ប្រជាពលរដ្ឋរស់នៅខេត្តកំពង់ធំ ពិសេសម្ចាស់អាជីវកម្មបើកកន្លែងផ្ញើ ឬដកប្រាក់ ចង់ឲ្យអាជ្ញាធរពង្រឹងសន្តិសុខសុវត្ថិភាពដល់ការប្រកបមុខរបររបស់ពួកគាត់ឲ្យបានល្អប្រសើរ។ ការស្នើនេះ ក្រោយពេលមានហេតុការណ៍ប្លន់ប្រដាប់អាវុធទៅលើប្រជាពលរដ្ឋបើកអាជីវកម្មវីង (Wing) នៅស្រុកកំពង់ស្វាយ កាលពីយប់ថ្ងៃទី១៥ កុម្ភៈ ដោយក្រុមចោរប្លន់ប្រមូលប្រាក់មួយចំនួនធំ និងសម្ភារៈមានតម្លៃផ្សេងទៀត។
ក្រោយពេលមានហេតុការណ៍ប្លន់ប្រដាប់អាវុធទៅលើម្ចាស់អាជីវកម្មផ្ទេរ ឬដកប្រាក់នៅស្រុកកំពង់ស្វាយ ភ្លាម ធ្វើឲ្យម្ចាស់អាជីវកម្មផ្សេងទៀតមានក្តីបារម្ភចំពោះការប្រកបមុខរបររបស់ខ្លួន។ ម្ចាស់អាជីវកម្មខ្លះ ស្ទើរតែមិនចង់រកស៊ី ព្រោះខ្លាចសុវត្ថិភាព ប៉ុន្តែគ្មានជម្រើសផ្លាស់ប្ដូរមុខរបរអ្វីផ្សេង។
ម្ចាស់អាជីវកម្មវីង មួយកន្លែងនៅឃុំត្បែង ស្រុកកំពង់ស្វាយ លោក ឈិន ជ័យរាធហ៍ មានប្រសាសន៍ថា ការបារម្ភ គឺមានស្ទើរគ្រប់ពេលចំពោះមុខរបរមួយនេះ ពិសេសនៅពេលហេតុការណ៍ប្លន់ចេះតែកើតឡើងជាបន្តបន្ទាប់នៅតាមបណ្ដាខេត្តមួយចំនួន ព្រមទាំងខេត្តកំពង់ធំ ផង។ ឆ្លើយតបទៅនឹងការព្រួយបារម្ភ ព្រមទាំងដើម្បីជៀសវាងមានរឿងអាក្រក់ណាមួយកើតឡើង លោកត្រូវការប្រុងប្រយ័ត្នដោយខ្លួនឯងគ្រប់ពេលវេលា។ ម្យ៉ាង ដោយសារលោកមិនសូវមានជំនឿចិត្តលើសមត្ថកិច្ចស្រាប់ផង៖ « បាទ ! មិនសូវមានសង្ឃឹមតែម្តង បើថាឲ្យពួកគាត់ចេញកម្លាំងទៅស្ទាក់ឲ្យពុះពារជូនប្រជាពលរដ្ឋ គឺគ្មានសង្ឃឹមតែម្តង »។
លោកចង់ឲ្យសមត្ថកិច្ចពង្រឹងការយាមល្បាត និងយកចិត្តទុកដាក់លើផ្នែកសន្តិសុខឲ្យបានប្រសើរជាងនេះ ពីព្រោះបច្ចុប្បន្ន សមត្ថកិច្ចនៅតាមមូលដ្ឋាន បំពេញការងារ គឺមិនបានឆ្លើយតបទៅនឹងសេចក្តីត្រូវការរបស់ពលរដ្ឋឡើយ។
វិទ្យុអាស៊ីសេរី មិនអាចទាក់ទងស្នងការនគរបាលខេត្តកំពង់ធំ លោក ជូ សំអាន ដើម្បីឆ្លើយតបបញ្ហានេះបានទេនៅថ្ងៃទី១៦ កុម្ភៈ។
កាលពីដើមខែកុម្ភៈ អភិបាលខេត្ត និងជាគណៈមេបញ្ជាការខេត្តកំពង់ធំ លោក អ៊ុត សំអន មានប្រសាសន៍ថា អាជ្ញាធរនឹងខិតខំដោះស្រាយបញ្ហានៅសេសសល់ឲ្យបានសម្រេចនៅឆ្នាំ២០១៦។ បន្ថែមពីនេះ អាជ្ញាធរខេត្តត្រូវពង្រឹងសន្តិសុខសុវត្ថិភាពជូនប្រជាពលរដ្ឋ ដើម្បីឲ្យឆ្លើយតបទៅនឹងគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល។
កាលពីខែមីនា ឆ្នាំ២០១៥ អគ្គស្នងការនគរបាលជាតិ លោក នេត សាវឿន បានព្រមានដល់គ្រប់ស្នងការ រួមទាំងកងកម្លាំងទាំងអស់ អាចប្រឈមដកបុណ្យស័ក្តិ ឬតួនាទី ប្រសិនធ្វេសប្រហែសបណ្ដោយឲ្យមានករណីប្លន់ប្រដាប់អាវុធកើតឡើងនៅក្នុងដែនគ្រប់គ្រងរបស់ខ្លួន។
ជាមួយគ្នានេះ កាលពីខែធ្នូ ឆ្នាំ២០១៥ ករណីប្លន់ប្រដាប់អាវុធលើម្ចាស់អាជីវកម្មផ្ទេរប្រាក់ និងកន្លែងលក់គ្រឿងអលង្ការ កើតមាននៅខេត្តមួយចំនួន ដូចជា ខេត្តបាត់ដំបង ពោធិ៍សាត់ ព្រមទាំងខេត្តកណ្ដាល។ បញ្ហាប្លន់ប្រដាប់អាវុធនេះ រដ្ឋមន្ត្រីក្រសួងមហាផ្ទៃ លោក ស ខេង ធ្លាប់បានព្រមានដកស័ក្ដិស្នងការទាំងនេះ ប្រសិនបើមិនអាចបង្ក្រាប ឬចាប់ក្រុមចោរទាំងនោះបាន ប៉ុន្តែមកទល់ពេលនេះ បញ្ហាប្លន់ប្រដាប់អាវុធនៅតែបន្តកើតមាន ចំណែកលោកឧបនាយករដ្ឋមន្ត្រី ស ខេង មិនទាន់មានចំណាត់ការអ្វីនៅឡើយ។
ទោះបីជាអគ្គស្នងការនគរបាលជាតិ បានប្រកាស និងព្រមានយ៉ាងណាក៏ដោយ នៅដើមឆ្នាំ២០១៦ សកម្មភាពប្លន់ប្រដាប់អាវុធនៅតែកើតមានឡើងជាហូរហែ ពិសេសនៅរាជធានីភ្នំពេញតែម្តង។ ចំណែកករណីប្លន់កន្លែងផ្ទេរប្រាក់វីង ក៏នៅតែកើតមានតាមបណ្ដាខេត្តមួយចំនួនដដែល ដូចជានៅខេត្តបាត់ដំបង ប៉ៃលិន ព្រៃវែង ស្វាយរៀង និងចុងក្រោយកាលពីថ្ងៃទី១៥ កុម្ភៈ ករណីប្លន់ម្ចាស់អាជីវកម្មវីង នៅស្រុកកំពង់ស្វាយ ខេត្តកំពង់ធំ ជាដើម។
ទាក់ទងបញ្ហានេះ មន្ត្រីអង្កេតនៃអង្គការការពារសិទ្ធិមនុស្សលីកាដូ (LICADHO) ខេត្តកំពង់ធំ លោក ឈួម រុណ មើលឃើញថា បញ្ហាសន្តិសុខក្នុងសង្គមនាពេលបច្ចុប្បន្ន ហាក់ដើរផ្ទុយទៅនឹងគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល៖ « អានេះជាការបារម្ភរបស់សង្គមស៊ីវិល ព្រោះឥឡូវនេះមានការកក្រើកឡើងហើយ »។
លោកបន្តថា បញ្ហាអសន្តិសុខនៅក្នុងសង្គម គឺធ្វើឲ្យពលរដ្ឋ ពិសេសម្ចាស់អាជីវកម្មទាំងឡាយមានក្តីបារម្ភ។ ជាមួយគ្នានេះ លោកថា ដើម្បីឲ្យពលរដ្ឋស្ងប់ចិត្ត គឺអាជ្ញាធរត្រូវយកចិត្តទុកដាក់ពង្រឹងសន្តិសុខ និងបង្កើនសកម្មភាពចុះល្បាតនៅតាមមូលដ្ឋាន ឬទីប្រជុំជនបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។