មជ្ឈមណ្ឌលបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង ត្រៀមផ្ដល់ជំនាញចំនួន ៧មុខ ដល់ក្មេងកំព្រា ជនមាតុភូមិនិវត្តន៍ យោធិនរំសាយ និងជនទីទ័លក្រចំនួន ២០០នាក់ នៅចុងខែកក្កដា ឆ្នាំ២០១៥ នេះ។ ប៉ុន្តែពលរដ្ឋក្រីក្រខ្លះមិនសូវចាប់អារម្មណ៍លើមុខជំនាញបណ្ដុះបណ្ដាលទាំងនេះ ដោយបញ្ជាក់ថា គ្មានដើមទុនទិញសម្ភារៈ ឬបើកកន្លែងរកស៊ីក្រោយបញ្ចប់វគ្គ។
មជ្ឈមណ្ឌលបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង បានចេញសេចក្ដីជូនដំណឹងជ្រើសរើសសិក្ខាកាម ក្រោមគម្រោងកម្មវិធីអភិវឌ្ឍន៍ការអប់រំបណ្ដុះបណ្ដាលវិជ្ជាជីវៈ ឲ្យកាន់តែមានគុណភាព និងប្រសិទ្ធភាព ក្នុងការឆ្លើយតបតម្រូវការសេដ្ឋកិច្ចឆ្នាំ២០១៥។ សិក្ខាកាម នឹងត្រូវចំណាយរយៈពេល ៤ខែពេញ ដើម្បីសិក្សាចាប់ពីថ្ងៃច័ន្ទ ដល់ថ្ងៃសុក្រ។
ជំនាញទាំងនោះរួមមាន កាត់ដេរ អ៊ុតសក់ អគ្គិសនី ពេទ្យសត្វ កុំព្យូទ័រ ជួសជុលអេឡិចត្រូនិក និងជួសជុលម៉ាស៊ីនធុនតូច។ ប៉ុន្តែនៅក្រោយបញ្ចប់វគ្គសិក្សា មជ្ឈមណ្ឌលពុំមានលទ្ធភាពផ្ដល់សម្ភារៈ ឬថវិកាបើកមុខរបរឲ្យសិក្ខាកាមរកស៊ីនោះទេ ដោយពឹងផ្អែកលើការស្វែងរកការងារ ឬចំណាយដើមទុនដោយខ្លួនឯង។
បន្ថែមលើសេចក្ដីជូនដំណឹងនេះ ប្រធានមជ្ឈមណ្ឌលបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង លោក លី ចន្ទរិទ្ធ ថ្លែងនៅថ្ងៃទី៥ ខែកក្កដា ថា ចំណេះដឹង និងចំណេះធ្វើដែលមជ្ឈមណ្ឌលផ្ដល់ឲ្យសិក្ខាកាម អាចនឹងយកទៅប្រកបមុខរបរបាន ដោយអ្នកខ្លះក្រោយបញ្ចប់ការសិក្សា ទៅធ្វើការឲ្យគេ និងអ្នកខ្លះមានលទ្ធភាពបើកមុខរបរខ្លួនឯងតែម្ដង។ លោកថា ត្បិតវគ្គបណ្ដុះបណ្ដាលនេះពុំមានគុណភាពដូចថ្នាក់បរិញ្ញាបត្រ ឬបរិញ្ញាបត្ររង ដែលចំណាយពេលរាប់ឆ្នាំ តែវាអាចផ្ដល់ឱកាសការងារដល់ពលរដ្ឋមួយផ្នែកដែរ៖ «ខ្ញុំគិតថា ប្រជាពលរដ្ឋនៅក្នុងខេត្តកំពង់ឆ្នាំង ច្រើនចូលចិត្ដជំនាញខាងហ្នឹង ក៏ប៉ុន្ដែជំនាញខ្លះប្រជាពលរដ្ឋត្រូវការបន្តិចបន្តួច ដូចជាផ្នែកអេឡិចត្រូនិក លើកមុនឃើញចូលចិត្ត ឆ្នាំនេះដូចធាក់ថយ»។
កម្មការិនីកាត់ដេរនៅក្រុងកំពង់ឆ្នាំង កញ្ញា ស៊ឹម លីណា មានប្រសាសន៍ថា វគ្គបណ្ដុះបណ្ដាលលើជំនាញទាំងនេះ ពុំមានប្រយោជន៍ឡើយសម្រាប់កញ្ញា ដោយសារពេលរៀនចប់ គ្រួសារពុំមានលទ្ធភាពបើកតូប ឬទិញសម្ភារៈប្រកបមុខរបរឡើយ។ កញ្ញារំឭកថា កាលពីប្រឡងជាប់ថ្នាក់ទី១២ ក្នុងឆ្នាំ២០១៥ ភ្លាមៗ កញ្ញាចាប់អារម្មណ៍រៀនវគ្គបណ្ដុះបណ្ដាលខ្លីៗណាស់ តែមិនដែលមានឱកាសរៀនទាល់តែសោះ ដែលមកដល់ពេលនេះ ខ្លាចរៀនយកទៅបោះចោល ព្រោះគ្មានលទ្ធភាពបើកមុខរបរផ្ទាល់ខ្លួន៖ «យើងចង់រៀនឲ្យមានជំនាញ តែថាដល់យើងរៀនចេះហើយ អត់ថវិកាដើម្បីបើកទេ។ លោក ជិន ជេដ្ឋា៖ តែបើជាក់ស្ដែងចាប់អារម្មណ៍ទេ? ចាប់អារម្មណ៍តិចតួច តែឥឡូវលែងគិតហើយ បានធ្វើការងាររោងចក្រហើយ»។
មជ្ឈមណ្ឌលបណ្ដុះបណ្ដាលវិជ្ជាជីវៈនេះ បានផ្ដល់ជំនាញកាត់ដេរ អគ្គិសនី កសិកម្ម និងជួសជុលអេឡិចត្រូនិកជាដើម តាំងពីឆ្នាំ២០០១ ប៉ុន្តែគេមិនទាន់គ្រប់គ្រងតួលេខនៃសិក្ខាកាមដែលបានបណ្ដុះបណ្ដាលនៅឡើយទេ។
របាយការណ៍របស់វិទ្យាស្ថានជាតិស្ថិតិកម្ពុជា ដែលគេហទំព័រ ត្រេឌីង អេកូណូមិក (Trading Economic) យកមកចុះផ្សាយបង្ហាញថា អត្រាអត់ការងារធ្វើនៅកម្ពុជា បានកើនឡើង ០,៣០% នៅឆ្នាំ២០១៣ ដែលកាលពីឆ្នាំ២០១២ មានត្រឹម ០,១០%។ អត្រាអត់ការងារធ្វើជាមធ្យម ១,២៤% នៅចន្លោះឆ្នាំ១៩៩៤ ដល់ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។