កម្មករ ២៧នាក់ ធ្វើការនៅរោងចក្រ ៣កន្លែងផ្សេងគ្នា ក្នុងស្រុកសំរោងទង ខេត្តកំពង់ស្ពឺ រងរបួសធ្ងន់ និងស្រាលក្នុងគ្រោះថ្នាក់ចរាចរណ៍មួយ ខណៈដែលពួកគេធ្វើដំណើរតាមរថយន្តពីផ្ទះមកកន្លែងធ្វើការ។
ប្រធានសហជីពសេរីកម្មករប្រចាំរោងចក្រ សាំង វ៉ូ (Sang Woo) លោក ស៊ុន ពិសី មានប្រសាសន៍ថា រថយន្តទួរីស ៣គ្រឿង ដែលមានដឹកកម្មករជិត ១០០នាក់ បានបុកបន្តកន្ទុយគ្នានៅផ្លូវជាតិលេខ៤ ត្រង់ចំណុចខាងកើតស្ពានអូរក្រាំងអំបិល ក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីវេលាម៉ោង ៦ និង ៤០នាទីព្រឹក ថ្ងៃទី៦ ខែវិច្ឆិកា។
លោកបន្តថា គ្រោះថ្នាក់ចរាចរណ៍នោះផ្ដើមចេញពីរថយន្តដឹកកម្មករមួយគ្រឿង ដែលនាំមុខបានឈប់ភ្លាមៗពេលកំពុងធ្វើដំណើរ ហើយរថយន្តទី២ ចាប់ហ្វ្រាំងមិនទាន់ ក៏បានជ្រុលទៅបុកគូថរថយន្តទី១ ហើយឡានដឹកកម្មករ ២ទៀត ក៏បានបុកគ្នាជាបន្តបន្ទាប់ ធ្វើឲ្យកម្មករ ២៧នាក់ និងតៃកុងឡានម្នាក់ទៀត រងរបួស។
លោកបញ្ជាក់ថា កម្មករដែលរបួសទាំងនោះមាន ២៣នាក់ ធ្វើការនៅរោងចក្រ សាំង វ៉ូ ៣នាក់នៅរោងចក្រ យូណាយធិត និងម្នាក់នៅរោងចក្រ វេន ស៊ុន។ ក្នុងចំណោមកម្មកររងរបួសទាំងនោះ មានម្នាក់មានផ្ទៃពោះ ៤ខែ ហើយគ្រូពេទ្យកំពុងពិនិត្យតាមដានថា មានប៉ះពាល់ទារកក្នុងផ្ទៃដែរឬទេ?៖ «ឡានដឹកកម្មករខាងមុខនោះ គាត់បានឃើញឡានខាងមុខមួយទៀត គាត់បង្អង់ល្បឿន អាទួរីសដឹកកម្មករគាត់ក៏បន្ថយល្បឿនដែរ តែដោយឡែកអាឡានបន្ទាប់មួយទៀត អាឡានដឹកកម្មករទី២ ហ្នឹង គាត់អត់បន្ថយល្បឿនទេ គឺគាត់គេចអត់ទាន់ គាត់បុកឡានដឹកកម្មករនៅខាងមុខ ហើយឡានក្រោយក៏បុកបន្តគ្នាទៀតទៅ»។
កម្មការិនីរោងចក្រ សាំងវ៉ូ ម្នាក់ គឺលោក ម៉ន សុលីន បានរៀបរាប់ថា រថយន្តបានបុកកម្មករបន្តបន្ទាប់ ធ្វើឲ្យតៃកុងឡានសន្លប់ ហើយកម្មករទង្គិចក្បាលគ្នា ខ្លះទង្គិចនឹងកញ្ចក់ទ្វារ ហើយខ្លះទៀត ត្រូវបោកខ្ទប់នឹងកៅអី៖ «ឡានគេឈប់មុនឡានខាងមុខ រួចបុករុញតៗគ្នាទៅ មានអ្នកខ្លះរលាត់ក្បាលជង្គង់ ប៉ោងភ្នែក។ ខាងឡានខ្ញុំនោះ របួសរលាត់ជើងសងខាង ខ្លះប៉ះថ្ងាសនឹងកញ្ចក់ឡាន ទង្គិចគ្នាឯងៗ»។
ជនរងគ្រោះម្នាក់ទៀត លោកស្រី ស៊ុំ ចាន់ធី ដែលមានផ្ទៃពោះ បញ្ជាក់ថា គ្រូពេទ្យបានពិនិត្យដោយឆ្លុះអេកូ រួចបញ្ជាក់ថា របួសគាត់មិនប៉ះពាល់ដល់កូនក្នុងផ្ទៃទេ។ ប៉ុន្តែ គាត់នៅមានអាការៈចុកចុងដង្ហើម ហើយឈឺក្បាលត្រង់កន្លែងដែលបោកខ្ទប់នឹងទ្វារឡាន។
ប្រភពសហជីព បញ្ជាក់ថា ភ្លាមៗក្រោយកើតហេតុ ខាងថៅកែរោងចក្របានទៅមើលកម្មករនៅមន្ទីរពេទ្យ ដោយមានយកបាយ និងភេសជ្ជៈទៅឲ្យពួកគេ ហើយខាងបេឡាជាតិរបបសន្តិសុខសង្គម ក៏បានចុះទៅដល់កន្លែងកើតហេតុ និងធានាចេញថ្លៃព្យាបាលជំងឺឲ្យកម្មករ។ ប្រភពដដែលបន្តថា កម្មករដែលរងរបួសទាំងអស់ មិនមានគ្រោះថ្នាក់ដល់ជីវិតទេ ហើយពួកគេខ្លះបានចេញពីមន្ទីរពេទ្យ ហើយខ្លះកំពុងសម្រាកនៅមន្ទីរពេទ្យនៅឡើយ។
ទាក់ទិនករណីគ្រោះថ្នាក់ចរាចរណ៍នេះ អធិការរងស្រុកសំរោងទង លោក សាយ សេត បានបន្ទោសករណីគ្រោះថ្នាក់នេះថា ជាការធ្វេសប្រហែសរបស់តៃកុងឡានដែលមិនប្រុងប្រយ័ត្ននូវឧបសគ្គខាងមុខ នៅពេលបើកបរ៖ «បើនិយាយទៅ តៃកុងរថយន្តទី៣ហ្នឹង គាត់ធ្វេសប្រហែស គាត់មានឧបសគ្គអីមិនមានវិធានការប្រុងប្រយ័ត្នឲ្យបានត្រឹមត្រូវ ដូចអាទី១ ទី២ហ្នឹង ប្រហែលជាគាត់លឿនហើយ ឬក៏គាត់បើកមិនមានចន្លោះសុវត្ថិភាព»។
យ៉ាងណា ករណីគ្រោះថ្នាក់ចរាចរណ៍នេះ សមត្ថកិច្ចមិនបានឃាត់ខ្លួនតៃកុងឡានណាម្នាក់ដែលបង្កហេតុនោះទេ គឺគ្រាន់តែសាកសួរចម្លើយ និងកត់កំណត់ហេតុការពារ ក្រែងមានជនរងគ្រោះណាម្នាក់ដាក់ពាក្យបណ្ដឹងទៅថ្ងៃក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។