ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) ជឿជាក់ថា មូលនិធិក្រុមប្រឹក្សាអាជ្ញាកណ្ដាល នឹងបន្តលើកកម្ពស់សិទ្ធិបុគ្គលិក កម្មករ និងថៅកែ តាមរយៈការដោះស្រាយវិវាទការងារប្រកបដោយឯករាជ្យ តម្លាភាព និងអព្យាក្រឹត្យ ក្រោយទទួលអំណោយថវិការបស់ខ្លួនជាលើកទី២ នៅថ្ងៃទី៦ ខែសីហា។
ទន្ទឹមនឹងនេះ មូលនិធិក្រុមប្រឹក្សាអាជ្ញាកណ្ដាល សន្យាថា នឹងពង្រឹងការងាររបស់ខ្លួនឲ្យរឹតតែប្រសើរជាងមុន ខណៈឆ្នាំ២០១៤ និងឆ្នាំ២០១៥ វិវាទការងារក្នុងវិស័យកាត់ដេរ កំពុងតែកើនឡើងខ្លាំងជាងឆ្នាំនានាពាក់ព័ន្ធនឹងបញ្ហាប្រាក់ខែ។
នាយិកាបេសកកម្មរបស់ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ គឺអ្នកស្រី រិបេខា ប៊្លែក (Rebecca Black) មានប្រសាសន៍ថា មូលនិធិក្រុមប្រឹក្សាអាជ្ញាកណ្ដាល គឺជាគំរូ និងជាទីសង្ឃឹមសម្រាប់ឲ្យកម្ពុជា ជំរុញសិទ្ធិរបស់បុគ្គលិកកម្មករ និងទំនាក់ទំនងល្អរវាងថៅកែ និងកម្មករ ដែលជាកត្តាគន្លឹះក្នុងការធានាស្ថិរភាព និងកំណើនលូតលាស់ជាបន្តនៃឧស្សាហកម្មរបស់ប្រទេសកម្ពុជា។
ការលើកឡើងនេះ គឺក្នុងពិធីប្រកាសជាផ្លូវការស្ដីពីជំនួយឧបត្ថម្ភពីទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ ជូនដល់មូលនិធិក្រុមប្រឹក្សាអាជ្ញាកណ្ដាលដែលជាម្ចាស់ផ្ទះ លើគម្រោង ៣ឆ្នាំស្ដីពី ការលើកកម្ពស់សិទ្ធិការងាររបស់ស្ត្រី និងបុរសនៅកម្ពុជា នៅថ្ងៃទី៦ ខែសីហា។
អ្នកស្រី រិបេខា ប៊្លែក មានប្រសាសន៍ថា តាមរយៈអំណោយថវិកា ៧០ម៉ឺនដុល្លារសហរដ្ឋអាមេរិកនេះ មូលនិធិក្រុមប្រឹក្សាអាជ្ញាកណ្ដាល នឹងបន្តជួយដោះស្រាយវិវាទក្នុងចំណោមក្រុមបុគ្គលិកកម្មករ និងថៅកែ មិនត្រឹមតែក្នុងវិស័យកាត់ដេរប៉ុណ្ណោះទេ តែថែមទាំងនៅក្នុងវិស័យដទៃជាច្រើនទៀតផងដែរ។
ឆ្លើយតបចំពោះបញ្ហានេះ នាយកប្រតិបត្តិស្តីទីមូលនិធិក្រុមប្រឹក្សាអាជ្ញាកណ្ដាល លោក ម៉ែន និម្មិត មានប្រសាសន៍ថា ស្ថាប័នពាក់កណ្ដាលតុលាការមួយនេះ នឹងរក្សានិរន្តរភាពក្នុងកិច្ចការលើកកម្ពស់សិទ្ធិការងារនៅកម្ពុជា តាមរយៈការដោះស្រាយវិវាទការងារប្រកបដោយឯករាជភាព តម្លាភាព និងអព្យាក្រឹតភាព៖ «គឺយើងពង្រឹងសមត្ថភាពក្រុមប្រឹក្សាអាជ្ញាកណ្ដាល ដោះស្រាយវិវាទដោយរក្សាគុណភាព និងខំធ្វើយ៉ាងម៉េចឲ្យភាគីបានយល់អំពីការរៀបចំខ្លួន មុននឹងចូលមកដោះស្រាយនៅក្រុមប្រឹក្សាអាជ្ញាកណ្ដាល។ ក្រៅពីនោះ យើងក៏បើកវគ្គបណ្តុះបណ្តាលដល់ភាគីកម្មករ និងនិយោជក ដើម្បីជួយឲ្យពួកគាត់មានសមត្ថភាពការពារវិវាទការងារនៅតាមរោងចក្រ»។
លោក ម៉ែន និម្មិត បន្តថា មូលនិធិក្រុមប្រឹក្សាអាជ្ញាកណ្ដាល គឺជាប្រព័ន្ធដោះស្រាយវិវាទការងារមួយ ដែលបានក្លាយជាបង្អែកយ៉ាងសំខាន់សម្រាប់សេដ្ឋកិច្ចកម្ពុជា។ តួយ៉ាងការទ្រទ្រង់សមត្ថភាពប្រកួតប្រជែងផ្នែកសេដ្ឋកិច្ចរបស់កម្ពុជា ការផ្តល់វេទិកាសម្រាប់ភាគីវិវាទ បានចរចាគ្នាដោយសន្តិវិធី ការគ្រប់គ្រងកូដកម្មសំដៅឲ្យមានតុល្យភាពរវាងស្ថិរភាពសង្គម និងការគោរពសិទ្ធិកូដកម្មរបស់កម្មករ ជាដើម។
នៅក្នុងប្រទេសកម្ពុជា បើនិយាយដល់ការអភិវឌ្ឍសេដ្ឋកិច្ចនេះ ត្រូវបានជំរុញជារួមដោយកំណើនក្នុងវិស័យកាត់ដេរ សំណង់ ទេសចរណ៍ និងកសិកម្ម។ ក្នុងចំណោមវិស័យសំខាន់ៗទាំងនេះ ផលិតផលសម្លៀកបំពាក់ពីវិស័យកាត់ដេរ នៅតែបន្តគ្របដណ្ដប់ការនាំចេញរបស់កម្ពុជា។
នាយិកាបេសកកម្មរបស់ទីភ្នាក់ងារសហរដ្ឋអាមេរិក អះអាងថា ប្រមាណ ៣៣% នៃការនាំចេញសរុបរបស់កម្ពុជា ត្រូវបាននាំចេញទៅកាន់សហរដ្ឋអាមេរិក ដែលផលិតផលចម្បងជាងគេ គឺសម្លៀកបំពាក់ និងស្បែកជើង។
យ៉ាងណាក៏ដោយ ជម្លោះរវាងបុគ្គលិកកម្មករ និងនិយោជក នៅតែជាឧបសគ្គសម្រាប់ការរីកលូតលាស់នៃឧស្សាហកម្មរបស់ប្រទេសកម្ពុជា។
នាយកប្រតិបត្តិស្តីទីនៃមូលនិធិក្រុមប្រឹក្សាអាជ្ញាកណ្ដាល បញ្ជាក់ថា នៅឆ្នាំ២០១៤ និងឆ្នាំ២០១៥ គឺជាឆ្នាំដែលមានរឿងក្តីច្រើនជាងឆ្នាំណាទាំងអស់៖ «ឆ្នាំ២០១៤ កន្លងទៅ ទទួលបានពាក្យបណ្ដឹងចំនួន ៣៦០ ជាង ហើយត្រឹម ៨ខែ ឆ្នាំ២០១៥ នេះ រឿងក្តីបានជិតដល់ ២០០ ហើយប្រភេទនៃវិវាទទាំងនោះ គឺពាក់ព័ន្ធនឹងប្រាក់ខែ ការបណ្ដេញកម្មករ ឬសហជីព និងពាក់ព័ន្ធនឹងផលប្រយោជន៍ផងដែរ»។
ក្រុមប្រឹក្សាអាជ្ញាកណ្ដាល គឺជាស្ថាប័នរបស់ជាតិ ត្រូវបានបង្កើតឡើងក្នុងឆ្នាំ២០០៣ ហើយនៅតែពឹងផ្អែកលើជំនួយរបស់បរទេស។ ស្ថាប័ននេះ ដើរតួចម្បងក្នុងការជួយភាគីកម្មករនិយោជិត និងនិយោជក ក្នុងការដោះស្រាយវិវាទការងាររួម ដែលរហូតមកទល់ពេលនេះមានសំណុំរឿងចំនួន ២.២៧៥ករណី ដែលក្នុងនោះវិវាទមកពីវិស័យផ្សេងៗ ដូចជា វិស័យវាយនភណ្ឌកាត់ដេរ និងស្បែកជើង សេវាកម្មដឹកជញ្ជូន សេវាកម្មសន្តិសុខ ក្រុមហ៊ុនផលិតភេសជ្ជៈ ក្រុមហ៊ុនប្រេងឥន្ធនៈ ក្រុមហ៊ុនផលិតស៊ីម៉ងត៍ ក្រុមហ៊ុនដំណាំកៅស៊ូ និងក្រុមហ៊ុនផលិតគ្រឿងអេឡិចត្រូនិក ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។