ពលរដ្ឋ ២ភូមិ គឺភូមិព្រីង និងភូមិតាអាំ ក្នុងឃុំទួលសាលា ស្រុកបរសេដ្ឋ ខេត្តកំពង់ស្ពឺ តវ៉ាសុំបើកទំនប់ត្រពាំងកក់ ព្រោះទឹកលិចស្រូវកំពុងចេញផ្កាច្រើនហិកតារ។ ការតវ៉ានេះ បានធ្វើឡើងក្រោយពីអ្នកភូមិបានសុំឲ្យមេភូមិជួយអន្តរាគមន៍ តែមិនអាចជួយបាន។
បុរសឈ្មោះ ឆិល អ៊ី អាយុ ៥៥ឆ្នាំ រស់នៅភូមិព្រីង ថ្លែងថា ទំនប់ត្រពាំងកក់ ដែលនាំទឹកពីទំនប់ព្រែកត្នោត ត្រូវបានម្ចាស់ស្រែតាមឃុំនានាទប់ទំនប់យកទឹកដាក់ស្រែ។ ប៉ុន្តែ នៅឆ្នាំនេះ ទឹកឡើងខ្លាំង ព្រោះអំណោយទឹកភ្លៀងល្អ ស្រាប់តែមានអ្នកទប់បន្ថែម ដើម្បីចាប់ត្រី បានធ្វើឲ្យទឹកជន់ពន្លិចស្រូវគាត់កំពុងចេញផ្កា។ គាត់បានសុំឲ្យមេភូមិជួយដោះស្រាយ ប៉ុន្តែដោះមិនចេញ។ ស្រូវគាត់ទំនងជាចង់ខូច ទើបគាត់តវ៉ានេះ៖ «ប្រជាជនក្នុងភូមិហ្នឹង គេទប់កង់ៗព្រែកហ្នឹង គេបិទទំនប់លិចស្រូវ លិចអីអស់ហើយ។ កាលមុន គេជីកធ្វើប្រឡាយស្រណុកទឹកហូរ ប៉ុនឥឡូវ គេទប់ហើយលុបព្រែកហ្នឹងជិតអស់ទៅលិចស្រូវកល់លិចដង្ហើមស្រូវអស់ហើយ»។
មេភូមិតាអាំ លោក ណុប សឺន ថ្លែងថា ពលរដ្ឋ ២ភូមិ បានមកប្ដឹងអាជ្ញាធរសុំឲ្យជួយបើកផ្លូវទឹកប្រឡាយត្រពាំងកក់ ដែលមានអ្នកទប់ច្រើនកំណាត់ ដើម្បីទប់ទឹកស្រោចដំណាំ និងប្រើប្រាស់។ លោកថា អ្នកទប់ទឹកនោះមានខ្លះយកទឹកនោះប្រើ តែមានអ្នកខ្លះទៀតទប់ទឹកនោះចាប់ត្រី។ អ្នកទាំងនោះ មិនបានគិតដល់ស្រូវអ្នកនៅក្បែរកំពុងចេញផ្កានៅក្នុងស្រែទំនាប នាំឲ្យខូចនោះទេ។ លោកថា ស្រូវត្រាំក្នុងទឹកច្រើនថ្ងៃ លម្អងផ្កាស្រូវនឹងរោយអស់។
លោកយល់បញ្ហាតវ៉ារបស់អ្នកភូមិថាស្រូវនឹងខូច លោកបានស្នើសុំអាជ្ញាធរឃុំជួយដោះស្រាយបន្ត ប៉ុន្តែមិនទាន់មានចម្លើយទេ។ ឯស្រូវអ្នកភូមិច្រើនហិកតារ នៅតែត្រាំក្នុងទឹក ខ្លាចមានហិង្សាពីរឿងបិទបើកទឹកនោះ៖ «មានពលរដ្ឋហ្នឹង គាត់ទប់ទឹកហ្នឹង តម្កល់យកជាផលប្រយោជន៍របស់គាត់ ហើយទឹកហ្នឹងបាននៅកល់នៅតាមបឹងស្រែហ្នឹង លិចដង្ហើមស្រូវរបស់ពលរដ្ឋខ្ញុំហ្នឹង។ ការស្ដារប្រឡាយនេះវាយូរឆ្នាំហើយ តែបុគ្គលនោះមួយឆ្នាំគាត់បោះ១គីប ២គីប។ មួយឆ្នាំមកទៀត គាត់បោះ២គីបៗ តាមខណ្ឌៗរបស់ស្រែគាត់នោះ។ ឥឡូវព្រែកនោះឡើងខ្នងអណ្ដើក ទឹកលែងហូរចេញអស់ហើយហ្នឹង ហើយធ្វើឲ្យអ្នកមានស្រែខាងលើៗហ្នឹង គាត់ដោះស្រាយអត់ចេញ។ ឥឡូវហ្នឹងស្រូវកំពុងដង្ហើមខ្លះ ហើយអាស្រូវម្លិះហ្នឹងក៏ត្រៀមនឹងច្រូតទៀត ហើយទឹកនៅតែត្រាំអ៊ីចឹង បើមេឃភ្លៀងមកថែមទៀត បានន័យថា ស្រូវទាំងនោះនឹងចោលហើយ»។
មេឃុំត្រពាំងសាលា លោក មាស សាម៉ុន ថ្លែងថា កាលពីសប្ដាហ៍មុនមានទឹកជន់ប្រាកដមែន បានលិចស្រូវអ្នកស្រុក។ ប៉ុន្តែ បច្ចុប្បន្ន ទឹកបានស្រកអស់ហើយ ហើយស្រូវទាំងនោះមិនមានប៉ះពាល់ទេ៖ «ទឹកអត់មានទេអស់រលីងហើយ ស្រកអស់ហើយ ចុះមានអ្នកឆ្កួតចេះតែរាយការណ៍រកទឹកលិចឯណា រកទឹកប្រើមិនបានផងហ្នឹង។ ជន់តែមួយភ្លែតហ្នឹង»។
ជំទប់ទី១ ឃុំទួលសាលា លោក សុខ លីហួរ ថ្លែងថា គ្រួសារប៉ះពាល់ពីទឹកលិចពីទំនប់មានតែ ៥ ទៅ ៦គ្រួសារ ប៉ះស្រូវអ្នកស្រុក ៤ ទៅ ៥ហិកតារ។ លោកថា បញ្ហានេះអាជ្ញាធរឃុំកំពុងដោះស្រាយ។ លោកឲ្យដឹងដែរថា ក្នុងស្រុកបរសេដ្ឋ កម្រមានទឹកធ្វើស្រែណាស់ ទើបអ្នកស្រុកទប់ទឹកប្រើ។ ប៉ុន្តែឆ្នាំ២០១៣ មានទឹកភ្លៀងផង និងមានគេបើកទឹកបង្ហូរចេញពីទំនប់ខាងលើមកផង ទើបបណ្ដាលឲ្យលិចស្រូវមួយរយៈ។ លោកអះអាងថា ទោះយ៉ាងណា ស្រូវលិចទឹក ហើយទឹកឆាប់ស្រកបែបនេះ នាំឲ្យស្រូវល្អទៅវិញទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។