ពលរដ្ឋរស់នៅភូមិព្រែកថ្មី មួយចំនួន បារម្ភថាដីភូមិរបស់គាត់អាចនឹងបាក់ធ្លាក់ចូលក្នុងទន្លេនៅពេលឆាប់ៗខាងមុខ បើសិនជាឈ្មួញនៅតែបន្តបូមខ្សាច់មិនឈប់មិនឈរនោះ។
ពលរដ្ឋរស់នៅភូមិព្រែកថ្មី លោក ស៊ឹម មុន្នី នៅថ្ងៃទី២ ខែវិច្ឆិកា ឲ្យដឹងថា មានកប៉ាល់បូមខ្សាច់ជាង ១០គ្រឿង ត្រូវបានឈ្មួញដាក់ពង្រាយតាមបណ្តោយទន្លេក្នុងឃុំព្រែកអញ្ចាញ នាំឲ្យពលរដ្ឋបារម្ភខ្លាចបាក់ដីច្រាំងទន្លេ។ លោកបន្តថា ពលរដ្ឋមិនដឹងថា តើត្រូវធ្វើយ៉ាងម៉េច ទើបអាចទទួលព័ត៌មានពីក្រុមហ៊ុនបូមខ្សាច់ទាំងនេះឡើយ ហើយអាជ្ញាធរពាក់ព័ន្ធតាំងពីភូមិដល់ស្រុក សុទ្ធតែឆ្លើយប្រាប់អ្នកភូមិថា ពួកគាត់មិនដឹងថា កប៉ាល់បូមខ្សាច់នេះជារបស់អ្នកណា? បូមខ្សាច់រយៈពេលប៉ុន្មានទេ?
ចំណែកពលរដ្ឋម្នាក់ទៀតឈ្មោះ លោកស្រី សុខ វី ប្រាប់ថា ពលរដ្ឋនៅឃុំព្រែកអញ្ចាញ ធ្លាប់ស្នើទៅអាជ្ញាធរឲ្យបញ្ឈប់ការបូមខ្សាច់នេះជាច្រើនដងមកហើយ ប៉ុន្តែពេលស្រែកតវ៉ាខ្លាំង ក្រុមហ៊ុនក៏ផ្អាកមួយរយៈពេល ឈប់តវ៉ាក៏មានកប៉ាល់មកបូមខ្សាច់ច្រើនលើសដើម។ លោកស្រីបន្តថា ដីភូមិរបស់គាត់ដែលជាប់នឹងមាត់ទន្លេនោះ ក៏មានស្នាមប្រេះដោយកន្លែងខ្លះដែរ ហើយគាត់កំពុងព្រួយចិត្តថា បើដីភូមិបាក់ចូលក្នុងទន្លេបាត់ គ្រួសារគាត់មិនដឹងជាទៅរស់នៅទីណាឡើយ។
ឆ្លើយតបនឹងបញ្ហានេះ មេភូមិព្រែកថ្មី ឈ្មោះ ថាំង មានប្រសាសន៍ថា កប៉ាល់ឈ្មួញបូមខ្សាច់នៅកណ្ដាលទន្លេ ហើយវាមិនបណ្ដាលឲ្យបាក់ដីច្រាំងទន្លេទេ។ លោកបន្តថា ពលរដ្ឋមួយចំនួនមានក្តីបារម្ភ ព្រោះតែពួកគាត់មិនបានយល់ដឹង និងទទួលព័ត៌មានច្បាស់ពីអាជ្ញាធរ។ លោកបញ្ជាក់ថា អាជ្ញាធរមូលដ្ឋាននឹងមិនបណ្តោយឲ្យការបូមខ្សាច់ប៉ះពាល់ដល់ជីវភាពរស់នៅរបស់អ្នកភូមិឡើយ។
ទោះបែបណាក្តី លោកមេភូមិព្រែកថ្មី មិនបានដឹងថា កប៉ាល់ដែលបូមខ្សាច់នៅឃុំព្រែកអញ្ចាញ នេះ ជារបស់ឈ្មួញម្នាក់ណាពិតប្រាកដទេ។ កាលពីពាក់កណ្ដាលខែសីហា អាជ្ញាធររាជធានីភ្នំពេញ បានចាប់កប៉ាល់បូមខ្សាច់ប្រមាណ ៥០គ្រឿង ដោយបង្គាប់ឲ្យម្ចាស់កប៉ាល់ទាំងអស់បង្ហាញអាជ្ញាប័ណ្ណ ដើម្បីឲ្យអាជ្ញាធរត្រួតពិនិត្យ និងកំណត់ទីតាំងបូមខ្សាច់ឡើងវិញ។
ករណីបាក់ច្រាំងទន្លេដែលបណ្ដាលមកពីការបូមខ្សាច់នេះ កាលពីខែកក្កដា កន្លងទៅ ផ្ទះប្រជាពលរដ្ឋ ១ខ្នង ក្នុងភូមិព្រែករុន ឃុំព្រែកគយ ស្រុកស្អាង ខេត្តកណ្ដាល បានបាក់ពាក់កណ្ដាលធ្លាក់ទៅក្នុងទន្លេ និងបង្ខំចិត្ដរុះរើចេញភ្លាមៗ។ ទន្ទឹមនឹងនោះ ក៏មានលំនៅឋានពលរដ្ឋចំនួន ៥ខ្នងផ្សេងទៀត នៅតាមមាត់ច្រាំងទន្លេបាសាក់ ក្នុងផ្សារឈូងលៀប ស្ថិតក្នុងភូមិកោះគ ឃុំរកាខ្ពស់ ស្រុកស្អាង ក៏បានបង្ខំចិត្ដរុះរើចេញជាបន្ទាន់ ដោយសារការបាក់ច្រាំងទន្លេដល់មុខផ្ទះពួកគាត់ដែរ។ លោកនាយករដ្ឋមន្ត្រី ហ៊ុន សែន ក៏ធ្លាប់ប្រកាសបញ្ឈប់សកម្មភាពបូមខ្សាច់ ដែលនាំឲ្យបាក់ច្រាំងទន្លេ ប៉ុន្តែបម្រាមនោះមានប្រសិទ្ធភាពតែរយៈពេលខ្លីប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។