មន្ត្រីឃ្លាំមើលសិទ្ធិមនុស្សសមាគមអាដហុក (Adhoc) នៅថ្ងៃច័ន្ទ ទី១៦ ខែកញ្ញា អំពាវនាវឲ្យមន្ត្រីស្ថាប័នពាក់ព័ន្ធនៃអាជ្ញាធរខេត្តរតនគិរី ស៊ើបអង្កេតបន្ថែមទៅលើករណីបាញ់សម្លាប់ប្រជាពលរដ្ឋនៅក្នុងសួនឧទ្យានជាតិវីរជ័យ។
មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី មានប្រសាសន៍បញ្ជាក់ថា ការស៊ើបអង្កេតជំហានដំបូងរបស់មន្ត្រីអាដហុក ចាត់ទុកថា ករណីបាញ់សម្លាប់នោះ គឺជាករណីឃាតកម្ម មិនមែនជាអំពើអត្តឃាតកម្មនោះទេ ពីព្រោះសាក្សីដែលធ្វើដំណើរជាមួយជនរងគ្រោះ អះអាងថា ពួកគេមិនមានអាវុធទេ នៅពេលចូលព្រៃដើម្បីកាប់ឈើគ្រញូងនោះ។
លោកសង្ស័យថា ជាករណីបាញ់សម្លាប់ដោយគំនុំក្នុងរបរកាប់ឈើប្រណិតខុសច្បាប់៖ «ករណីនេះ យើងមានការសង្ស័យថា វាអាចមានការប៉ះទង្គិចទៅលើអ្នករកស៊ីឈើគ្រញូងក្នុងព្រៃដូចគ្នា មានការប្រើប្រាស់អាវុធអនាធិបតេយ្យ ដើម្បីការពារផលប្រយោជន៍រៀងៗខ្លួន»។
បុរសជនជាតិដើមភាគតិចរស់នៅភូមិខ្យាង ឃុំតាវែងក្រោម ស្រុកតាវែង លោក ញ៉ង ចុត អាយុ ៣១ឆ្នាំ បានស្លាប់កាលពីថ្ងៃទី១២ ខែកញ្ញា នៅចំណុចព្រៃសួនឧទ្យានជាតិវីរជ័យ ចម្ងាយប្រមាណ ៧គីឡូម៉ែត្រពីភូមិ។ ជនរងគ្រោះស្លាប់ដោយគ្រាប់កាំភ្លើងចំនួនពីរគ្រាប់ បាញ់ត្រូវភ្នែក និងក្បាល។
សាក្សីអ្នករួមដំណើរជាមួយជនរងគ្រោះ ឈ្មោះ នី ខាត់ខង មានប្រសាសន៍បញ្ជាក់ថា ពួកគេទាំងពីរនាក់បានទៅរកកាប់ឈើគ្រញូងក្នុងព្រៃ តាំងពីព្រឹកថ្ងៃកើតហេតុ ប៉ុន្តែមិនមានកាន់អាវុធអ្វីនោះទេ រហូតមកទល់នឹងវេលាម៉ោងប្រមាណ ១២ បន្ទាប់ពីបរិភោគបាយនៅក្នុងព្រៃរួច ហើយគេទាំងពីរនាក់បានបំបែកផ្លូវគ្នា ដើម្បីស្វែងរកដើមគ្រញូង។ លោក ខាត់ខង បន្តថា គាត់បានដើរបែកចេញពីជនរងគ្រោះប្រមាណកន្លះម៉ោង ក៏ឮសូរស្នូរកាំភ្លើងមួយគ្រាប់ ហើយភ្លាមៗនោះ កាំភ្លើងផ្ទុះពីរគ្រាប់ថែមទៀត ទើបគាត់រត់ទៅកន្លែងស្នូរកាំភ្លើង ក៏ឃើញជនរងគ្រោះដេកស្លាប់នៅទីនោះ ទើបគាត់វិលមកភូមិប្រាប់ដំណឹងនេះជូនក្រុមគ្រួសារ និងរាយការណ៍ទៅក្រុមសមត្ថកិច្ច៖ «ខ្ញុំក៏សង្ស័យអ៊ីចឹងដែរ ព្រោះចេញពីផ្ទះប្រហែលម៉ោង ៧ គាត់ស្ពាយបាឡូ ហើយពូថៅ ខ្ញុំក៏កាំបិត ហើយស្ពាយការុងដូចគ្នា។ អត់មានអាវុធទេពេលទៅហ្នឹង ចូលទៅដល់ព្រៃហ្នឹងដើរជាមួយគ្នា»។
ប្រធានភូមិខ្យាង លោក មច់ ឆើ មានប្រសាសន៍កត់សម្គាល់ថា លោក និងសមត្ថកិច្ចប៉ូលិស បានទៅដល់កន្លែងកើតហេតុឃើញជនរងគ្រោះត្រូវគ្រាប់កាំភ្លើងពីរកន្លែងខុសគ្នា។ ហេតុនេះ លោកសន្និដ្ឋានថា ជនរងគ្រោះមិនមែនបាញ់សម្លាប់ខ្លួនឯងទេ។ លោកបន្តថា ជនរងគ្រោះជាប្រជាពលរដ្ឋក្នុងភូមិ មិនដែលមានទំនាស់អ្វីក្នុងភូមិនោះទេ៖ «បាញ់ខ្លួនឯងពីរគ្រាប់ត្រង់ហ្នឹង ហើយខ្ញុំនៅឆ្ងល់ បើគាត់បាញ់ខ្លួនឯងតែមួយគ្រាប់ងាប់បាត់ហើយ»។
ទាក់ទិនករណីនេះដែរ ស្នងការរងប៉ូលិសខេត្តរតនគិរី លោក ផែន ឌីណា មានប្រសាសន៍ថា ប៉ូលិសបានរកឃើញកាំភ្លើង អាកា ៤៧ (AK 47) ស្វ័យបត់ចាស់មួយដើម ដែលមានសភាពកប់ក្នុងដីយូរថ្ងៃនៅក្បែរសពជនរងគ្រោះ និងពិនិត្យឃើញជនរងគ្រោះត្រូវគ្រាប់កាំភ្លើងត្រង់ភ្នែក និងចិញ្ចើម ដូច្នេះប៉ូលិសសន្និដ្ឋានជំហានដំបូងថា ជនរងគ្រោះទំនងធ្វើអត្តឃាតខ្លួនឯង។ លោកអះអាងថា សមត្ថកិច្ចនឹងបន្តស៊ើបអង្កេតករណីនេះ ប្រសិនមានភស្តុតាងដាក់បន្ទុកណាមួយដែលសង្ស័យថា ជនរងគ្រោះត្រូវគេសម្លាប់៖ «យើងមានកំណត់ហេតុត្រឹមត្រូវចូលរួមប៉ុន្មាននាក់អ៊ីចឹងទៅ។ ឥឡូវ យើងកំណត់ប៉ុណ្ណឹង ប៉ុន្តែយើងនៅតែស្រាវជ្រាវរកពីមូលហេតុ បើមានតម្រុយណាផ្សេងលើព័ត៌មានហ្នឹង យើងនឹងអាចស្រាវជ្រាវបន្តទៀត»។
យ៉ាងនេះក្តី សពជនរងគ្រោះត្រូវបានសមត្ថកិច្ច និងក្រុមគ្រួសារសម្រេចកប់នៅក្នុងព្រៃនោះ ពីព្រោះមិនមានមធ្យោបាយដឹកជញ្ជូនមកភូមិបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។