គ្រួសារជនសង្ស័យម្នាក់ដែលត្រូវអាជ្ញាធរឃុំខ្លួនពីបទប្លន់ ទាមទារអោយអាជ្ញាធរដោះលែងជននោះវិញ ដោយសំអាងថាជាជនស្លូតត្រង់។
បុរសឈ្មោះ ម៉ិញ រ៉ន អាយុ ៤០ឆ្នាំ នៅឃុំក្ដាញ់ ស្រុកព្រៃកប្បាស ខេត្តតាកែវ ត្រូវប៉ូលិសខេត្តតាកែវ និងខេត្តសៀមរាប ចាប់ខ្លួនកាលពីថ្ងៃទី២ ខែកក្កដា សង្ស័យពីបទប្លន់មិនបានសម្រេច។ ប៉ុន្តែ លោកស្រី ទូច សាមីន ត្រូវជាភរិយា លោក ម៉ិញ រ៉ន អះអាងថាប្ដីរបស់គាត់ពុំប្រព្រឹត្តដូចការចោទប្រកាន់ទេ។ លោកស្រីបន្តថា ប៉ូលិសមកចាប់ប្ដីគាត់ពីផ្ទះពេលកំពុងពុះឧស។ លោកស្រីថា ប៉ូលិសចាប់ឃុំប្ដីគាត់នេះ បន្ទាប់ពីមានករណីប្លន់ម៉ូតូមិនបានសម្រេចមួយ កើតឡើងនៅខេត្តសៀមរាប កាលពីថ្ងៃទី៣០ ខែមិថុនា ហើយនៅកន្លែងកើតហេតុនោះ ក្រុមចោរប្រើអត្តសញ្ញាណប័ណ្ណប្ដីគាត់ដែលបានជ្រុះបាត់ ពេលគាត់ត្រឡប់មកពីប្រទេសថៃ កាលពីឆ្នាំ២០១២។ ប៉ុន្តែនៅមុនបោះឆ្នោត ប្ដីគាត់សុំធ្វើអត្តសញ្ញាណប័ណ្ណឡើងវិញ ហើយបានបោះឆ្នោតកាលពីឆ្នាំ២០១៣។
លោកស្រីបន្តថា ក្រោយពីប៉ូលិសចាប់ខ្លួន អ្នកភូមិ និងអាជ្ញាធរភូមិឃុំ ឡើងទៅតវ៉ានៅស្នងការដ្ឋានខេត្តតាកែវ ធានាថាប្ដីគាត់មិនជាប់ពាក់ព័ន្ធអំពើប្លន់ទេ ប៉ុន្តែនៅថ្ងៃទី៤ ខែកក្កដា ប្ដីគាត់ត្រូវប៉ូលិសបញ្ជូនទៅខេត្តសៀមរាប៖ «ពីបទជិះម៉ូតូចាប់ជំរិតយកម៉ូតូគេ ប៉ុន្តែអត់បានសម្រេចទេ តែម្ចាស់ម៉ូតូគេវ៉ៃ។ ម្ចាស់គេនៅរស់ គេថាស្គាល់មុខចោរ ខ្ញុំសង្ឃឹមថា អត់ពាក់ព័ន្ធទេ ព្រោះអីប្ដីខ្ញុំអត់បានដើរ»។
មេប៉ុស្តិ៍រដ្ឋបាលឃុំក្ដាញ់ លោក សោម សុភាព ឲ្យដឹងថា ការចាប់ខ្លួនបុរសឈ្មោះ ម៉ិញ រ៉ន គឺសមត្ថកិច្ចពីថ្នាក់លើមកអនុវត្តផ្ទាល់ លោកមិនបានដឹងរឿងនោះមុនទេ។
ពលរដ្ឋឃុំក្ដាញ់ ឲ្យដឹងថា ដើម្បីបញ្ជាក់ភាពស្អាតស្អំរបស់ លោក ម៉ិញ រ៉ន អ្នកភូមិនាំគ្នាផ្ដិតមេដៃ ផ្ញើទៅតាមភរិយាជនសង្ស័យ ដើម្បីឲ្យប៉ូលិស និងតុលាការខេត្តសៀមរាប ធ្វើជាភស្តុតាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។