អង្គភាពប្រឆាំងអំពើពុករលួយ (ACU = Anti-Corruption Unit) ព្រមានប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តប៉ៃលិន ពីបទធ្វើរបាយការណ៍ចាយវាយថវិកាជាតិមិនត្រឹមត្រូវ។
លិខិតព្រមានរបស់អង្គភាពប្រឆាំងអំពើពុករលួយ ផ្សព្វផ្សាយនៅថ្ងៃទី៦ ខែធ្នូ បញ្ជាក់ថា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តប៉ៃលិន លោក ភី ឡងឌី ធ្វេសប្រហែសមើលងាយការងារចំណាយថវិការដ្ឋ ធ្វើរបាយការណ៍ភូតកុហកមិនឆ្លុះបញ្ចាំងការពិតជាក់ស្តែង។
លិខិតនោះព្រមានថា លោក ភី ឡងឌី ត្រូវបញ្ឈប់រាល់ការប្រព្រឹត្តសកម្មភាព ឬកំហុសឆ្គងប្រកបដោយប្រសិទ្ធភាព និងការទទួលខុសត្រូវខ្ពស់បំផុត។ លិខិតដដែលបានណែនាំប្រធានមន្ទីររូបនេះ ថាត្រូវគោរពកាតព្វកិច្ចការងារឲ្យបានហ្មត់ចត់ត្រឹមត្រូវ និងត្រូវសន្យាថាមិនចាយលុយជាតិខុសគោលដៅ ព្រមទាំងបំពេញការងារដោយមានក្រមសីលធម៌ខ្ពស់ជាមួយសហការីជាដើម។
ប្រធានមន្ទីររូបនេះ នឹងត្រូវធ្វើរបាយការណ៍ចំណូលចំណាយទៅកាន់អង្គភាពប្រឆាំងអំពើពុករលួយរៀងរាល់ ៣ខែម្តង ក្នុងរយៈពេលមួយឆ្នាំពេញ។
អង្គភាពប្រឆាំងអំពើពុករលួយគំរាមថា នឹងចាត់វិធានការផ្លូវច្បាប់ បើសិនជាប្រធានមន្ទីររូបនេះមិនគោរពតាមការព្រមាននោះ។ ប្រភពក្រៅផ្លូវការបានប្រាប់វិទ្យុអាស៊ីសេរី ថា លិខិតព្រមាននេះកើតឡើង បន្ទាប់ពីមន្ត្រីក្រោមឱវាទនៅក្នុងមន្ទីរការងារបណ្តុះបណ្តាលវិជ្ជាជីវៈខេត្តប៉ៃលិន ប្ដឹងប្រធានមន្ទីរពីបទពុករលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។