អ្នកចូលរួមហែក្បួន អះអាងថា ពួកគេចង់យកថ្ងៃពិសាខបូជា ជាថ្ងៃផ្សព្វផ្សាយការកសាងសន្តិភាព។
ក្រុមយុវជនចម្រុះសាសនារបស់អង្គការយុវជនសន្តិភាពប្រមាណ ២០០នាក់ ដង្ហែក្បួនក្នុងថ្ងៃបុណ្យពិសាខបូជា ដើម្បីផ្សព្វផ្សាយសន្តិភាពក្នុងចំណោមពលរដ្ឋនៅក្នុងតំបន់ព្រំដែនកម្ពុជា-ថៃ។
សមាជិកក្រុមការងារដើម្បីសន្តិភាព អ្នកស្រី ប្រ៉ុក វណ្ណី ជាអ្នករៀបចំការដង្ហែក្បួននេះ មានប្រសាសន៍ថា អ្នកចូលរួមបានដង្ហែក្បួនក្នុងចម្ងាយប្រមាណ ៧គីឡូម៉ែត្រពីព្រំដែន ជាទីដែលធ្លាប់មានសង្គ្រាមរវាងកងទ័ពខ្មែរ និងថៃ។ អ្នកស្រីបន្តថា គោលបំណងសំខាន់នៃការហែក្បួន គឺចង់អោយយុវជនយល់ដឹងពីអត្ថន័យនៃការកសាងសន្តិភាព ទាំងក្នុងទ្រឹស្ដីព្រះពុទ្ធសាសនា និងក្នុងសាសនាដទៃទៀត។
ក្នុងចំណោមយុវជនទាំងជិត ២០០នាក់នោះ ភាគច្រើនជាយុវជននៅក្នុងខេត្តឧត្តរមានជ័យ និងយុវជននៅទីក្រុងភ្នំពេញ និងមានយុវជនជនជាតិថៃ ចំនួន ១០នាក់។ យុវជនទាំងអស់ប្រកាន់សាសនាខុសៗគ្នា មានជាអាទិ៍ ព្រះពុទ្ធសាសនា គ្រិស្តសាសនា និងឥស្លាមសាសនាជាដើម។
យុវជន សែម ហាក់ ជានិស្សិតឆ្នាំទី៤ ផ្នែកច្បាប់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានអោយដឹងថា ការចូលរួមរបស់យុវជននៅពេលនេះជាសារសំខាន់សម្រាប់អោយរដ្ឋាភិបាលយកចិត្តទុកដាក់រក្សាសន្តិភាព។
កញ្ញា ហាសសាន់ សាទីយ៉ា អោយដឹងថា បើទោះជានាងកាន់សាសនាផ្សេងក្រៅពីព្រះពុទ្ធសាសនា ក៏នាងចូលរួមក្នុងការហែក្បួននៅថ្ងៃពិសាខបូជានេះ ដោយចង់បង្ហាញថា សន្តិភាពកើតចេញពីការតាំងចិត្តរបស់បុគ្គលម្នាក់ៗ មិនប្រកាន់ពូជសាសន៍ និងជំនឿសាសនាឡើយ។
ការហែក្បួន ដើម្បីសន្តិភាពរបស់ក្រុមយុវជន បានចាប់ផ្ដើមកាលពីឆ្នាំ២០១១ នៅក្រោយពេលដែលការប៉ះទង្គិចដោយអាវុធនៅតាមព្រំដែនរវាងខ្មែរ-ថៃ បានបន្តមិនអាចបញ្ចប់បាន។ ការហែក្បួនលើកទី១ គឺនៅថ្ងៃពិសាខបូជាឆ្នាំមុន នៅតាមបណ្ដោយព្រំដែនក្នុងខេត្តកោះកុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។