រាបស រង្វង់មូលនាងរំសាយសក់ និងរង្វង់មូលយាយទេព ជាដើម៖ «ពេលខ្លះខ្ញុំដឹកអ្នកដំណើរប៉ូលិសទារលុយពីខ្ញុំ ១ម៉ឺន ២ពាន់រៀល ហើយលើកហេតុផលថាខ្ញុំដឹកមនុស្សលើសចំណុះ។ បើប៉ូលិសឈប់ដាក់កុងត្រូល ខ្ញុំដឹកអ្នកដំណើរបានសល់លុយខ្លះទៅដល់ផ្ទះ»។
វិទ្យុអាស៊ីសេរី ពុំអាចទាក់ទងប្រធានការិយាល័យប៉ូលិសចរាចរណ៍នៃស្នងការដ្ឋាននគរបាលខេត្តបាត់ដំបង គឺលោក សាទ គិមសាន ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី៩ វិច្ឆិកា ដោយទូរស័ព្ទរោទ៍តែពុំមានអ្នកទទួល។
ចំណែកឯអធិការនគរបាលក្រុងបាត់ដំបង លោក យឹម វិចិត្ត មានប្រសាសន៍ថា លោកពុំអាចបកស្រាយជុំវិញបញ្ហានេះបានទេ ពីព្រោះប៉ូលិសចរាចរណ៍ដែលបានដាក់ប៉ុស្តិ៍តាមដងផ្លូវក្រវាត់ក្រុងបាត់ដំបង នោះ ជាប៉ូលិសចរាចរណ៍នៃស្នងការដ្ឋាននគរបាលខេត្តបាត់ដំបង ហើយពុំមានពាក់ព័ន្ធនឹងប៉ូលិសអធិការក្រុងឡើយ៖ «បាទ! ទាល់តែលោកសួរទៅការិយាល័យប៉ូលិសចរាចរណ៍ស្នងការខេត្តបានគាត់ដឹង ពីព្រោះគាត់ជាអ្នកទទួលបន្ទុកជំរុញការអនុវត្តច្បាប់ចរាចរណ៍ និងការដាក់ប៉ុស្តិ៍ផាកពិន័យតាមដង»។
លោកនាយករដ្ឋមន្ត្រី ហ៊ុន សែន ធ្លាប់បានព្រមានចំពោះការដាក់កុងត្រូលជជុះនៅតាមដងផ្លូវ ដើម្បីយកលុយពីរថយន្តដឹកអ្នកដំណើរនេះ ក៏ប៉ុន្តែការព្រមាននេះ ហាក់បីដូចជាពុំមានប្រសិទ្ធភាពនៅឡើយ។
ទោះយ៉ាងនេះក្ដី មន្ត្រីស៊ើបអង្កេតនៃអង្គការលីកាដូ (LICADHO) ខេត្តបាត់ដំបង លោក ហេង សាយហុង មានប្រសាសន៍ថា ប៉ូលិសចរាចរណ៍ដាក់ប៉ុស្តិ៍ត្រួតពិនិត្យតាមដងផ្លូវចំណុចសំខាន់ៗក្នុងក្រុងបាត់ដំបង តែងយកលុយពីរថយន្តដឹកអ្នកដំណើរដោយគ្មានវិក្កយបត្រ ដែលផ្ទុយពីច្បាប់ចរាចរណ៍ ហើយបានបង្កផលលំបាកដល់ប្រជាពលរដ្ឋអស់ជាច្រើនឆ្នាំមកហើយ៖ «ព្រោះអ្វីដែលប៉ូលិសចរាចរណ៍អនុវត្តនោះ ធ្វើឡើងហាក់បីដូចលក្ខណៈជាមុខរបររកស៊ី គឺពុំមែនជាការអនុវត្តច្បាប់ ដើម្បីប្រយោជន៍សង្គមជាតិពិតប្រាកដនោះទេ»។
អ្នករត់តាក់ស៊ី និងអង្គការសង្គមស៊ីវិល នៅខេត្តបាត់ដំបង លើកឡើងថា ប៉ូលិសចរាចរណ៍ដាក់ប៉ុស្តិ៍ត្រួតពិនិត្យតាមដងផ្លូវក្នុងក្រុងបាត់ដំបង នោះ ភាគច្រើនមានចេតនាប្រព្រឹត្តអំពើពុករលួយ ដែលអាជ្ញាធរពាក់ព័ន្ធគួរចាត់វិធានការ ឬបញ្ឈប់កុំឲ្យប៉ូលិសបន្តសកម្មភាពនេះតទៅទៀត ដើម្បីសម្រួលដល់ការធ្វើដំណើររបស់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។