បុគ្គលិកក្រុមហ៊ុនម៉ៅការផលិតផ្ទាំងរូបភាពនិងរចនាម៉ូដមួយ ឈ្មោះ ទ្រូថាម អាស៊ី (Truetime Asia) មានទីតាំងនៅសង្កាត់ទំនប់ទឹក ខណ្ឌចំការមន រាជធានីភ្នំពេញ នាំគ្នាធ្វើកូដកម្មនៅមុខការិយាល័យរបស់ខ្លួន ដោយមិនចូលធ្វើការ នៅថ្ងៃទី៩ តុលា ដើម្បីទាមទារកុំឲ្យអ្នកគ្រប់គ្រងក្រុមហ៊ុនម្នាក់ ឈ្មោះ ញ៉ែម សុភៈ ចូលកន្លែងធ្វើការតាមកិច្ចព្រមព្រៀងគ្នារវាងបុគ្គលិកនិងនាយកក្រុមហ៊ុនកាលពីខែកក្កដា កន្លងទៅ។
បុគ្គលិកក្រុមហ៊ុន ទ្រូថាម អាស៊ី ជិត ១០០នាក់ កំពុងប្រមូលស្នាមមេដៃត្រៀមដាក់លិខិតប្តឹងទៅក្រសួងការងារនិងបណ្ដុះបណ្ដាលវិជ្ជាជីវៈ ដើម្បីឲ្យក្រសួងជួយអន្តរាគមន៍ចំពោះនាយកក្រុមហ៊ុនដែលរំលោភកិច្ចសន្យាជាមួយបុគ្គលិក ដោយបានទទួលយកអ្នកគ្រប់គ្រងចាស់ដែលធ្លាប់ប្រើអំពើហិង្សាលើបុគ្គលិកឲ្យចូលមកធ្វើការវិញ។
កញ្ញា អ៊ុំ ស្រីម៉ុច បុគ្គលិកម្នាក់ដែលឈរតវ៉ាឲ្យដឹងថា លោក ញ៉ែម សុភៈ ជាអ្នកគ្រប់គ្រងក្រុមហ៊ុនធ្លាប់ប្រើអំពើហិង្សាយកកាំភ្លើងគំរាមកំហែងបង្កឲ្យបុគ្គលិករងរបួស ព្រមទាំងប្រើសម្ដីមិនសមរម្យទៅលើបុគ្គលិក ហើយគាត់ត្រូវបានបុគ្គលិកតវ៉ាម្ដងរួចមកហើយ កាលពីថ្ងៃទី១៦ កក្កដា ដើម្បីទាមទារឲ្យនាយកក្រុមហ៊ុនដកសិទ្ធិជាអ្នកគ្រប់គ្រង និងមិនឲ្យគាត់ចូលកន្លែងធ្វើការបន្តទៀត។
កញ្ញាបន្តថា កាលណោះនាយកក្រុមហ៊ុនម្នាក់ជាជនជាតិអាល្លឺម៉ង់ សម្រេចដកសិទ្ធិលោក ញ៉ែម សុភៈ មិនឲ្យសម្រេចកិច្ចការនានារបស់ក្រុមហ៊ុនតទៅទៀត ហើយលោក ញ៉ែម សុភៈ ក៏មិនមានវត្តមាននៅក្នុងក្រុមហ៊ុនដែរ។ ប៉ុន្តែកាលពីថ្ងៃទី៨ តុលា ស្រាប់តែលោក ញ៉ែម សុភៈ ត្រឡប់មកធ្វើការវិញ ព្រមទាំងបានគំរាមកំហែងបុគ្គលិកធ្វើការវេនយប់ទៀត។
កញ្ញា អ៊ុំ ស្រីម៉ុច៖ «គាត់ថា គាត់ចូលមកនឹងកែទម្រង់នៅខាងក្នុងចោល ដែលពួកខ្ញុំទាមទារលើកមុនបានច្បាប់ ១៨ថ្ងៃមកវិញ ហើយនឹងបានលុបថែមម៉ោងនៅថ្ងៃអាទិត្យគុណ២ គឺកែឲ្យអស់វិញ។ មិនទាន់បានអីផង គាត់បញ្ចេញសកម្មភាពដើរមើលពួកខ្ញុំក្នុងលក្ខណៈគ្រឺតក្នុងចិត្ត គាត់ដើរបញ្ចេញឫកឲ្យពួកយើងឃើញថា គាត់មកលើកហ្នឹងមិនដូចមុនទេ គឺខ្លាំងជាងមុន»។
បុគ្គលិកម្នាក់ទៀត លោក ហ៊ុំ ចាន់សុវណ្ណាក់ ថ្លែងឲ្យដឹងស្រដៀងគ្នាដែរថា បុគ្គលិកទាំង ៣វេន ប្រមាណសរុបជិត ២០០នាក់ មិនពេញចិត្តនឹងវត្តមានរបស់លោក ញ៉ែម សុភៈ ទេ ហើយពួកគេនឹងធ្វើកូដកម្មមិនចូលធ្វើការតាមវេនរបស់ខ្លួននីមួយៗ រហូតដល់នាយកក្រុមហ៊ុនគោរពកិច្ចសន្យាកាល ពីខែកក្កដា កន្លងទៅ គឺមិនឲ្យលោក ញ៉ែម សុភៈ ចូលមកគ្រប់គ្រងនៅកន្លែងធ្វើការដូចដើម។
លោក ហ៊ុំ ចាន់សុវណ្ណាក់៖ «សូមតវ៉ាទៅម្ចាស់ក្រុមហ៊ុនហ្នឹង កុំឲ្យអ្នកគ្រប់គ្រងធ្វើការនៅក្រុមហ៊ុនទៀតទេ ព្រោះបានសន្យាជាមួយពួកខ្ញុំហើយថាអត់ឲ្យអ្នកគ្រប់គ្រងម្នាក់ហ្នឹងមកធ្វើការនៅក្រុមហ៊ុនហ្នឹងទៀតទេ ប៉ុន្តែបែរជាមានការពាក់ព័ន្ធនឹងក្រុមហ៊ុនហ្នឹង បុគ្គលិកជាច្រើនអត់ពេញចិត្តទេ»។
តាមការអះអាងរបស់បុគ្គលិកដែលតវ៉ានោះ បញ្ជាក់ថា ពួកគេគ្រោងដាក់លិខិតមួយប្ដឹងទៅក្រសួងការងារនិងបណ្ដុះបណ្ដាលវិជ្ជាជីវៈនៅថ្ងៃទី១០ តុលា ដើម្បីឲ្យជួយដោះស្រាយរឿងនេះ បន្ទាប់ពីខាងក្រុមហ៊ុនអះអាងថា នឹងមិនដកលោក ញ៉ែម សុភៈ ចេញពីការគ្រប់គ្រងក្រុមហ៊ុនតាមការស្នើសុំរបស់បុគ្គលិកទេ។
ជុំវិញការតវ៉ាប្រឆាំងនឹងអ្នកគ្រប់គ្រងនេះ លោក ញ៉ែម សុភៈ ជាអ្នកគ្រប់គ្រងបញ្ជាក់ថា វាជារឿងពិបាកនៅពេលដែលលោកជាអ្នកគ្រប់គ្រងក្រុមហ៊ុនមួយ ហើយមិនមានសិទ្ធិចូលមកក្នុងក្រុមហ៊ុន។ យ៉ាងណាលោកបញ្ជាក់ថា បុគ្គលិកដែលតវ៉ាមិនចូលធ្វើការគឺសន្មតថា ពួកគេបោះបង់ការងារដោយស្វ័យប្រវត្ត៖ «ខ្ញុំជានាយកក្រុមហ៊ុនបើកការរកស៊ី បើខ្ញុំមិនមកធ្វើការ ធ្វើម៉េចទៅ? ...ប្រសិនបើបុគ្គលិកណាមិនចូលសន្មតថា គាត់បោះបង់ការងារចោល»។
ប្រធានរដ្ឋបាលក្រុមហ៊ុន ទ្រូថាម អាស៊ី កញ្ញា ស្រេង ភក្តី បញ្ជាក់ថា នាយកធំរបស់ក្រុមហ៊ុនជាជនជាតិស្វីស សម្រេចផ្ដល់តួនាទី និងផ្ដល់ឱកាសឲ្យលោក ញ៉ែម សុភៈ ត្រឡប់មកធ្វើការវិញ។ ប៉ុន្តែប្រសិនបើលោក ញ៉ែម សុភៈ ប្រព្រឹត្តទង្វើអ្វីមិនសមរម្យទៀតនោះ ក្រុមហ៊ុននឹងចាត់វិធានការទៅលើបុគ្គលនេះ៖ «គឺគាត់ (នាយកធំ) ផ្ដល់ឱកាសឲ្យគាត់ជាលើកចុងក្រោយ តែបើក្នុងករណីគាត់ធ្វើខុសម្ដងទៀត គាត់គំរាមកំហែង គាត់ប្រើហិង្សានៅក្នុងក្រុមហ៊ុន នោះក្រុមហ៊ុននឹងមានវិធានការផ្សេងទៀត»។
ទោះបីមានការអះអាងបែបនេះក្តី ក៏បុគ្គលិកដែលធ្វើកូដកម្មអះអាងថា ពួកគេមិនចង់ធ្វើកូដកម្មទេ ប៉ុន្តែពេលដែលលោក ញ៉ែម សុភៈ ត្រឡប់ចូលមកធ្វើការនៅថ្ងៃដំបូង ក៏បានបង្ហាញឫកពាកោងកាច និងគំរាមកំហែងបុគ្គលិកដូចមុន ទើបពួកគេស្រុះស្រួលគ្នាចេញមកធ្វើកូដកម្មប្រឆាំងនឹងលោក ញ៉ែម សុភៈ ម្តងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។