ក្រុមអ្នករត់តាក់ស៊ីដឹកទំនិញនៅក្រុងប៉ោយប៉ែត ប្រមាណ ១០នាក់ នៅព្រឹកថ្ងៃទី២៦ មេសា នាំគ្នាយកឡានបិទផ្លូវជាតិលេខ៥ នៅសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ តវ៉ាទាមទារឲ្យមន្ត្រីគយ ប្រគល់រថយន្តមួយគ្រឿងដែលបានចាប់ ជូនពួកគេឲ្យបានឆាប់រហ័ស។ មន្ត្រីគយ បានឃាត់រថយន្តតាក់ស៊ីដឹកទំនិញមួយគ្រឿង ដោយចោទប្រកាន់ថា ដឹកទំនិញគេចពន្ធខុសច្បាប់។ ចំណែកអ្នករត់តាក់ស៊ី បដិសេធចំពោះការចោទប្រកាន់នេះ។
អ្នករត់តាក់ស៊ីនៅក្រុងប៉ោយប៉ែត លើកឡើងថា មន្ត្រីគយ និងរដ្ឋាករ ចាប់រថយន្តរបស់ពួកគេដោយគ្មានកំហុស និងធ្វើឲ្យខាតបង់ប្រាក់ចំណូលប្រចាំថ្ងៃ ព្រោះគ្មានរថយន្តដឹកទំនិញ។
តំណាងអ្នកតវ៉ាម្នាក់ គឺលោក ម៉ែន ភិរម្យ ឲ្យដឹងនៅថ្ងៃទី២៦ មេសា ថា មូលហេតុដែលពួកគេតវ៉ាបិទផ្លូវ ដោយសារមន្ត្រីគយ និងរដ្ឋាករក្រុងប៉ោយប៉ែត ចាប់រថយន្តរបស់ពួកគេមួយគ្រឿងកាលពីថ្ងៃទី២៤ មេសា ដោយចោទប្រកាន់ថា ដឹកទំនិញខុសច្បាប់។ លោកអះអាងថា ពួកគេដឹកទំនិញគ្រឿងប្រើប្រាស់ផ្នែកកសិកម្មពីក្រុងប៉ោយប៉ែត នៅខេត្តបន្ទាយមានជ័យ ដោយស្របច្បាប់ ហើយទទួលប្រាក់ឈ្នួលមួយជើងប្រមាណ ៧ម៉ឺនរៀល។ លោកថា មន្ត្រីគយចាប់រថយន្តរបស់ពួកគេ ដើម្បីទារប្រាក់ក្រៅផ្លូវការ យកប្រើប្រាស់ជាប្រយោជន៍របស់ក្រុមខ្លួន៖ « ខ្ញុំតវ៉ានេះ គ្រាន់តែចង់ឲ្យមន្ត្រីគយប្រគល់ឡានមកឲ្យខ្ញុំវិញ ដើម្បីយកទៅដឹកទំនិញដោះស្រាយជីវភាពគ្រួសារ »។
ឆ្លើយតបនឹងបញ្ហានេះ ប្រធានការិយាល័យគយ និងរដ្ឋាករក្រុងប៉ោយប៉ែត លោក ហ៊ុយ សុជាតិ មានប្រសាសន៍យ៉ាងខ្លីថា មូលហេតុដែលមន្ត្រីគយឃាត់រថយន្តតាក់ស៊ី ដោយសារដឹកទំនិញគេចពន្ធខុសច្បាប់៖ « ទំនិញទាំងនេះជាគ្រឿងបន្លាស់គ្រឿងយន្ត កសិកម្ម ហើយខ្ញុំបានបញ្ជូនទៅសាខាគយ និងរដ្ឋាករខេត្តអស់ហើយ។ ចំណែកការសម្រេចយ៉ាងណា ជារឿងរបស់គយសាខាខេត្ត »។
ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា ដែលបានចុះតាមដានដល់ទីកន្លែងផ្ទាល់មានប្រសាសន៍ថា មន្ត្រីគយចាប់រថយន្តដឹកទំនិញរបស់អ្នករត់តាក់ស៊ី គឺជារឿងគំនុំ ដោយសារក្រុមអ្នករត់តាក់ស៊ីមិនបានបង់ប្រាក់ជាប្រចាំខែទៅឲ្យមន្ត្រីគយ។ លោកពន្យល់ថា មន្ត្រីគយមិនគួរចាប់ទំនិញដែលដឹកនៅក្នុងស្រុកនោះទេ ប៉ុន្តែប្រសិនបើទំនិញខុសច្បាប់ គួរចាប់នៅតាមព្រំដែនច្រកចេញចូលជាការប្រសើរ៖ « បើនិយាយឲ្យចំ ទំនិញទាំងនេះបានឆ្លងកាត់ការត្រួតពិនិត្យនៅច្រកព្រំដែនអស់ទៅហើយ។ អ៊ីចឹងពួកគាត់គ្រាន់តែជាអ្នកស៊ីឈ្នួលដឹកយកប្រាក់កម្រៃពីគេទេ »។
ទោះបីជាយ៉ាងណា ការតវ៉ានេះបណ្ដាលឲ្យកកស្ទះចរាចរណ៍ផ្លូវជាតិលេខ៥ នៅភូមិកូនដំរី សង្កាត់និមិត្ត ប្រមាណ ១៥នាទី។ កម្លាំងសមត្ថកិច្ចក្រុងប៉ោយប៉ែត បានចុះទៅអូសរថយន្តចេញពីផ្លូវ ដើម្បីសម្រួលចរាចរណ៍ដល់អ្នកដំណើរឡើងវិញ។ ចំណែកក្រុមអ្នកតវ៉ា ពុំទទួលបានលទ្ធផលទេ ហើយពួកគេបញ្ជាក់ថា ប្រសិនបើមន្ត្រីគយមិនប្រគល់រថយន្តឲ្យវិញទេ ពួកគេនឹងតវ៉ាសាជាថ្មីទៀតនៅទីស្នាក់ការគយ និងរដ្ឋាករខេត្តបន្ទាយមានជ័យ នៅថ្ងៃទី២៧ ខែមេសា ឆ្នាំ២០១៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។