ជាងនេះទៅទៀត យុវជនកម្ពុជា នឹងអាចប្រកួតប្រជែងការងារជាមួយយុវជនអាស៊ាន ដែលនឹងចូលមកតាមរយៈសមាហរណកម្មអាស៊ាន នៅឆ្នាំ២០១៥ ខាងមុខ។
ក្ដីបារម្ភចំពោះសមត្ថភាពយុវជនកម្ពុជា ថានឹងអាចប្រកួតប្រជែងជាមួយយុវជនអាស៊ានបានដែរឬអត់នោះ ត្រូវបានស្ថាប័នរដ្ឋ និងសង្គមស៊ីវិលយកចិត្តទុកដាក់ ហើយទាមទារឲ្យយុវជនខ្លួនឯងត្រូវបន្សាំខ្លួនជាមួយនឹងការងារស្ម័គ្រចិត្តក្នុងស្រុកជាបណ្ដើរៗ។
នៅក្នុងទិវាអន្តរជាតិអ្នកស្ម័គ្រចិត្តលើកទី៣ នៅថ្ងៃទី៥ ធ្នូ ឆ្នាំ២០១៣ ដែលប្រារព្ធឡើងនៅកម្ពុជា ក្រោមប្រធានបទធ្វើជាអ្នកស្ម័គ្រចិត្ត គឺធ្វើជាជនគំរូ។
រដ្ឋលេខាធិការនៃក្រសួងអប់រំ យុវជន និងកីឡា លោក ស៊ាន បូរ៉ាត ថ្លែងថា ការចូលរួមធ្វើការងារស្ម័គ្រចិត្ត គឺជាការចូលរួមចំណែកដ៏មានតម្លៃបំផុត និងមិនអាចខ្វះបាន ដើម្បីធ្វើឲ្យប្រសើរឡើងនូវលក្ខខណ្ឌសង្គម ក្នុងការលើកតម្កើងការអភិវឌ្ឍសេដ្ឋកិច្ចជាតិ និងសិទ្ធិចូលរួមរបស់យុវជនក្នុងកិច្ចការសង្គម។
«សំឡេង»
ការងារស្ម័គ្រចិត្តបានរួមចំណែកយ៉ាងធំធេងក្នុងការអភិវឌ្ឍប្រទេស និងបានលើកកម្ពស់ដល់ជំនាញ និងទេពកោសល្យរបស់យុវជន ក្នុងការត្រៀមខ្លួនចូលទៅកាន់ការងារអាជីពសម្រាប់អនាគត ហើយការងារស្ម័គ្រចិត្តនេះ ក៏បានបង្កើតឱកាស និងអប់រំដល់យុវជនពីជំនាន់មួយទៅជំនាន់មួយ ក្នុងការពង្រឹង និងពង្រីកចំណងមិត្តភាព សាមគ្គីភាព និងស្វែងយល់គ្នាទៅវិញទៅមក ចេះជួយដោះស្រាយបញ្ហាប្រឈមទាន់ពេលវេលា។
ចំណែកតំណាងអ្នកសម្របសម្រួលមូលនិធិសហប្រជាជាតិសម្រាប់ប្រជាជន ហៅថា យូ.អិន.ហ្វែស.ភី.អេ (UNFPA) លោក ម៉ាក ឌើវីវ (Marc Derveeuw) មានប្រសាសន៍ថា យុវជនពិតជាមានសារសំខាន់សម្រាប់ការអភិវឌ្ឍជាតិ។ លោកថា អង្គការនេះបានប្ដេជ្ញាចិត្តក្នុងការកសាងសុខុមាលភាពយុវជន ជំរុញភាពរីកចម្រើនខាងផ្នែកបញ្ញាស្មារតី បង្កើតចំណេះដឹងអំពីសិទ្ធិរបស់ពួកគេ សីលធម៌ និងគុណតម្លៃ និងជំនាញដែលយុវជនត្រូវការ ដើម្បីជំរុញការងារស្ម័គ្រចិត្ត។ លោកបញ្ជាក់ថា ប្រជាពលរដ្ឋកម្ពុជា សព្វថ្ងៃ មានជីវភាពប្រសើរឡើងដោយសារតែការងាររបស់អ្នកស្ម័គ្រចិត្ត ដែលបានជួយការងារជាច្រើន។
យ៉ាងណាក៏ដោយ ក្រៅអំពីការជំរុញឲ្យយុវជនចាប់អារម្មណ៍ ហើយងាកមកចូលរួមក្នុងកិច្ចការស្ម័គ្រចិត្តនៅក្នុងស្រុកនោះ សង្គមស៊ីវិលបានឈានមួយកម្រិតទៀត ដោយជំរុញឲ្យយុវជនពង្រឹងសមត្ថភាពរបស់ខ្លួន ដើម្បីឈានដល់ការស្ម័គ្រចិត្តថ្នាក់តំបន់ ដែលធ្វើនេះអាចឲ្យពួកគេកាន់តែមានសមត្ថភាពថែមទៀត ដូចយុវជននៅប្រទេសដទៃដែលចូលមកបម្រើការងារស្ម័គ្រចិត្តនៅកម្ពុជា ឈានដល់ការប្រកួតប្រជែងជាមួយអាស៊ាន និងមិនមានក្ដីបារម្ភចំពោះការស្រូបយកការងារពីកម្ពុជា ឡើយ។
អ្នកសម្របសម្រួលផ្នែកពង្រឹងសិទ្ធិអំណាចយុវជន នៃអង្គការកម្មវិធីអភិវឌ្ឍន៍ធនធានយុវជន កញ្ញា ស៊ាប ស៊ីណេត មានមតិថា សមត្ថភាពយុវជនកម្ពុជា បច្ចុប្បន្ននៅមានកម្រិត ប៉ុន្តែអាចទៅរួចបើសិនជាយុវជនចូលរួមក្នុងការងារស្ម័គ្រចិត្តក្នុងសង្គមឲ្យបានច្រើន នោះយុវជននឹងឈានជើងមួយជំហានទៀតទៅដល់ការងារស្ម័គ្រចិត្តថ្នាក់តំបន់។ កញ្ញាបន្តថា ឆ្នាំ២០១៣ គឺជាឆ្នាំដំបូងដែលកម្ពុជា បានបង្កើតកម្មវិធីយុវជនស្ម័គ្រចិត្តអាស៊ាន ហៅជាភាសាអង់គ្លេសថា ឌឹ អាស៊ាន យូត វូលិនធារ ប្រូក្រាម (The ASEAN youth volunteer program) ទន្ទឹមនឹងគ្នានេះ ទាមទារឲ្យក្រសួងអប់រំ ត្រូវតែពង្រឹងគុណភាពអប់រំជាងពេលបច្ចុប្បន្ន។ ជាមួយគ្នានោះ កញ្ញាអំពាវនាវទៅរដ្ឋាភិបាល ឲ្យផ្សព្វផ្សាយពីឱកាសការងារស្ម័គ្រចិត្តនៅកម្រិតថ្នាក់តំបន់ ជូនយុវជនឲ្យបានទូលំទូលាយ។
«សំឡេង»
ការងារស្ម័គ្រចិត្ត ពិតជាមានសារសំខាន់សម្រាប់យុវជនយុវតី ដែលកំពុងស្ម័គ្រចិត្តក្នុងសហគមន៍របស់ពួកគេ។
យុវតី ធ សៅណេត អាយុ ២៣ឆ្នាំ ដែលមានសម្បុរស្រអែមសក់រួញអង្កាញ់ មកពីស្រុកបរិបូរណ៍ ខេត្តកំពង់ឆ្នាំង បាននិយាយថា ក្នុងសហគមន៍របស់នាងមានយុវជនតិចណាស់ដែលបានធ្វើការស្ម័គ្រចិត្តសម្រាប់សហគមន៍ ពីព្រោះពួកគេមិនទាន់យល់ពីសារសំខាន់នៃការងារស្ម័គ្រចិត្ត។
«សំឡេង»
យុវជន ផង់ ពិណន់ អាយុ ២៣ឆ្នាំ ជានិស្សិតឆ្នាំទី៣ នៃសាកលវិទ្យាល័យភូមិន្ទភ្នំពេញ ផ្នែកសង្គមវិទ្យា បានថ្លែងថា គាត់បានធ្វើការស្ម័គ្រចិត្តតាមរយៈអង្គការសង្គមស៊ីវិលប្រមាណ ៣ឆ្នាំមកហើយ ជាមួយយុវជនក្នុងសហគមន៍ ដោយលើកទឹកចិត្តឲ្យយុវជនចាប់អារម្មណ៍ការសិក្សារៀនសូត្រ និងធ្វើការងារស្ម័គ្រចិត្តក្នុងសហគមន៍។ យុវជនដដែលអះអាងថា ការងារស្ម័គ្រចិត្តពិតជាបានធ្វើឲ្យរូបគេមានក្ដីសង្ឃឹមជាច្រើនសម្រាប់ថ្ងៃអនាគត។
«សំឡេង»
កញ្ញា ហូសេន ស៊ុបប្រិយ ជាយុវតីពីខេត្តកំពង់ចាម ថ្លែងថា ការងារស្ម័គ្រចិត្តបានផ្ដល់គុណតម្លៃជាច្រើនដល់ការងារស្ម័គ្រចិត្តក្នុងពេលកំពុងរៀនសូត្របណ្ដើរធ្វើការបណ្ដើរ។ ប៉ុន្តែនាងត្អូញថា ការងារស្ម័គ្រចិត្តក្នុងសហគមន៍របស់នាងបច្ចុប្បន្ន នៅមានបញ្ហាខ្លះពីអាជ្ញាធរផង និងពីប្រជាពលរដ្ឋដោយផ្ទាល់ផង។ បញ្ហានោះ គឺខ្វះការសហការ និងការមិនអោយតម្លៃពួកគេជាយុវជនវ័យក្មេងនៅឡើយ។
«សំឡេង»
ពុំមានរបាយការណ៍ណាមួយបានធ្វើការស្រាវជ្រាវជាក់លាក់ថា មានយុវជនកម្ពុជា ប៉ុន្មាននាក់ ដែលចេញធ្វើការងារស្ម័គ្រចិត្តលើគ្រប់វិស័យនោះទេ។ ប៉ុន្តែ របាយការណ៍វិភាគស្ថានភាពយុវជនដែលធ្វើឡើងដោយអង្គការសហប្រជាជាតិ ឆ្នាំ២០០៩ ដែលសង្គមស៊ីវិលស្រង់ដាក់ក្នុងសេចក្ដីព្រាងគោលនយោបាយជាតិស្ដីពីការអភិវឌ្ឍយុវជនកម្ពុជា ថាមានយុវជនប្រមាណ ៣៥% ទៅ ៤០% ចូលប្រឡូកក្នុងតួនាទីស្ម័គ្រចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។