ប្រជាពលរដ្ឋជាច្រើនគ្រួសាររស់នៅតាមខ្សែបន្ទាត់ព្រំដែនកម្ពុជា-ថៃ ក្នុងស្រុកអូរជ្រៅ ខេត្តបន្ទាយមានជ័យ កំពុងខ្វះទឹកប្រើប្រាស់ប្រចាំថ្ងៃ។ អ្នកភូមិបានចំណាយថវិកាអស់ជាច្រើន ដើម្បីទិញទឹកប្រើប្រាស់ដែលគេដឹកតាមគោយន្តយកទៅលក់ឲ្យពួកគាត់។ អភិបាលស្រុកអូរជ្រៅ បញ្ជាក់ថា ពលរដ្ឋខ្វះទឹកប្រើប្រាស់មិនទាន់ដល់កម្រិតដែលត្រូវប្រកាសអាសន្ននៅឡើយ។
ប្រជាពលរដ្ឋនៅស្រុកអូរជ្រៅ លើកឡើងថា ពួកគាត់ខ្វះទឹកប្រើប្រាស់ជាង ២ខែហើយ នៅពុំទាន់មានស្ថាប័នណាជួយដោះស្រាយពួកគាត់បាននៅឡើយ។
ពលរដ្ឋម្នាក់រស់នៅភូមិថ្នល់បត់ ឃុំអូរបីជាន់ ស្រុកអូរជ្រៅ លោក ពេជ្រ វង្ស ឲ្យដឹងនៅថ្ងៃទី២០ កុម្ភៈ ថា គ្រួសារលោកទិញទឹកពីប្រជាពលរដ្ឋដែលដឹកលក់តាមគោយន្តតាំងពីខែធ្នូ។ លោកបន្ថែមថា ទឹកមួយធុងចំណុះជាង ១ពាន់លីត្រតម្លៃ ៣ម៉ឺនរៀល ហើយប្រើប្រាស់បានរយៈពេលប្រមាណ ១០ថ្ងៃ។ លោកសង្កត់ធ្ងន់ថា សព្វថ្ងៃគ្រួសាររបស់លោកខ្វល់ខ្វាយជាខ្លាំងចំពោះបញ្ហាខ្វះទឹកប្រើប្រាស់នេះ៖ « និយាយទៅការអត់ទឹកនេះ ខ្ញុំពិបាកខ្លាំងណាស់តាំងពីមុជទឹក បោកខោអាវ និងដាំបាយធ្វើម្ហូប ជាដើម គឺសុទ្ធតែត្រូវការទឹកទាំងអស់។ ប្រជាពលរដ្ឋទូទាំងឃុំអូរបីជាន់ អ្នកណាក៏ដូចអ្នកណាដែរ គ្មានទឹកប្រើប្រាស់ដូចគ្នា »។
ពលរដ្ឋនៅភូមិថ្នល់បត់ លោកស្រី សាមុត អេង ថ្លែងថា គ្រួសាររបស់លោកស្រីបានចំណាយថវិកាប្រមាណ ៥ម៉ឺនរៀលក្នុងមួយខែ ដើម្បីទិញទឹកប្រើប្រាស់ប្រចាំថ្ងៃ។ លោកស្រីបន្ថែមថា ស្រះទឹកនៅជុំវិញភូមិរបស់ពួកគាត់គ្មានទឹកមួយតំណក់ ដើម្បីទៅដងយកមកប្រើប្រាស់នោះទេ៖ « ពិបាកដោយសារគ្មានទឹកប្រើ។ ពេលខ្លះអ្នកបើកតែឡានដឹកទឹកយកមកលក់មិនគ្រប់សម្រាប់អ្នកទិញទេ ព្រោះគេដឹកទឹកមកឆ្ងាយពីភូមិកូនដំរី សង្កាត់និមិត្ត ឯណោះ »។
ទាក់ទងនឹងបញ្ហានេះ អភិបាលស្រុកអូរជ្រៅ លោក សាន ស៊ានហូ មានប្រសាសន៍ថា ប្រជាពលរដ្ឋនៅតំបន់ខ្លះខ្វះទឹកប្រើប្រាស់ប្រាកដមែន ក៏ប៉ុន្តែលោកថាមិនទាន់ដល់កម្រិតដែលត្រូវប្រកាសអាសន្ននោះទេ។ លោកអះអាងថា តំបន់ដែលខ្វះទឹក គឺពលរដ្ឋអាចលៃលកដងទឹកយកមកប្រើប្រាស់បាន ប្រសិនបើពួកគាត់មានគោយន្ត ឬមធ្យោបាយសម្រាប់ដឹកទឹក ដែលមានចម្ងាយប្រមាណ ៥គីឡូម៉ែត្រពីផ្ទះរបស់ពួកគាត់៖ « យើងមានអង្គការមួយចុះជួយពលរដ្ឋដោយដាក់ធុងទឹកត្រៀម។ ម្យ៉ាងទៀតប៉ុន្មានថ្ងៃមកនេះ យើងបានចុះពិនិត្យមើលឃើញថា មិនទាន់ដាច់ទឹកទាំងស្រុងទេ។ យើងបានដាក់ធុងទឹកនៅចំណុចណាដែលមានការខ្វះខាតទឹកខ្លាំង ហើយយើងត្រៀមដឹកទឹកដាក់ក្នុងធុងនោះ ដើម្បីឲ្យប្រជាពលរដ្ឋមកដងទឹកយកទៅប្រើប្រាស់ »។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តបន្ទាយមានជ័យ លោក ស៊ុំ ច័ន្ទគា លើកឡើងថា ប្រជាពលរដ្ឋដែលកំពុងខ្វះទឹកប្រើប្រាស់ក្នុងខេត្តមួយនេះ រួមមានស្រុកស្វាយចេក ស្រុកថ្មពួក និងស្រុកអូរជ្រៅ។ លោកស្នើឲ្យអាជ្ញាធរខេត្តបន្ទាយមានជ័យ ត្រូវមានវិធានការជួយផ្ដល់ទឹកដល់ពលរដ្ឋដែលកំពុងខ្វះខាតជាបន្ទាន់៖ « ព្រោះរដូវនេះចូលដល់ខែកុម្ភៈ ហើយ ដែលទឹករីងជាបណ្ដើរៗហើយ។ ចំណែកអាងស្តុកទឹកឃើញមានស្រុកអូរជ្រៅ មាននៅអូរខៃដន ក្រុងប៉ោយប៉ែត អី ប៉ុន្តែអាងនោះសម្រាប់តែក្រុមហ៊ុនរបស់លោក កុក អាន ចម្រោះធ្វើទឹកស្អាតប្រើប្រាស់ ដើម្បីប្រយោជន៍ខ្លួនគេប៉ុណ្ណោះ។ ចំណែកកន្លែងផ្សេង ដូចជាមិនទាន់បានប្រើប្រាស់នៅឡើយ »។
អាជ្ញាធរស្រុកអូរជ្រៅ ឲ្យដឹងថា នៅស្រុកជាប់ព្រំដែនថៃ មួយនេះ ពលរដ្ឋដែលទិញទឹកពីគេដឹកតាមគោយន្ត ហើយប្រឈមនឹងខ្វះខាតទឹកធ្ងន់ធ្ងរមានចំនួន ២៨ភូមិ នៅក្នុង ៥ឃុំ គឺឃុំអូរបីជាន់ ឃុំសឹង្ហ ឃុំកូប ឃុំសូភី និងឃុំចង្ហា ក៏ប៉ុន្តែលោកពុំបានបញ្ជាក់ចំនួនគ្រួសារមានប៉ុន្មាននោះទេ។ លោកអះអាងថា ប្រមាណ ២ខែខាងមុខទៀត នឹងត្រូវប្រកាសអាសន្ន ដែលពលរដ្ឋទាំងនោះខ្វះខាតទឹកធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។