ប្រជាពលរដ្ឋខ្មែរ១គ្រួសារនៅខេត្តសៀមរាប បាននាំគ្នាចាកចេញពីប្រទេសទៅកាន់ទីក្រុងបាងកក ប្រទេសថៃ រយៈពេល ២ថ្ងៃមកហើយ ដើម្បីតាមរកសាច់ញាតិម្នាក់កំពុងបាត់ខ្លួន ដោយមិនដឹងពីមូលហេតុច្បាស់លាស់។
ការឆ្លងដែនតាមរកសាច់ញាតិនេះ បន្ទាប់ពីគេបានទទួលដំណឹងថា មានអ្នកថតរូបភាពស្ត្រីខ្មែរម្នាក់អាក្រាតកាយ ហើយត្រូវជនជាតិថៃ មួយក្រុមចាប់វាយធ្វើបាបមកបង្ហាញចែកគ្នាមើល នៅតំបន់ព្រំដែនខ្មែរ-ថៃ នាទីក្រុងប៉ោយប៉ែត កាលពីពេលថ្មីៗ។
ស្ត្រីឈ្មោះ ថាប់ សុខណា គឺជាអ្នកភូមិត្រពាំងសេះ សង្កាត់គោកចក ក្រុងសៀមរាប។ គាត់បានមានប្រសាសន៍ថា គ្រួសាររបស់គាត់កំពុងធ្វើដំណើរទៅប្រទេសថៃ តាមរកប្អូនស្រីម្នាក់ឈ្មោះ ថាប់ ទីតា ហៅ ស្រីដែន អាយុ ៣៣ឆ្នាំ ដែលកំពុងបាត់ខ្លួន។ ស្ត្រីដដែលបានបញ្ជាក់ថា កាលពីមុន ប្អូនស្រីរបស់គាត់ធ្វើការនៅកាស៊ីណូ ហូលីដេ ឯក្រុងប៉ោយប៉ែត ក៏ប៉ុន្តែជាង ២ឆ្នាំមកហើយ មិត្តភក្ដិបានបបួលនាងទៅធ្វើការនៅកាស៊ីណូឯទីក្រុងបាងកក ប្រទេសថៃ។
អ្នកស្រី សុខណា បានបញ្ជាក់ថា ចាប់តាំងពីចាកចេញទៅធ្វើការនៅប្រទេសថៃ គឺប្អូនស្រីរបស់គាត់តែងទូរស័ព្ទទាក់ទងមកក្រុមគ្រួសារមិនដែលខាន ក៏ប៉ុន្តែរយៈពេលជាង ១សប្ដាហ៍មកនេះ គឺបាត់ដំណឹងឈឹង ធ្វើឱ្យមានការព្រួយបារម្ភជាខ្លាំង៖ «រៀងរាល់ដង គឺយើងតែងទាក់ទងគ្នាតាមទូរស័ព្ទអីមកម្ដាយខ្ញុំ តែមួយរយៈនេះ តាំងពីថ្ងៃទី២៩ ខែវិច្ឆិកា មក គឺចាប់ផ្ដើមទូរស័ព្ទទៅគាត់ចូល ប៉ុន្តែអត់មានអ្នកទទួលទេ។ បន្ទាប់ពីនោះមក ទូរស័ព្ទហ្នឹង គឺហៅឈប់ចូលរហូតមកដល់ឥឡូវ បាត់គាត់បណ្ដោយ អត់ដឹងថាគាត់មានគ្រោះថ្នាក់យ៉ាងណា?»។
ក្រុមគ្រួសារនេះ ឱ្យដឹងថា កាលពីថ្ងៃទី១១ ខែធ្នូ កន្លងទៅ មានជនជាតិខ្មែរខ្លះដែលទៅធ្វើការនៅប្រទេសថៃ ហើយវិលត្រឡប់មកបោះត្រាទិដ្ឋាការនៅព្រំដែន បានបង្ហាញរូបថតស្រីខ្មែរម្នាក់ ត្រូវជនជាតិថៃ ដោះសម្លៀកបំពាក់ចេញអស់ ហើយវាយធ្វើទារុណកម្ម។ គ្រួសារដដែលបានអះអាងថា មានសាច់ញាតិរបស់គាត់ម្នាក់បានឃើញរូបថតនោះដែរ ព្រមទាំងស្គាល់ច្បាស់ថា រូបនោះ គឺប្អូនស្រីរបស់គាត់ដែលកំពុងបាត់ខ្លួន។
អ្នកស្រី ថាប់ គឹមលី ត្រូវជាម្ដាយមីងរបស់កម្មការិនីដែលកំពុងបាត់ខ្លួននោះ ឱ្យដឹងថា អ្នកស្រីកំពុងស្នាក់នៅឯក្រុងបាងកក ប្រទេសថៃ រយៈពេល ២ថ្ងៃមកហើយ ដើម្បីតាមរកក្មួយស្រី។ អ្នកស្រី ថាប់ គឹមលី បានឱ្យដឹងថា គាត់បានទៅដល់កន្លែងដែលក្មួយស្រីធ្លាប់ធ្វើការឈ្មោះ មូបាន រួយរុងរឿង នៃក្រុម៣ ផ្លូវលេខ៦៦ ក្នុងទីក្រុងបាងកក នោះហើយ ក៏ប៉ុន្តែមិនបានរកឃើញក្មួយស្រីទេ៖ «ដែលខ្ញុំទៅវារាងថ្ងៃហើយថ្ងៃនេះ ចង់មើលឱ្យឃើញសភាពថាខ្មែរដែលគេទៅធ្វើការកន្លែងហ្នឹង គឺអត់ឃើញមានតម្រុយអីសោះ។ បើខ្ញុំរាស្ត្រសាមញ្ញមិនដឹងទៅស៊ើបយ៉ាងម៉េច វាពិបាក»។
អ្នកស្រី ថាប់ គឹមលី បានបញ្ជាក់ថា គាត់បានទៅស្ថានទូតខ្មែរប្រចាំទីក្រុងបាងកក ដើម្បីសុំឱ្យជួយបញ្ហានេះ ក៏ប៉ុន្តែស្ថានទូតខ្មែរបានព្រងើយកន្តើយ ព្រមទាំងស្ដីបន្ទោសវិញថា ចូលទៅធ្វើការនៅប្រទេសគេដោយខុសច្បាប់ទៀតផង។
អ្នកឃ្លាំមើលសិទ្ធិមនុស្សរបស់អង្គការលីកាដូ (Licadho) លោក សែម ចៅសុខ ដែលធ្លាប់តែជួយតាមរកកម្មករខ្មែរបាត់ខ្លួន បានមានប្រសាសន៍ថា អង្គការរបស់លោកមានដៃគូនៅឯប្រទេសថៃ ហើយករណីបាត់ខ្លួនស្ត្រីម្នាក់ដែលធ្វើការនៅកាស៊ីណូនោះ បើមានអាស័យដ្ឋាននៃកន្លែងធ្វើការនោះត្រឹមត្រូវ គឺក្រុមការងាររបស់លោកនឹងជួយស្វែងរក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។