លោកស្រី ថោង ស្រីន ភរិយារបស់អតីតជំទប់ទី២ ឃុំជំពូវ័ន្ត នៅថ្ងៃទី៧ ខែសីហា ស្វែងរកអន្តរាគមន៍ពីអាជ្ញាធរស្រុកជុំគិរី ខេត្តកំពត រឿងបាត់ប្រាក់ខែប្ដីរបស់គាត់សម្រាប់ខែមិថុនា។
លោកស្រី ថោង ស្រីន អះអាងថា ប្ដីគាត់ឈ្មោះ មិន អៀច ជាប់ឆ្នោតជាជំទប់បម្រើការក្នុងឃុំជំពូវ័ន្ត ៣អាណត្តិមកហើយ។ នៅថ្ងៃទី៤ ខែមករា ឆ្នាំ២០១៥ ប្ដីគាត់ស្លាប់ ប៉ុន្តែប្រាក់ខែចំនួន ៣៥ម៉ឺនរៀល ស្មៀនឃុំហៅគាត់ទៅបើករាល់ខែ។ គ្រាន់តែបើកយឺត ដូចជាលុយសម្រាប់ខែមករា បើកដល់ខែមីនា។
លោកស្រីថា នៅថ្ងៃទី៧ ខែសីហា ស្មៀនឃុំឈ្មោះ សី សៅម៉ាន កំណត់ឲ្យគាត់ទៅយកប្រាក់ខែសពប្ដីសម្រាប់ខែមិថុនា។ នៅពេលគាត់ទៅដល់ ស្មៀនថា លុយប្ដីគាត់មិនមានទៀតទេ ទើបគាត់សុំឲ្យអាជ្ញាធរស្រុកជុំគិរី ជួយអន្តរាគមន៍រកប្រាក់សម្រាប់ខែមិថុនា៖ «ប្រាក់ខែតាខ្ញុំស្លាប់ហ្នឹង នៅខែ៦ ហ្នឹង គេឲ្យ ៣៥ម៉ឺនក្នុង ១ខែ។ ហើយឥឡូវ ខ្ញុំទៅយកព្រឹកមិញ ស្មៀនគេថាតិចៗមកយកប្រាក់ខែៗ មនុស្សងាប់បាត់ហើយ គេលែងបើកឲ្យហើយ ទៅប្ដឹងឯណាប្ដឹងទៅ»។
អះអាងបន្ថែមលើ លោកស្រី ថោង ស្រីន គឺលោក សិន ផានិត ចូលធ្វើការជំនួស លោក មិន អៀច ឲ្យដឹងថា គាត់ទើបចូលកាន់តំណែងកាលពីថ្ងៃទី២៥ ខែមិថុនា ប៉ុន្តែប្រាក់ខែគាត់បើកបាន គឺសម្រាប់ខែកក្កដា ទេ បើខែមិថុនា គាត់មិនបានទទួលឡើយ។
បំភ្លឺរឿងលុយខែមិថុនា នោះ ស្មៀនឃុំជំពូវ័ន្ត លោក សី សៅម៉ាន ពន្យល់ថា ប្រាក់ខែមិថុនា របស់ លោក មិន អៀច ដែលស្លាប់ ត្រូវប្រគល់ឲ្យអ្នកថ្មី គឺលោក សិន ផានិត ប៉ុន្តែឯកសារប្ដូរប្រាក់ខែនោះ លោកមិនទាន់ធ្វើរួច ទើបបើកជូន លោក សិន ផានិត តែលុយខែកក្កដា សិន។
ពាក់ព័ន្ធបញ្ហានេះ ក្រុមប្រឹក្សាស្រុកជុំគិរី លោក សិន វណ្ណា ថ្លែងថា លោកឃ្លាំមើលប្រាក់សម្រាប់ខែមិថុនា របស់តំណែងជំទប់ទី២ ដែលជំនួស លោក មិន អៀច នោះ។ ប្រសិនបើមានអំពើពុករលួយ ឬបាត់បង់លុយនោះ លោកនឹងប្ដឹងទៅអង្គភាពប្រឆាំងអំពើពុករលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។