គណៈសង្ឃគណៈមហានិកាយ និងគណៈសង្ឃគណៈធម្មយុត្តិកនិកាយ ដែលមានសម្ដេចព្រះសង្ឃរាជ្យ ទេព វង្ស សម្ដេចព្រះសង្ឃរាជ្យ បួរ គ្រី សម្ដេចព្រះសង្ឃ នន្ទ ង៉ែត និងរដ្ឋមន្ត្រីក្រសួងធម្មការ លោក មិន ឃិន កាលពីថ្ងៃទី៥ ខែធ្នូ បានប្រកាសឲ្យព្រះសង្ឃ ពុទ្ធបរិស័ទ អាជ្ញាធរមានសមត្ថកិច្ចគ្រប់លំដាប់ថ្នាក់ និងមន្ត្រីរាជការទាំងអស់ ត្រូវរក្សាភាពស្ងប់ស្ងាត់ គោរពប្រណិបត្តិធម៌វិន័យ និងរដ្ឋធម្មនុញ្ញជាច្បាប់កំពូលជាតិ ដើម្បីរក្សាសន្តិសុខ សណ្ដាប់ធ្នាប់សមិទ្ធផលសង្គមជាតិ។
គណៈសង្ឃទាំងពីរក៏បានហាមប្រាមមិនព្រះសង្ឃ សមណសិស្ស សមណនិស្សិត អាចារ្យ គណៈកម្មការវត្ត ដូនជី តាអាចារ្យ និងពលរដ្ឋទូទៅមិនត្រូវធ្វើការងារណាដែលប៉ះពាល់ដល់ធម៌វិន័យ និងច្បាប់រដ្ឋ ដូចជាសកម្មភាពគាំទ្របក្សនយោបាយ ការធ្វើបាតុកម្ម កូដកម្ម កុប្បកម្ម ការជួបជុំប្រមូលផ្តុំ ប្រជុំ ឬជារូបភាពអ្វីមួយដែលមិនមែនជាផ្លូវព្រះពុទ្ធសាសនា ឬផ្លូវជាតិ ដែលមិនបានទទួលការអនុញ្ញាតនោះឡើយ។
លើសពីនេះទៅទៀត គណៈសង្ឃរាជទាំងពីរជំរុញឲ្យអាជ្ញាធរមានសមត្ថកិច្ចគ្រប់ជាន់ថ្នាក់ត្រូវមានការទប់ស្កាត់រាល់ការខុសឆ្គងទាំងឡាយរបស់ព្រះសង្ឃដូចខាងលើ ដើម្បីរក្សាសេចក្ដីថ្លៃថ្នូរនៃព្រះពុទ្ធសាសនាដែលជាសាសនារបស់រដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។