លោក យ៉ាន់ រ័ត្នកែវពិសី តំណាងសហជីពសេរីកម្មករនៃព្រះរាជាណាចក្រកម្ពុជា ប្រចាំរោងចក្រ ថប់ វើល ឲ្យដឹងថា រោងនោះបានបាក់ធ្លាក់ចូលស្រះជ្រៅ ក្នុងបរិវេណរោងចក្រ បន្ទាប់ពីកម្មករប្រមាណ ៣០នាក់ បានទទួលទានបាយថ្ងៃត្រង់នៅលើរោងនោះបានរយៈពេល ១៥នាទី។
លោកបន្តថា កម្មករចំនួន ២៥នាក់ រងរបួសស្រាល ហើយត្រូវបានបញ្ជូនមកព្យាបាលនៅមន្ទីរពេទ្យមិត្តភាពខ្មែរ-សូវៀត ១១នាក់ និងនៅមន្ទីរពេទ្យបង្អែកមានជ័យ ក្នុងខណ្ឌមានជ័យ ១៤នាក់។
មិនមានការបញ្ជាក់អះអាងជាផ្លូវការពីមូលហេតុនៃការបាក់រោងនោះភ្លាមៗទេ។ តែសាក្សីផ្ទាល់ភ្នែកបញ្ជាក់ថា រោងនោះអាចបាក់សសរដោយសាររថយន្តចាក់ដីលុបស្រះនោះ ពេលកម្មករកំពុងទទួលទានបាយថ្ងៃត្រង់។
ប្រភពឲ្យដឹងថា រោងនោះធ្វើពីឈើ ប្រក់ក្បឿង សសរស៊ីម៉ងត៍។ មកទល់ពេលនេះគេមិនដឹងថា មានកម្មករស្លាប់នៅក្នុងឧបទ្ទវហេតុនោះ ឬយ៉ាងណានោះទេ។ ក្រុមសង្គ្រោះកំពុងព្យាយាមកាយបាតបឹង ដើម្បីស្វែងរកមើលក្រែងមានមនុស្សស្លាប់នៅក្នុងទឹក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។