មនុស្សជាង ២០០នាក់ ដែលភាគច្រើនក្នុងចំណោមពួកគេជាក្រុមនិស្សិត បានចូលរួមអបអរសាទរ ទិវាប្រយុទ្ធប្រឆាំងអំពើពុករលួយនៅក្នុងខេត្តបាត់ដំបង ចំណែកឯប្រជាពលរដ្ឋនិងក្រុមអាជ្ញាធរវិញ ដែលបានចូលរួមមានចំនួនតិចតួចបំផុត។
ពិធីនេះរៀបចំឡើងដោយសម្ព័ន្ធដើម្បីសុចរិតភាព និងគណនេយ្យភាពសង្គម ហៅកាត់ថា ស.ស.គ កាលពីល្ងាចថ្ងៃទី៩ ខែធ្នូ ឆ្នាំ២០១៣។
មន្ត្រីរបស់សម្ព័ន្ធដើម្បីសុចរិតភាពនិងគណនេយ្យភាពសង្គមបញ្ជាក់ថា នៅមុនថ្ងៃទិវាជាតិប្រយុទ្ធប្រឆាំងអំពើពុករលួយ ៩ ធ្នូ ចូលមកដល់ ក្រុមមន្ត្រីរបស់អង្គការបានដើរប្រាប់ឲ្យប្រជាពលរដ្ឋជាង ៦០០គ្រួសារ នៅតាមមូលដ្ឋានភូមិឃុំ ក្នុងខេត្តបាត់ដំបង ឲ្យចូលរួម ប៉ុន្តែជាក់ស្ដែងមានប្រជាពលរដ្ឋតែជាង ១០នាក់ប៉ុណ្ណោះដែលចូលរួម។ បញ្ហាពួកគេយល់ថា ការយល់ដឹង និងការរួមគ្នារបស់ប្រជាពលរដ្ឋដើម្បីប្រយុទ្ធប្រឆាំងនឹងអំពើពុករលួយនៅក្នុងសង្គមកម្ពុជា នៅមានកម្រិតនៅឡើយ។
មន្ត្រីកម្មវិធីយុវជននៃអង្គការតម្លាភាពកម្ពុជា និងជាអ្នកសម្របសម្រួលការប្រគំតន្ត្រីដើម្បីអបអរសាទរទិវាជាតិប្រយុទ្ធប្រឆាំងអំពើពុករលួយឆ្នាំ២០១៣ នៅខេត្តបាត់ដំបង លោក លី ពិជ័យ កត់សម្គាល់ថា ក្នុងការប្រារព្ធទិវានេះ ក្រុមអាជ្ញាធរបានផ្ដល់កិច្ចសហការល្អខុសពីមុន។
លោក លី ពិជ័យ៖ «ពីមុនមកភាគច្រើនយើងឃើញថា ឲ្យតែមានការប្រគំតន្ត្រីនិយាយអំពីការប្រឆាំងអំពើពុករលួយ ពួកគាត់មិនសូវមានការគាំទ្រ និងមានការចូលរួមទេ ប៉ុន្តែលើកនេះ ពួកគាត់បានផ្ដល់កិច្ចសហការជាមួយពួកយើង ទោះបីជាមានការលំបាកមួយចំនួនកើតឡើង»។
លោកបន្តថា ក្រុមយុវជនជានិស្សិតចូលរួមនៅក្នុងទិវាជាតិនេះច្រើន ក៏ព្រោះតែពួកគេចង់យល់ដឹង ពីវិធីក្នុងការទប់ស្កាត់អំពើពុករលួយ៖ «ទី១ គាត់ចង់ដឹងអំពីបញ្ហានៃអំពើពុករលួយ ក៏ដូចជាទិវានេះគេប្រារព្ធឡើងក្នុងគោលបំណងអ្វី? ហើយនៅពេលចាប់ផ្ដើមសាកសួរសំណួរមួយពីរ ពួកគាត់ជាអ្នករៀនសូត្រ ថាតើប្រទេសកម្ពុជា មានច្បាប់ប្រឆាំងអំពើពុករលួយ ច្បាប់នេះអនុម័តនៅពេលណា? គាត់អត់ដឹងតែម្ដង ប៉ុន្តែបន្ទាប់យើងជម្រាបជូនទៅគាត់បានដឹង»។
ទិវាជាតិប្រយុទ្ធប្រឆាំងអំពើពុករលួយ នៅថ្ងៃទី៩ ធ្នូ ឆ្នាំ២០១៣ នេះ ត្រូវបានប្រារព្ធឡើងជាលើកដំបូង ក្រោយពីប្រទេសកម្ពុជា បានបង្កើតឲ្យមានច្បាប់ប្រឆាំងអំពើពុករលួយកាលពីឆ្នាំ២០១០ កន្លងទៅ។
អនុប្រធានសម្ព័ន្ធដើម្បីសុចរិតភាពនិងគណនេយ្យភាពសង្គម លោក យង់ គឹមអេង ថ្លែងថា ទិវាជាតិប្រយុទ្ធប្រឆាំងអំពើពុករលួយនៅថ្ងៃទី៩ ធ្នូ ឆ្នាំ២០១៣ នេះ គឺជាការរំលឹកមួយដើម្បីប្រកាសទៅពិភពលោកថា ប្រជាពលរដ្ឋនៅក្នុងប្រទេសនីមួយៗ មិនត្រូវការអំពើពុករលួយទេ។ ទិវានេះ ក៏ជាសារមួយទាញអារម្មណ៍មន្ត្រី ក៏ដូចជារាជរដ្ឋាភិបាលត្រូវខិតខំប្រយុទ្ធប្រឆាំងអំពើពុករលួយ។
លោក យង់ គឹមអេង៖ «ព្រោះអំពើពុករលួយមិនត្រូវបានស្វាគមន៍ដោយប្រជាពលរដ្ឋនៅក្នុងសង្គមរបស់ខ្លួនឡើយ ដូច្នេះរដ្ឋាភិបាលត្រូវមានវិធានការទប់ស្កាត់ដើម្បីដាក់ទោសទណ្ឌទៅដល់មន្ត្រី ម្យ៉ាងវិញទៀត រដ្ឋាភិបាលត្រូវតែខិតខំប្រឹងប្រែងធ្វើយ៉ាងណាកសាងសង្គមមួយប្រកបទៅដោយតម្លាភាពនិងភាពស្អាតស្អំ»។
ទោះយ៉ាងណាក៏ដោយ លោក យង់ គឹមអេង កត់សម្គាល់ថា ក្នុងរយៈពេលកន្លងទៅនេះ រដ្ឋាភិបាលបានចាត់វិធានការទៅមន្ត្រីប្រព្រឹត្តអំពើពុករលួយខ្លះក៏ពិតមែន ប៉ុន្តែការចាត់វិធានការនោះគឺបានធ្វើឡើងចំពោះតែមន្ត្រីតូចតាចតែប៉ុណ្ណោះ។ លោកបន្តថា មូលហេតុនេះហើយបានជាប្រទេសកម្ពុជា ត្រូវអង្គការតម្លាភាពអន្តរជាតិវាយតម្លៃឲ្យមានលំដាប់ថ្នាក់ទាប ជាប្រទេសដែលមានអំពើពុករលួយខ្លាំងជាងគេក្នុងបណ្ដាលប្រទេសនៅក្នុងតំបន់អាស៊ាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។