សេចក្តីជូនដំណឹងរបស់អង្គភាពប្រឆាំងអំពើពុករលួយ ចេញផ្សាយនៅថ្ងៃទី២ ខែកញ្ញា បង្ហាញថា អង្គភាពនេះនឹងផ្តល់រង្វាន់ដល់បេក្ខជនជ័យលាភីជាទឹកប្រាក់មួយចំនួនលើវិញ្ញាសាចំនួន៤ មានដូចជា ការសម្ដែងរឿងខ្លីជាក្រុមលើប្រធានបទ "ទ្រព្យក្តៅក្រហាយ ឬទ្រព្យដែលបានមកពីពុករលួយ" ការច្រៀងអាយ៉ៃឆ្លើយឆ្លងលើប្រធានបទ "ខ្ញុំចូលរួមប្រឆាំងអំពើពុករលួយ ចុះអ្នកវិញ?" ការច្រៀងចាប៉ីលើប្រធានបទ "តួនាទី និងភារកិច្ចអង្គភាពប្រឆាំងអំពើពុករលួយ" និងការសរសេរអត្ថបទរឿងខ្លីលើប្រធានបទ "ការផ្តល់សេវាសាធារណៈល្អ គឺការចូលរួមចំណែកប្រឆាំងអំពើពុករលួយ"។
សេចក្តីជូនដំណឹង បន្តថា បេក្ខជនអាចរកពាក្យសុំចូលរួមបានដោយឥតគិតថ្លៃ នៅស្នាក់ការអង្គភាពប្រឆាំងអំពើពុករលួយរៀងរាល់ម៉ោងធ្វើការ ហើយអង្គភាពនេះនឹងឈប់ទទួលពាក្យសុំប្រឡងប្រជែងរហូតដល់ថ្ងៃទី៣០ ខែតុលា។ សាធារណជនដែលចង់ជ្រាបពីបញ្ហានេះ អាចទាក់ទងតាមទូរស័ព្ទលេខ ០៩២ ៦៦ ៩០ ៣៥ និង ០១៦ ៥៣ ៤៨ ០៦។
ការប្រឡងប្រណាំងសិល្បៈ និងអក្សរសាស្ត្រ លើប្រធានបទប្រឆាំងអំពើពុករលួយនេះ ជាផ្នែកមួយនៃយុទ្ធសាស្ត្របង្ការអំពើពុករលួយរបស់រាជរដ្ឋាភិបាល ស្របពេលដែលសង្គមស៊ីវិល រកឃើញថា អំពើពុករលួយនៅកម្ពុជា មានលក្ខណៈជាប្រព័ន្ធតាំងពីមន្ត្រីជាន់ខ្ពស់ រហូតដល់ពលរដ្ឋទូទៅ។ អង្គការតម្លាភាពអន្តរជាតិក្នុងឆ្នាំ២០១៣ រកឃើញថា កម្ពុជា ជាប្រទេសជាប់ចំណាត់ថ្នាក់ទី១៥៧ ក្នុងចំណោមប្រទេសទាំងជាង ១៧០ ដែលមានអំពើពុករលួយធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។