ជនរងគ្រោះដែលត្រូវជនមិនស្គាល់មុខសម្លាប់ ឈ្មោះ លោក ស្រៀង ប៉េងសែ បានកើតឡើងនៅវេលាម៉ោង ១ រំលងអាធ្រាត្រថ្ងៃទី៩ សីហា ឈានចូលថ្ងៃទី១០ នៅភូមិគយត្របែក សង្កាត់គយត្របែក ក្រុងស្វាយរៀង ខេត្តស្វាយរៀង។
សាច់ញាតិរបស់សព បានអះអាងថា នៅវេលាម៉ោង ៩យប់ ថ្ងៃទី៩ សីហា ជនរងគ្រោះបានសុំភរិយារបស់ខ្លួនចេញទៅដើរលេងនៅខាងក្រៅផ្ទះជាមួយមិត្តភ័ក្ដិមួយម៉ោង។ ប៉ុន្តែ ក្រោយមក វេលាម៉ោងប្រហែល ១យប់ ដោយពុំឃើញប្ដីត្រឡប់មកផ្ទះវិញ ស្ត្រីជាប្រពន្ធបានហៅទូរស័ព្ទទៅរកជនរងគ្រោះដែរ តែពេលនោះពុំមានអ្នកទទួលទូរស័ព្ទរបស់ជនរងគ្រោះឡើយ។
ម្ដាយក្មេកជនរងគ្រោះ ឈ្មោះ អ្នកស្រី ប៉ឹក ចន្ធី មានប្រសាសន៍នៅថ្ងៃទី១០ សីហា ថា ពេលជនរងគ្រោះចេញទៅខាងក្រៅ ពេលនោះអ្នកស្រីថាបានឮសូរស៊ីផ្លេម៉ូតូមកទទួលជនរងគ្រោះដែរ តែអ្នកស្រីថា ពេលនោះពុំបានដឹងថាជានរណាទេ៖ «ធ្លាប់ចេញទៅក្រៅជួនជ្រុលម៉ោងរហូតដល់ម៉ោង១អីអ៊ីចឹងដែរ។ ខ្ញុំធ្លាប់ប្រាប់ថាជិតបោះឆ្នោតអី កុំឲ្យកូនដើរយប់ពេក ហើយអ៊ីចឹងដឹងពីណាល្អពីណាអាក្រក់ពីណាស្អប់យើងអីអ៊ីចឹង។ ថាម៉ាក់ចាំកូនកាត់បន្ថយកូនលែងដើរយប់ជ្រៅពេកហើយ។ បានប្រហែលកន្លះខែ ប៉ុន្តែអត់ទាន់បានកន្លះទេ ស្រាប់មានរឿងអ៊ីចឹងតែម្ដងហ្នឹង»។
ទាក់ទងទៅនឹងបញ្ហានេះ អធិការរងក្រុងស្វាយរៀង លោក ប្រាក់ ជុត បញ្ជាក់ថា អាជ្ញាធរប៉ូលិសកំពុងតាមរកមុខសញ្ញាជនដៃដល់នៅឡើយ៖ «បញ្ហាហ្នឹងកើតមែន ប៉ុន្តែឥឡូវប៉ូលិសយើងកំពុងតែស្រាវជ្រាវ ពុំទាន់ដឹងថារឿងហ្នឹងយ៉ាងម៉េចច្បាស់លាស់នៅឡើយ កំពុងតែស៊ើបអង្កេត។ បាទ! នៅទេ ឥឡូវកំពុងតែស៊ើបអង្កេត»។
មន្ត្រីសម្របសម្រួលអង្គការលីកាដូ (LICADHO) ប្រចាំខេត្តស្វាយរៀង លោក នុត បូពិនណារ័ត្ន ថ្លែងថា ការស្លាប់របស់ជនរងគ្រោះ អាចជាមនុស្សធ្លាប់ស្គាល់គ្នាពីមុនមក ដែលធ្លាប់មានការពាក់ព័ន្ធទៅនឹងការខ្ចីប្រាក់ក្នុងស្ថាប័នមីក្រូហិរញ្ញវត្ថុ៖ «គេសម្លាប់ពីក្រៅ អ្នកដែលសម្លាប់ហ្នឹងចិត្តឡូយ គឺថាយកមកទម្លាក់ចោលនៅនឹងមុខផ្ទះ ប្រហែលដឹកយកស្នាមកង់ម៉ូតូគាត់ប្រហែលជាយកមកដល់កន្លែងហ្នឹង។ អ្នកហ្នឹងរើដឹងខ្លួនវិញ អ្នកហ្នឹងដឹងខ្លួនបានជាមានការសម្លាប់បំបិទមាត់។ មុនដំបូងស្មានថាងាប់ហើយ យកមកចោលហ្នឹង ដល់ពេលហើយអត់ទាន់ងាប់ អារកបន្ថែមសម្លាប់នៅកន្លែងហ្នឹងតែម្ដង។ ហើយការអារកហ្នឹង យើងមើលទៅមនុស្សហ្នឹងអត់មានកម្លាំងអីហ្នឹងរើទេ ប្រហែលជាមានដៃអីទប់តិចៗជាមួយអ្នកល្មើសហ្នឹង»។
លោកបន្តថា តាមការសន្និដ្ឋានទំនងគេអាចធ្វើទារុណកម្មពីខាងក្រៅ ដោយការអារផ្ដាច់សរសៃដៃជនរងគ្រោះយ៉ាងព្រៃផ្សៃ មុននឹងគេសម្លាប់ជនរងគ្រោះនោះ។
ជនរងគ្រោះ ឈ្មោះ លោក ស្រៀង ប៉េងសែ អាយុ ២៨ឆ្នាំ បានបម្រើការងារក្នុងតំណែងជាអនុប្រធានមីក្រូហិរញ្ញវត្ថុស្ថាបនា សាខាខេត្តស្វាយរៀង។ លោក ប៉េងសែ បានរួមរស់ជាមួយភរិយានៅភូមិគយត្របែក សង្កាត់គយត្របែក ក្រុងស្វាយរៀង ខេត្តស្វាយរៀង។ មន្ត្រីអង្គការលីកាដូ អះអាងថា ជនរងគ្រោះអាចស្លាប់នៅវេលាប្រមាណម៉ោង ១រំលងអាធ្រាត្រ ថ្ងៃទី៩ ឈានចូលថ្ងៃទី១០ សីហា។
ទោះយ៉ាងនេះក្ដី អាជ្ញាធរប៉ូលិសនៅពុំទាន់អាចចាប់ឃាតកដៃដល់មកដោះស្រាយតាមផ្លូវច្បាប់នៅឡើយ។ បច្ចុប្បន្ន សពជនរងគ្រោះត្រូវបានសាច់ញាតិនាំយកទៅធ្វើបុណ្យតាមគន្លងព្រះពុទ្ធសាសនា នៅគេហដ្ឋានសពហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។