តំណាងបាតុករមកពីសហជីពចលនាកម្មករ លោក ស៊ុត ចិត្រ បញ្ជាក់ថា ការទាមទារចំនួន ៨ចំណុចនោះមាន សើឲ្យដកតំណែងមេការជនជាតិកូរ៉េម្នាក់ និងមេការខ្មែរពីរនាក់ ដែលពួកគេចោទថា ធ្វើបាបកម្មករ៖ «អ្នកគ្រប់គ្រងទាំងនេះធ្វើបាបកម្មករណាស់ ធ្វើឲ្យកម្មករយំញឹកញាប់ណាស់រោងចក្រនេះ ពិបាកសុំច្បាប់ណាស់ ពេលចង់ឈប់ម្ដងៗត្រូវសុំ ៤ ទៅ ៥នាក់ទើបបាន»។
ក្រៅពីនេះ កម្មករសុំឲ្យថៅកែចេញលុយបាយថ្ងៃត្រង់សម្រាប់កម្មករ ៤ពាន់រៀល សុំប្រាក់ថែមម៉ោងធ្វើការពេលល្ងាច ចាប់ពីម៉ោង ៤ ដល់ម៉ោង ៦ ចំនួន ២ពាន់រៀលបន្ថែមលើប្រាក់ថែមម៉ោងចាស់ ២ពាន់រៀល និងសុំបើកប្រាក់ខែឲ្យទៀងទាត់ជាដើម។
កម្មកររោងចក្រកាត់ដេរ អា លីម ធ្វើបាតុកម្មអស់រយៈពេល ៧ថ្ងៃមកហើយមកទល់ថ្ងៃទី២០ វិច្ឆិកា នេះ មិនទាន់មានដំណោះស្រាយនៅឡើយទេ។
តំណាងរោងចក្រ លោក អ៊ុត បញ្ញា អះអាងថា រោងចក្រ ឃីងហ្វឺស២ មានកម្មករសរុបជាង ៦០០នាក់ តែកម្មករធ្វើបាតុកម្មមានតែជាង ១០០នាក់ទេ ដែលធ្វើការតវ៉ា។ លោកថា ចំពោះវិវាទនេះ ក្រុមហ៊ុនបានអនុវត្តទៅតាមច្បាប់ ហើយបានដោះស្រាយនៅក្រសួងសង្គមកិច្ច និងអតីតយុទ្ធជន បានមួយជំហានហើយ ហើយរឿងនេះបានបន្តទៅក្រុមប្រឹក្សាអាជ្ញាកណ្ដាលទៀត តែលទ្ធផលដំណោះស្រាយនឹងត្រូវប្រកាសនៅថ្ងៃទី២៦ វិច្ឆិកា ខាងមុខនេះ។ លោកថា នៅពេលនេះ កម្មករមិនគួរធ្វើបាតុកម្មទេ ហើយគួររង់ចាំលទ្ធផលសម្រេចរបស់ក្រុមប្រឹក្សាអាជ្ញាកណ្ដាលសិន។ លោកថា ទោះយ៉ាងណា ក្រុមហ៊ុននឹងអនុវត្តតាមការសម្រេចរបស់ក្រុមប្រឹក្សាអាជ្ញាកណ្ដាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។