ការចរចាដោះស្រាយវិវាទការងាររវាងបុគ្គលិកនិងក្រុមហ៊ុនទ្រូថាមអាស៊ីបរាជ័យ
2014.11.15
មន្ត្រីក្រសួងការងារ អាជ្ញាធរខណ្ឌចំការមន និងសហជីព បានចូលរួមសម្របសម្រួលនៅក្នុងការចរចាវិវាទ ដែលអូសបន្លាយជាង ១ខែទៅហើយរវាងបុគ្គលិក និងក្រុមហ៊ុនផលិតផ្ទាំងរូបភាព និងរចនាម៉ូត នៅថ្ងៃទី១៥ វិច្ឆិកា។
ប៉ុន្តែការចរចានេះបានបរាជ័យ ដោយសារភាគីក្រុមហ៊ុនប្រកាន់ជំហររបស់ខ្លួន មិនព្រមដកថ្នាក់ដឹកនាំចំនួន ៣នាក់តាមការទាមទាររបស់បុគ្គលិកឡើយ។
បុគ្គលិកក្រុមហ៊ុនផលិតផ្ទាំងរូបភាព និងរចនាម៉ូត ទ្រូថាម អាស៊ី (Truetime Asia) បានគំរាមដាក់ពាក្យប្ដឹងទៅតុលាការដើម្បីបញ្ចប់ជម្លោះ ដោយសារពួកគេអស់ជំនឿលើនីតិវិធីដែលអន្តរាគមន៍ដោយក្រុមប្រឹក្សាអាជ្ញាកណ្ដាល និងក្រសួងការងារ។
តំណាងបុគ្គលិក លោក សួន ចំរើន ថ្លែងនៅថ្ងៃទី១៥ វិច្ឆិកា ថា ការទាមទាររបស់បុគ្គលិកចំនួន ១៥ចំណុច អាចនឹងបញ្ចប់ គឺស្ថិតនៅលើចំណុចសំខាន់មួយ គឺស្នើឲ្យដកអ្នកគ្រប់គ្រងក្រុមហ៊ុន ៣នាក់ ដែលមានឈ្មោះ ញ៉ែម សុភៈ ញ៉ែម សុភា និង ទឹម ណារិន។ ប៉ុន្តែ ពួកគេសុខចិត្តស្នើដកតែ ២នាក់វិញ គឺ ញ៉ែម សុភា និង ទឹម ណារិន ដែលមានអត្តចរិតឆេវឆាវ ប្រើអំពើហិង្សា និងពាក្យសម្ដីប្រមាថមកលើបុគ្គលិក។ បើទោះជាយ៉ាងនេះក្ដី ភាគីក្រុមហ៊ុននៅតែមិនព្រមទេ ថែមទាំងឲ្យពួកគេចូលធ្វើការវិញ និងធ្វើកិច្ចសន្យាថាឈប់ធ្វើកូដកម្ម។
លោក សួន ចំរើន បញ្ជាក់ថា លោកមិនយល់ចំពោះចំណាត់ការរបស់ក្រសួងការងារ និងក្រុមប្រឹក្សាអាជ្ញាកណ្ដាលនាពេលកន្លងមក បើទោះជាក្រុមហ៊ុននេះមិនបានអនុវត្តតាម៖ «ការចរចានៅក្រសួងការងារពីមុនហ្នឹង វាអត់សះជាទេ វាជាជំហានដែលយើងធ្លាប់ដើររួចហើយ ចូលទៅអាជ្ញាកណ្ដាល អាជ្ញាកណ្ដាលលើក ៣នាក់ហ្នឹងមកនិយាយដដែល ប្រាកដជាបង្គាប់ឲ្យពួកខ្ញុំចូលដូចលើកមុនដដែល ចូលប្រាកដជារកវិធីដើម្បីបិទសំណុំរឿងដូចកាលលើកទី១ដែរ។ វាជារឿងដដែលៗ អ៊ីចឹងប្រហែលជាពួកខ្ញុំមានគម្រោងដាក់ទៅខាងតុលាការ ឬក៏ខាងណាពាក់ព័ន្ធធំជាងហ្នឹងល្អជាង»។
ការលើកឡើងនេះ បន្ទាប់ពីបើកការចរចារកដំណោះស្រាយ តែបរាជ័យ។ កិច្ចចរចាមានភាគីក្រុមហ៊ុន តំណាងបុគ្គលិក សហជីព អាជ្ញាធរមូលដ្ឋាន ហើយមន្ត្រីក្រសួងការងារខាងដោះស្រាយវិវាទ មកបង្ហាញខ្លួនតែមួយភ្លែត។
ប្រធានសហព័ន្ធសហជីពសាមគ្គីភាព លោក ណៃ សុខវាសនា ថ្លែងថា ភាគីក្រុមហ៊ុនពុំមានឆន្ទៈក្នុងការដោះស្រាយវិវាទនេះទេ។ លោកថា កន្លងមក ក្រុមហ៊ុននេះតែងរំលោភលើកិច្ចសន្យាជាច្រើនលើក។ ក្រុមហ៊ុនបានជ្រើសរើសបុគ្គលិកថ្មីឲ្យចូលធ្វើការ នៅគ្រាដែលបុគ្គលិកជូនដំណឹងធ្វើកូដកម្មនៅថ្ងៃទី៩ តុលា។ ក្រុមហ៊ុនបានរំលោភសេចក្ដីបង្គាប់របស់ក្រុមប្រឹក្សាអាជ្ញាកណ្ដាល ដែលសម្រេចឲ្យអ្នកតវ៉ាចូលធ្វើការវិញ។ ជាថ្មីម្ដងទៀត ក្រុមហ៊ុនបានបំពានការសន្យានៅចំពោះមុខអាជ្ញាធរមូលដ្ឋាននៅថ្ងៃទី១៤ វិច្ឆិកា ថាឲ្យបុគ្គលិកចាស់ចូលធ្វើការ តែនឹងមិនអនុញ្ញាតឲ្យបុគ្គលិកថ្មីចូលធ្វើការ តែផ្ទុយទៅវិញ បុគ្គលិកថ្មីបានចូលធ្វើការពេញការិយាល័យទៅហើយ។ លោកថា លោកគាំទ្រចំពោះការដោះស្រាយវិវាទបុគ្គលតាមផ្លូវតុលាការ។ តែទោះជាយ៉ាងណា ទំនាស់ការងារ គឺក្រសួងការងារ ត្រូវតែដោះស្រាយ។
លោក ណៃ សុខវាសនា៖ «ចំពោះខ្ញុំរៀបចំហើយឯកសារ ខ្ញុំនឹងដាក់លិខិតជាផ្លូវការរៀបចំជាមួយបងប្អូនយើង ដើម្បីស្នើទៅឯកឧត្ដមរដ្ឋមន្ត្រីក្រសួងការងារ ដើម្បីគាត់ចាត់វិធានការ ក៏ដូចជាអាជ្ញាធរមូលដ្ឋាន ក៏ដូចជាគណៈបញ្ជាការឯកភាពខណ្ឌចំការមន ធ្វើម៉េចឲ្យគាត់ចុះមកជួយផ្សះផ្សាវិវាទនេះឲ្យបានចប់»។
ឆ្លើយតបបញ្ហានេះ អគ្គនាយកក្រុមហ៊ុន ទ្រូថាម អាស៊ី លោក ញ៉ែម សុភៈ ជាអ្នកគ្រប់គ្រងម្នាក់ក្នុងចំណោម ៣នាក់ ដែលអ្នកតវ៉ាស្នើដក ហើយចូលចរចាដែរនោះថ្លែងថា ដើម្បីបានការសះជា បុគ្គលិកទាំងអស់ត្រូវចូលធ្វើការដោយគ្មានការដាក់លក្ខខណ្ឌណាមួយមកក្រុមហ៊ុននោះទេ៖ «តាមក្រុមហ៊ុនជ្រើសរើសបុគ្គលិកតាំងពីមិនទាន់មានបញ្ហាកើតឡើងធ្វើកូដកម្មមកម្ល៉េះ ព្រោះក្រុមហ៊ុនត្រូវការបន្ថែមបុគ្គលិកទៀត ដោយសារយើងដំឡើងទូកុំព្យូទ័រ ៣០គ្រឿងទៀត។ ដល់ចឹង យើងត្រូវការបុគ្គលិកប្រហែលជា ៩០នាក់បន្ថែមទៀតនៅក្នុង ៣វេន គម្រោងរបស់ក្រុមហ៊ុនពីមុនកើតហេតុធ្វើកូដកម្មម្ល៉េះ»។
ចំណែកអភិបាលរងខណ្ឌចំការមន លោក កែវ សំណាង មានប្រសាសន៍ថា ក្រសួងការងារ រួមទាំងលោកជាអាជ្ញាធរ នឹងធ្វើការស៊ើបអង្កេតលើបញ្ហានេះ មុននឹងហៅភាគីទាំងពីរជួបគ្នាដោះស្រាយម្ដងទៀត។
កាលពីព្រឹកថ្ងៃទី១៤ ខែវិច្ឆិកា អ្នកតវ៉ាបាននាំគ្នាបិទច្រកចូលទៅក្រុមហ៊ុន ដើម្បីរារាំងមិនអោយបុគ្គលិកដែលក្រុមហ៊ុនទើបជ្រើសរើសថ្មីចូលធ្វើការឡើយ ដោយពួកគេចាត់ទុកសកម្មភាពរបស់ក្រុមហ៊ុនថារំលោភច្បាប់ ពីព្រោះជ្រើសរើសអ្នកថ្មីចូលក្នុងពេលកំពុងមានវិវាទ។
ក្រុមហ៊ុនបានឲ្យប្រាក់មួយចំនួនទៅបុគ្គលិកតវ៉ា ដើម្បីឲ្យពួកគេឈប់ធ្វើការ ប៉ុន្តែតំណាង ៩នាក់ ក្រុមហ៊ុនមិនទូទាត់ប្រាក់ឲ្យឡើយ ទើបពួកគេនៅតែបន្តតវ៉ា៕