កម្មករ​រោងចក្រ​អគ្គិសនី​ស្ទឹងហាវ​ស្នើ​បើក​ប្រាក់​ខែ​ឲ្យ​បាន​មុន​បោះឆ្នោត

កម្មករ​កំបោរ និង​បូក​ជញ្ជាំង​នៅ​រោងចក្រ​អគ្គិសនី​ដើរ​ដោយ​ថាមពល​ធ្យូង​ថ្ម នៅ​ស្រុក​ស្ទឹងហាវ មួយ​ចំនួន​សំណូមពរ​ឱ្យ​ខាង​ក្រុមហ៊ុន​បើក​ប្រាក់​ឈ្នួល​ពលកម្ម​ឱ្យ​បាន​លឿន ដើម្បី​ឱ្យ​ពួក​គាត់​មាន​ប្រាក់​ខ្លះ​ធ្វើ​សោហ៊ុយ​ទៅ​បោះឆ្នោត​នៅ​តាម​ស្រុក​កំណើត​រៀងៗ​ខ្លួន។ កម្មករ​ទាំង​នោះ​និយាយ​ថា ពួក​គាត់​មិន​ចង់​ខកខាន​ក្នុង​ការ​ទៅ​បោះឆ្នោត​នោះ​ទេ ព្រោះ​សន្លឹក​ឆ្នោត​របស់​ពួក​គាត់​អាច​ជួយ​ចូលរួម​អភិវឌ្ឍ​ប្រទេស​ជាតិ​បាន។
ដោយ សាន សែល
2013-07-13
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

កម្មករ​ធ្វើ​ការ​ផ្នែក​លាយ​កំបោរ និង​បូក​ជញ្ជាំង​នៅ​ក្រុមហ៊ុន​ចិន សាងសង់​រោងចក្រ​អគ្គិសនី ដើរ​ដោយ​ថាមពល​ធ្យូង​ថ្ម នៅ​ក្នុង​ស្រុក​ស្ទឹងហាវ ខេត្ត​ព្រះសីហនុ ស្នើ​ឱ្យ​អ្នក​ទទួល​ខុស​ត្រូវ​ម៉ៅការ​សំណង់ ជួយ​សម្រួល​បើក​ប្រាក់​ខែ​របស់​ពួក​គាត់​ឱ្យ​បាន​ទាន់​ពេល ព្រោះ​អី​ពួក​គាត់​ត្រូវ​ការ​ប្រាក់​ដើម្បី​ធ្វើ​ដំណើរ​ទៅ​បោះឆ្នោត​នៅ​ស្រុក​កំណើត នា​ពេល​ខាង​មុខ។

កម្មករ​ទាំង​នោះ​បាន​ត្អូញត្អែរ​ថា ការ​រស់នៅ​ប្រចាំ​ថ្ងៃ​របស់​គាត់​ពឹង​ផ្អែក​ទាំង​ស្រុង​ទៅ​លើ​ប្រាក់​ខែ​ដែល​បាន​ពី​ការ​ធ្វើ​ជាង​សំណង់​នេះ ហើយ​ប្រសិន​ណា​បើ​ខាង​ក្រុមហ៊ុន​មិន​បាន​បើក​ប្រាក់​ឱ្យ​បាន​មុន​ទេ ពួក​គាត់​គ្មាន​សោហ៊ុយ​គ្រប់គ្រាន់​ទៅ​បោះឆ្នោត​នោះ​ទេ។

ពួក​គាត់​ទាំង​នោះ​និយាយ​ថា ការ​បោះឆ្នោត​អាច​ជួយ​អភិវឌ្ឍ​ប្រទេស​ជាតិ​បាន ហើយ​គាត់​មិន​អាច​ខកខាន​នោះ​ទេ ព្រោះ​សន្លឹក​ឆ្នោត​របស់​គាត់​មួយ​សន្លឹក​អាច​ជួយ​ជ្រើស​រើស​មេ​ដឹកនាំ​ម្នាក់​ដែល​ពួក​គាត់​ស្រឡាញ់​ពេញ​ចិត្ត​បាន។ កម្មករ​ទាំង​នោះ​បន្ត​ថា ប្រសិន​បើ​គាត់​មិន​បាន​ទៅ​បោះឆ្នោត​វិញ​នោះ វា​ជា​រឿង​គួរ​ឱ្យ​សោកស្ដាយ ដោយ​ត្រូវ​រង់ចាំ​រយៈពេល​ប្រាំ​ឆ្នាំ​ទៀត៖ «ចង់​ឱ្យ​គាត់​បើក​លុយ​មុន​បោះឆ្នោត នឹង​អាង​ឱ្យ​ខ្ញុំ​បាន​ទៅ​បោះឆ្នោត។ សំខាន់​ការ​បោះឆ្នោត សន្លឹក​ឆ្នោត​សំខាន់ ព្រោះ​វា​ថា​វា​ជួយ​ប្រជាជន​ឱ្យ​បាន​នៅ​សុខ​សប្បាយ​ត​ទៅ​មុខ​ទៀត។ ចង់​ទៅ​បោះឆ្នោត​ទាំងអស់​គ្នា ព្រោះ​ថា ចង់​ឱ្យ​សង្គម​បាន​រីក​ចម្រើន​ដល់​អ្នក​ក្រីក្រ»

កម្មករ​ទាំង​នោះ​បាន​ស្នើ​ឡើង​ថា សូម​ឱ្យ​ក្រុមហ៊ុន​បើក​ប្រាក់​ខែ​ដែល​ពួក​គាត់​បាន​បំពេញ​ការងារ​ក្នុង​ខែ​មិថុនា និង​កក្កដា យ៉ាង​ហោច​ណាស់​បាន​នៅ​ថ្ងៃ​ទី២៥ កក្កដា ព្រោះ​ងាយ​ស្រួល​មាន​ពេល​វេលា​គ្រប់​គ្រាន់​ជិះ​ឡាន​ទៅ​ស្រុក។

ឆ្លើយ​តប​នឹង​ការ​ស្នើសុំ​របស់​កម្មករ​ខាង​លើ មេការ​ម្នាក់​ដែល​ទទួល​ខុស​ត្រូវ​កម្មករ​ប្រហែល ២០​នាក់ លោក ហុក ឡាយ បាន​យល់​ស្រប​នឹង​សំណូម​ពរ​របស់​កម្មករ ដោយ​លោក​និយាយ​ថា ខាង​លោក​ក៏​ដឹង​ដែរ ការ​បោះឆ្នោត​វា​មាន​អត្ថន័យ​យ៉ាង​ណា​ចំពោះ​ប្រជាពលរដ្ឋ​ខ្មែរ។ ក៏ប៉ុន្តែ លោក​បាន​មាន​ប្រសាសន៍​ថា ការ​ដែល​សំខាន់​មិន​មែន​ស្ថិត​លើ​លោក​ជា​អ្នក​សម្រេច​នោះ​ទេ ព្រោះ​ប្រាក់​ដែល​ត្រូវ​បើក​ឱ្យ​កម្មករ ត្រូវ​រង់ចាំ​ពី​ខាង​អ្នក​គ្រប់គ្រង​ជន​ជាតិ​បរទេស។ ប្រសិន​បើ​ភាគី​ថៅកែ​ចិន បើក​ឱ្យ​គាត់​បាន​លឿន នោះ​លោក​នឹង​លៃលក​ប្រាក់​ឱ្យ​កម្មករ​បាន​លឿន​ដែរ៖ «ខ្ញុំ​ពឹង​លើ​ចិន ព្រោះ​អី​ប្រាក់​ខែ​ត្រូវ​បើក​ពី​ចិន។ បើ​ចិន គេ​បើក​ឱ្យ ទើប​ខ្ញុំ​មាន​បើក​ឱ្យ​ចិន ដែរ ហើយ​ឥឡូវ​ហ្នឹង​វា​អត់​ទាន់​កំណត់​ទេ ថា​នៅ​ថ្ងៃ​ទី២៥ ចិន គេ​បើក​ឱ្យ​ឬ​យ៉ាង​ម៉េច។ ខ្ញុំ​រង់ចាំ​មើល​ដែរ​ហ្នឹង។ បើ​គេ​បើក​ឱ្យ ខ្ញុំ​បើក​ឱ្យ​កម្មករ​ទៅ​ស្រុក​ទៅ​អី​ដែរ ខ្ញុំ​ទុក​ធ្វើ​អី»

វិទ្យុ​អាស៊ីសេរី មិន​អាច​ទាក់ទង​តំណាង​ក្រុមហ៊ុន​សាងសង់​រោងចក្រ​អគ្គិសនី ដើម្បី​សុំ​ការ​បំភ្លឺ​បន្ថែម​ជំរុញ​បញ្ហា​នេះ​បាន​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល