ការផ្ទុះអាវុធមួយបានកើតឡើងរវាងឈ្មួញឈើប្រណិតខុសច្បាប់ និងសមត្ថកិច្ច រួមជាមួយមន្ត្រីជំនាញ នៅព្រឹកថ្ងៃទី១២ កក្កដា នៅសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។ អាជ្ញាធរមិនទាន់អាចចាប់ជនល្មើសបានទេ ដោយសារឈ្មួញឈើនោះរត់គេចខ្លួនបាត់។
អង្គការក្រៅរដ្ឋាភិបាលយល់ថា គឺជារឿងអសមត្ថភាពរបស់រាជរដ្ឋាភិបាល ដែលនៅតែបណ្តោយឱ្យឈ្មួញឈើធំៗ បន្តរកស៊ីឈើខុសច្បាប់យ៉ាងគគ្រឹកគគ្រេង ហើយមិនអាចចាប់យកមកផ្ដន្ទាទោសបាន ដែលវាផ្ទុយទៅនឹងគោលនយោបាយកំណែទម្រង់ស៊ីជម្រៅរបស់ខ្លួនទៅវិញ។
អធិការនគរបាលក្រុងស្ទឹងសែន ខេត្តកំពង់ធំ លោក ញ៉ែម ឈុនលី មានប្រសាសន៍ថា ការផ្ទុះអាវុធជាច្រើនគ្រាប់នោះ គឺកើតឡើងរវាងឈ្មួញដឹកឈើគ្រញូង ជាមួយកងរាជអាវុធហត្ថខេត្ត និងមន្ត្រីជំនាញ ដោយមានការបញ្ជាផ្ទាល់ពីសំណាក់ព្រះរាជអាជ្ញារងអមសាលាដំបូងខេត្តកំពង់ធំ នៅព្រឹកថ្ងៃទី១២ កក្កដា។ លោកបន្តថា ខាងសមត្ថកិច្ច គឺនៅមិនទាន់អាចចាប់ជនល្មើសបានទេ ពីព្រោះក្រោយពេលជនល្មើសឈប់រថយន្តនៅក្នុងផ្ទះ ហើយយកកាំភ្លើងបាញ់មកសមត្ថកិច្ច រួចមកក៏គេរត់គេចខ្លួនចូលព្រៃបាត់ទៅ។
លោកបន្ថែមទៀតថា ខាងសមត្ថកិច្ចលោកមិនបានដឹងពីអត្តសញ្ញាណច្បាស់លាស់របស់ជនល្មើសនោះឡើយ មិនដឹងច្បាស់ថាឈើនោះដឹកចេញពីខេត្តណាមក ហើយរថយន្តម៉ាក ស៊ី.អ.វី (CRV) ដែលបើកចូលផ្ទះនៅសង្កាត់ស្រយ៉ូវ ជារបស់អ្នកណានោះដែរ ពីព្រោះវាស្ថិតនៅក្នុងការស៊ើបអង្កេតរបស់មន្ត្រីជំនាញ៖ «ដូចអត់ដឹងដូចអត់មានព័ត៌មាននេះ ខ្ញុំដូចក្តាប់អត់បាន ព្រោះមិនដឹងជាសមត្ថកិច្ចខាងមេព្រៃគេសាកសួរយ៉ាងម៉េច គេស្រាវជ្រាវយ៉ាងម៉េច យើងអត់ទាន់ដឹង ព្រោះអន្តរាគមន៍ហើយ យើងដកកម្លាំងមកវិញ សមត្ថកិច្ចគេអ្នកធ្វើតណា»។
លោកបញ្ជាក់ថា ជនល្មើសបានប្រើកាំភ្លើងខ្លីបាញ់រះមកសមត្ថកិច្ច ប៉ុន្តែមិនបានបណ្ដាលឱ្យសមត្ថកិច្ចណា ឬប្រជាពលរដ្ឋណារងគ្រោះថ្នាក់នោះទេ។
បើទោះបីជាសមត្ថកិច្ចមិនដឹងថា ឈ្មួញដឹកឈើប្រណិតនោះជានរណាក៏ដោយ ប៉ុន្តែត្រូវបានគេដឹងថា ឈ្មួញឈើនោះ គឺជាមន្ត្រីយោធាខេត្តព្រះវិហារ ដែលរកស៊ីឈើប្រណិតជាយូរមកហើយ ហើយតែងតែដឹកឈើប្រណិតឆ្លងកាត់ខេត្តកំពង់ធំ ជាញឹកញាប់។
នាយកអង្គការការពារធនធានធម្មជាតិ លោក ឈឹម សាវុធ មានប្រសាសន៍ថា ឈ្មួញឈើគ្រញូងដែលដឹកឆ្លងកាត់ខេត្តកំពង់ធំ ខ្លាំងជាងគេ គឺជាមន្ត្រីយោធាស្រុកជ័យសែន។ ចំណែកអ្នករកស៊ីឈើប្រណិតផ្សេងទៀតនៅខេត្តព្រះវិហារ និងសៀមរាប ដែរនោះ ភាគច្រើន គឺជាមន្ត្រីកងប្រដាប់អាវុធ ដែលមិនធ្លាប់មានសមត្ថកិច្ចណាហ៊ានចេញមុខបង្ក្រាបនោះឡើយ។ លោកបន្តថា ករណីនេះប្រសិនអាជ្ញាធរមានឆន្ទៈក្នុងការចាប់ជនល្មើសមែននោះ គឺជារឿងងាយស្រួយបំផុត ប៉ុន្តែពិបាកត្រង់ថា សមត្ថកិច្ចធ្វើឱ្យតែល្អមើលតែប៉ុណ្ណោះ។
លោក ឈឹម សាវុធ៖ «ដូចដែលខ្ញុំបញ្ជាក់ហើយបញ្ហាហ្នឹង គឺបើសិនជាមានចេតនាបង្ក្រាប គឺអត់អាចចរាចរណ៍ឈើបានយ៉ាងងាយស្រួលអ៊ីចឹងទេ ព្រោះយើងដឹងហើយ មុខសញ្ញាឈ្មួញរកស៊ីឈើក៏យើងដឹងច្បាស់ មុខសញ្ញាជនល្មើសដែលដឹកឈើឆ្លងកាត់ក៏យើងដឹងច្បាស់ទាំងអស់គ្នាហើយ ប៉ុន្តែកន្លងមកមិនដែលទេ គ្រាន់តែមានករណីមួយៗចេះតែចាប់ ឬបង្ក្រាប ហើយបង្ក្រាបទៀតសោត គឺបានតែឡាន បានតែឈើទេ មិនដែលមានចាប់ជនល្មើសបានទេ។ សូម្បីតែជនល្មើសដែលចាប់បានហើយក៏ដោះលែងទៅវិញដែរ។ អ៊ីចឹងបានជាខ្ញុំគិតថា ការអនុវត្តច្បាប់នៅក្នុងប្រទេសកម្ពុជា យើង គឺមានភាពធូរស្រាល និងទន់ខ្សោយបំផុតតែម្តង ដែលមិនអាចធ្វើការបង្ក្រាបបទល្មើសព្រៃឈើស្រុកខ្មែរឱ្យមានប្រសិទ្ធភាពបាន»។
ឈើប្រណិតដែលដឹកចេញពីខេត្តព្រះវិហារ សៀមរាប ឧត្តរមានជ័យ បន្ទាយមានជ័យ ឆ្លងកាត់ខេត្តកំពង់ធំ ចូលតាមផ្លូវកំពង់ថ្ម កាត់ខេត្តកំពង់ចាម គឺយកទៅលក់នៅប្រទេសវៀតណាម តាមច្រកព្រំដែនដូង៧ដើម ក្នុងស្រុកមេមត់ និងមានមួយចំណែកតូច បែងចែកទៅតាមដេប៉ូមួយចំនួននៅរាជធានីភ្នំពេញ។
លោក ឈឹម សាវុធ បន្ថែមទៀតថា ស្ទើរទូទាំងប្រទេសកម្ពុជា បទល្មើសព្រៃឈើ គឺកើតឡើងជាលក្ខណៈប្រព័ន្ធ តាំងពីថ្នាក់ក្រោម រហូតដល់ថ្នាក់លើ ដែលមានទាំងសែស្រឡាយមន្ត្រីធំៗក្នុងជួររាជរដ្ឋាភិបាលទៀតផង។ ការរៀបរចនាសម្ព័ន្ធរកស៊ីឈើប្រណិតនៅស្រុកខ្មែរនេះហើយ ទើបធ្វើឱ្យការកាប់បំផ្លាញព្រៃឈើនៅតែកើតមានឡើង រីឯវប្បធម៌និទ្ទណ្ឌភាពក៏រឹតតែរីកដុះដាលថែមទៀត ទើបធ្វើឱ្យលោកយល់ថា វាសនាឈើប្រណិតនៅក្នុងស្រុកខ្មែរ គឺមិនអាចគេចផុតពីឆ្នាំ២០១៤ នេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។