ធនាគារអភិវឌ្ឍន៍អាស៊ី ប្រចាំកម្ពុជា នៅថ្ងៃទី៣ មិថុនា បានប្រកាស និងវាយតម្លៃលទ្ធផលគម្រោងពង្រឹងការអប់រំរបស់ខ្លួន ដែលបានចាប់ផ្ដើមកាលពីឆ្នាំ២០០៨។ ការវាយតម្លៃនេះ ដើម្បីដឹងថា គម្រោងដែលទទួលបានជំនួយឥតសំណងពីធនាគារអភិវឌ្ឍន៍អាស៊ី នេះ បានឆ្លើយតបនឹងតម្រូវការទីផ្សារការងារកម្រិតណា នៅពេលបញ្ចប់នៅខែតុលា ឆ្នាំ២០១៤ នោះ។
មន្ត្រីធនាគារអភិវឌ្ឍន៍អាស៊ី និងក្រសួងពាក់ព័ន្ធនានា បានបង្ហាញលទ្ធផលសម្រេចបានជាង ៩០% នៃគម្រោងពង្រឹងការអប់រំ ដែលទទួលជំនួយឥតសំណងពីធនាគារអភិវឌ្ឍន៍អាស៊ី និងរដ្ឋាភិបាលកម្ពុជា។
នាយកធនាគារអភិវឌ្ឍន៍អាស៊ី ប្រចាំកម្ពុជា លោក អៀរិក ស៊ីដវិច (Eric Sidgwick) មានប្រសាសន៍ថា ការវិនិយោគនៃជំនួយឥតសំណងនេះ នឹងបង្កើនលទ្ធភាពទទួលបានការអប់រំប្រកបដោយគុណភាព ដែលអាចជួយឲ្យប្រទេសកម្ពុជា ឆ្លើយតបទៅនឹងតម្រូវការទីផ្សារការងារដែលចេះតែវិវឌ្ឍទៅមុខ។ ម្យ៉ាងវិញទៀត គម្រោងនេះនឹងពង្រឹងសមត្ថភាពប្រកួតប្រជែងរបស់ប្រទេសនេះកាន់តែខ្លាំងពីសហគមន៍សេដ្ឋកិច្ចអាស៊ាន នៅឆ្នាំ២០១៥។
លោក ស៊ីដវិច បានបញ្ជាក់ទៀតថា ការអប់រំ និងការបណ្ដុះបណ្ដាលវិជ្ជាជីវៈ គឺជាផ្នែកមួយដែលយកចិត្តទុកដាក់បំផុតនូវផែនការយុទ្ធសាស្ត្ររបស់ធនាគារអភិវឌ្ឍន៍អាស៊ី ដែលគាំទ្រដល់យុទ្ធសាស្ត្ររបស់រាជរដ្ឋាភិបាលកម្ពុជា នៅក្នុងឆ្នាំ២០១៤។
«សំឡេង»
រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ លោក ពេជ សោភ័ណ មានប្រសាសន៍ថា ការងារបច្ចេកទេស គឺជាមូលដ្ឋានគាំទ្រដល់ការអភិវឌ្ឍសង្គម តាមរយៈការកើនឡើងនៃប្រាក់ចំណូល និងការអភិវឌ្ឍសេដ្ឋកិច្ចប្រទេសកម្ពុជា។ ជាក់ស្ដែង ការងារបច្ចេកទេសនៅប្រទេសកម្ពុជា ត្រូវបានគេឲ្យតម្លៃទាបបំផុត ឬជាប្រភេទការងារដែលគេមើលរំលង។
«សំឡេង»
លោក ពេជ សោភ័ណ មានប្រសាសន៍បន្ថែមថា បច្ចុប្បន្នកម្លាំងពលកម្មកម្ពុជា ប្រមាណជាង ៣លាន ៥សែននាក់ មិនបានបញ្ចប់ថ្នាក់បឋមសិក្សាឡើយ។ បញ្ហានេះ ទាមទារការជួយគាំទ្រពីស្ថាប័នអភិវឌ្ឍន៍នានា ដើម្បីជួយពង្រឹងការអភិវឌ្ឍធនធានមនុស្សនៅកម្ពុជា។
ទោះជាយ៉ាងណាក៏ដោយ គម្រោងពង្រឹងការអប់រំចំនួនពីររបស់ធនាគារអភិវឌ្ឍន៍អាស៊ី បានជួយលើកកម្ពស់គុណភាពអប់រំ និងពង្រីកពលកម្មជំនាញ ដើម្បីឆ្លើយតបនឹងតម្រូវការទីផ្សារការងារ។ គម្រោងដែលមានទឹកប្រាក់សរុបជាង ៥០លានដុល្លារអាមេរិក ដែលអនុវត្តរយៈពេល ៦ឆ្នាំនេះ នឹងបញ្ចប់នៅចុងខែតុលា ឆ្នាំ២០១៤។ ក្នុងចំណោមតម្លៃគម្រោងសរុប រាជរដ្ឋាភិបាលបានជួយគាំទ្រទឹកប្រាក់ប្រមាណ ២០% សមាមាត្រនឹងជាង ៩លានដុល្លារអាមេរិក។
ក្រៅពីនេះ ជំនួយរបស់ធនាគារអភិវឌ្ឍន៍អាស៊ី សម្រាប់វិស័យអប់រំ និងវិស័យអប់រំបណ្ដុះបណ្ដាលបច្ចេកទេសចាប់ពីឆ្នាំ១៩៩៦ រហូតដល់បច្ចុប្បន្នមានចំនួនជាង ២០០លានដុល្លារអាមេរិក ដែលក្នុងនោះជាង ៥០លានដុល្លារជាជំនួយឥតសំណងរបស់មូលនិធិអភិវឌ្ឍន៍អាស៊ី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។