តំណាងសហជីពសេរីកម្មករប្រចាំរោងចក្រ ឃ្វីន មេនិចជើ និយាយថា ការទាមទារនេះ ធ្វើឡើងក្រោយពីម្ចាស់វិនិយោគរបស់រោងចក្រ លួចប្ដូរឈ្មោះរោងចក្រដោយស្ងាត់ៗ ពី ឃ្វីន មេនិចជើ មកជាឈ្មោះ សេកសេស អ៊ីនដាស គ្រុប (Success Indus Group) វិញ។
លោក មុំ ស៊ូគា អនុប្រធានសហជីពសេរីកម្មករ ប្រចាំរោងចក្រ ឃ្វីន មេនិចជើ ឲ្យដឹងនៅថ្ងៃទី២ ឧសភា ថា ភាគីរោងចក្របានក្បត់កិច្ចសន្យារបស់ខ្លួន ដែលទទួលយល់ព្រមថា នឹងផ្ដល់គោលការណ៍ ៥ចំណុច ទៅតាមការទាមទាររបស់កម្មករជាង ៥ពាន់ នៅក្នុងកិច្ចប្រជុំកាលពីថ្ងៃទី១៤ ខែមេសា កន្លងទៅ។
លោកបន្តថា កាលពីជំនួបត្រីភាគីដែលមានការចូលរួមពីមន្ទីរការងាររបស់ខេត្តកណ្ដាល ភាគីរោងចក្រ និងតំណាងកម្មករ ថៅកែរោងចក្រ សន្យាថា ខ្លួនអនុវត្តទៅតាមស្មារតីនៃកិច្ចប្រជុំ។ តែនៅទីបំផុតលោកអះអាងថា ខាងក្រុមហ៊ុនមិនបានផ្ដល់តាមកិច្ចសន្យារបស់ខ្លួនឡើយ៖ «មួយគឺលុយប្រាក់បំណាច់បញ្ចប់កិច្ចសន្យា មួយទៀតគឺជំងឺចិត្ត មួយទៀតប្រាក់ដំណាច់ឆ្នាំ ប្រាក់ខែចុងក្រោយ ប្រាក់មួយទៀត គឺធ្វើការក្នុងរយៈពេលពីមួយឆ្នាំទៅពីរឆ្នាំ គេគិតឲ្យយើង ១៥ថ្ងៃ។ ពី ២ឆ្នាំ ទៅ ៥ឆ្នាំ គេគិតឲ្យយើង ៣០ថ្ងៃ ហើយនិងពី ៥ឆ្នាំឡើងទៅដល់ ១០ឆ្នាំ អាហ្នឹងគេគិតឲ្យ ៦០ថ្ងៃ»។
លោក មុំ ស៊ូគា ឲ្យដឹងទៀតថា តាមគម្រោងចំនួនទឹកលុយដែលភាគីរោងចក្រ ត្រូវផ្ដល់ឲ្យកម្មករជាង ៥ពាន់នាក់នោះ ស្មើលុយចំនួនជាង ៨លានដុល្លារសហរដ្ឋអាមេរិក ប៉ុន្តែលោកបញ្ជាក់ថា ដើម្បីគេចពីការចំណាយដ៏ច្រើនលើសលប់នេះ ខាងរោងចក្របានផ្ដល់ឲ្យតែតំណាងសហជីពប្រចាំរោងចក្រមួយចំនួន ចាប់ពី ៥ពាន់ រហូតដល់ ៨ពាន់ដុល្លារក្នុងម្នាក់ ឲ្យដើរចេញជាថ្នូរទុកកម្មករឲ្យធ្វើការជំនួសវិញ ដើម្បីបញ្ចប់ការធ្វើកូដកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។