អ្នកទោសនៅក្នុងពន្ធនាគារខេត្តបន្ទាយមានជ័យ បានប្ដឹងថា មានការបង្ខំពីសំណាក់ឆ្មាំយាមគុក បង្ខំឲ្យអ្នកទោសជួលទូរស័ព្ទ ដើម្បីនិយាយទាក់ទងជាមួយគ្រួសារសាច់ញាតិ។ សម្រាប់អ្នកទោសណាមិនជួល ឬមិនមានលទ្ធភាពជួល ក៏ត្រូវទទួលរងការគាបសង្កត់តាមរូបភាពផ្សេងៗគ្នា។
នៅតាមពន្ធនាគារនានាក្នុងប្រទេសកម្ពុជា គេសង្កេតឃើញកើតមានបញ្ហាជាច្រើន។ ភាពមិនប្រក្រតីទាំងនោះ ភាគច្រើនមានជាប់ពាក់ព័ន្ធទៅនឹងការគ្រប់គ្រងរបស់ពន្ធនាគារ។ ជាក់ស្ដែង ករណីនេះកំពុងកើតមាននៅក្នុងពន្ធនាគារខេត្តបន្ទាយមានជ័យ។
ប្រភពពីទណ្ឌិតនៅទីនោះថ្លែងដោយមិនបញ្ចេញឈ្មោះថា មានអ្នកទោសជាច្រើននាក់រងការគាបសង្កត់ និងត្រូវគេធ្វើទុក្ខទោស ដោយសារមិនព្រមជួលសម្បកទូរស័ព្ទយកទៅដាក់ស៊ីម សម្រាប់ប្រើប្រាស់ទាក់ទងមកខាងក្រៅ។ អ្នកទោសខ្លះមិនជួល ហើយ អ្នកទោសខ្លះទៀតមិនមានលុយសម្រាប់ជួលតែម្ដង៖ «ក្នុងពន្ធនាគារខេត្តបន្ទាយមានជ័យ មានការគាបសង្កត់ពីមន្ត្រី ធ្លាក់មកមេអគារ គាបសង្កត់ចំពោះអ្នកទោសក្នុងមណ្ឌលកែប្រែ។ គាត់យកមកជួលឲ្យពួកខ្ញុំ បើកាលណាពួកខ្ញុំមិនមានលុយជួលគាត់ទេ គាត់ត្រូវរុះរើបន្ទប់ ហើយជួលក្នុង១យប់តម្លៃ ១ម៉ឺន ៥ពាន់រៀល។ ពេលថ្ងៃម៉ោងសូន្យ គឺជួលឲ្យទូរស័ព្ទមួយគ្រឿងតម្លៃ ១ម៉ឺនរៀល។ ពួកខ្ញុំអត់មានលុយជួល អ៊ីចឹងទៅគាត់មន្ត្រីមករុះរើបន្ទប់ឆែកឆេរ អ៊ីចឹងពួកខ្ញុំរស់នៅក្នុងនេះមានលុយណាជួលគាត់រាល់ថ្ងៃនោះ»។
ទាក់ទិនបញ្ហានេះ ប្រធានពន្ធនាគារខេត្តបន្ទាយមានជ័យ លោក ហ៊ិន សុផល បានបដិសេធថា នៅក្នុងពន្ធនាគារពុំមានករណីដូច្នេះទេ។ មេអគារទាំងនោះពុំមានសម្បកទូរស័ព្ទ និងពុំមានសិទ្ធិចូលទៅឆែកឆេរបន្ទប់របស់អ្នកទោសនោះឡើយ។ លោកថា កន្លងទៅនេះ ក្រសួងមហាផ្ទៃ និងក្រសួងទូរគមនាគមន៍ បានភ្ជាប់បណ្ដាញទូរស័ព្ទឲ្យអ្នកទោសទិញកាតទូរស័ព្ទ ប្រើប្រាស់ទាក់ទងទៅក្រុមគ្រួសាររបស់ខ្លួនមានគ្រប់បន្ទប់៖ «ខ្ញុំសុំជម្រាបមេអគារ អត់មានទេទូរស័ព្ទ ខាងក្រសួងមហាផ្ទៃ និងក្រសួងប្រៃសណីយ៍ និងទូរគមនាគមន៍ ចុះមកដាក់ទូរស័ព្ទគ្រប់បន្ទប់ទាំងអស់។ ពួកគាត់ចង់ទូរស័ព្ទ គាត់ទិញតែកាតទៅ សូកចូលក្នុងហ្នឹងទៅ គឺគាត់ទូរស័ព្ទបានហើយ។ មេអគារមិនមានណាទៅដាក់ជួលអី មិនមានទេ មិនមែនជាការពិតទេ។ ហើយមេអគារគ្មានសិទ្ធិណាទៅឆែកឆេរ ទៅយកវិទ្យុ បងប្អូនអត់មានទេ អានេះជាព័ត៌មានមួយអត់ពិតទេ»។
ប៉ុន្តែ ក្រុមអ្នកទោសអះអាងថា អ្នកដែលគេចាត់តាំងឲ្យធ្វើជាមេអគារ បានធ្វើសកម្មភាពយកសម្បកទូរស័ព្ទមួយថង់មានចំនួនពី ១០ ទៅ ២០គ្រឿង ទៅឲ្យអ្នកទោសយកទៅដាក់ស៊ីមផ្ទាល់ខ្លួនប្រើប្រាស់នៅតាមបន្ទប់ នៅចន្លោះម៉ោង ១២ថ្ងៃត្រង់ និងនៅពេលយប់។ ហើយពួកគេត្រូវបង់លុយចំនួន ១ម៉ឺន ទៅ ១ម៉ឺន ៥ពាន់រៀល សម្រាប់ថ្លៃប្រើប្រាស់សម្បកទូរស័ព្ទ៖ «លោកមេអគារហ្នឹង គាត់ទទួលពីក្រសួងមកដប់ម្ភៃគ្រឿងអ៊ីចឹងទៅ។ អ៊ីចឹង ពេលប៉ូលិសទៅបាត់ គាត់ថា អ្នកណាជួលទូរស័ព្ទយកទូរស័ព្ទហ្នឹងមកជួលឲ្យ ហើយយើងដាក់ស៊ីមខ្លួនយើងទៅ យើងនិយាយទៅណានិយាយទៅ ដឹងថាម៉ោង ៦ល្ងាច ជួលឲ្យខ្ញុំ។ ម៉ោង ៦ព្រឹក គាត់យកទៅវិញ មិនទុកដល់ម៉ោង ៧ព្រឹកទាន់ទេ។ និយាយឲ្យចំទៅ បើអ្នកទោសគ្មានលុយជួលគាត់ទេ រស់នៅមិនបានសុខ»។
ទាក់ទិនបញ្ហានេះ វិទ្យុអាស៊ីសេរី បានទូរស័ព្ទសុំការបញ្ជាក់បន្ថែមទៅ លោក គុយ ប៊ុនសន អគ្គនាយកពន្ធនាគារនៃក្រសួងមហាផ្ទៃ ហើយបានទទួលទូរស័ព្ទ តែក្រោយមកលោកបានចុចបិទដោយពុំបានការធ្វើអត្ថាធិប្បាយអ្វីនោះឡើយ។
មន្ត្រីអង្គការសិទ្ធិមនុស្សអាដហុក (Adhoc) ប្រចាំខេត្តបន្ទាយមានជ័យ លោក ស៊ុំ ច័ន្ទគា បានស្វាគមន៍ចំពោះរដ្ឋាភិបាលដែលបានភ្ជាប់ប្រព័ន្ធទូរស័ព្ទនៅតាមពន្ធនាគារសម្រាប់ឲ្យអ្នកទោសប្រើប្រាស់បាន។
យ៉ាងណាក៏ដោយ លោកថា ករណីមេអគារដែលជាអ្នកទោសដូចគ្នា ជួលសម្បកទូរស័ព្ទទៅអ្នកទោសនោះ កើតមានពិតប្រាកដមែន។ តាមការបញ្ជាក់របស់ក្រុមអ្នកទោស លោកថា សកម្មភាពជួលសម្បកទូរស័ព្ទទៅអ្នកទោស និងការគាបសង្កត់ចំពោះអ្នកទោសដែលមិនព្រមជួល ឬពុំមានលុយជួលនោះ គឺជារឿងខុសច្បាប់។ រូបភាពនេះ កំពុងបង្ហាញឲ្យឃើញក្រុមមេអគារ និងអនុរក្សពន្ធនាគារទាំងនោះ កំពុងនាំគ្នាធ្វើអាជីវកម្មទៅលើអ្នកទោស។ បញ្ហានេះ ទាមទារឲ្យអគ្គនាយកដ្ឋានពន្ធនាគារនៃក្រសួងមហាផ្ទៃ ពិនិត្យមើលឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។