ការបញ្ជាក់ជាលាយលក្ខណ៍អក្សរនេះ គេទើបតែឃើញជាលើកដំបូងបន្ទាប់ពីគណបក្សប្រឆាំងបានលើកយកបញ្ហាបាត់បង់ចំណូលទេសចរណ៍ ធ្វើជាចំណុចឃោសនារកសំឡេងឆ្នោតនៅក្នុងទឹកដីតំបន់ទេសចរណ៍មួយនេះ។
មន្ត្រីអាជ្ញាធរអប្សរាទទួលបន្ទុកការពារ និងថែរក្សាប្រាសាទបុរាណក្នុងខេត្តសៀមរាប បានប្រតិកម្មថា គណបក្សសង្គ្រោះជាតិ បានបំប៉ោងតួលេខចំណូលជាតិដែលបានពីវិស័យទេសចរណ៍ខុសពីការពិតទាំងស្រុង។
ប្រតិកម្មនេះ បានធ្វើឡើងបន្ទាប់ពីមន្ត្រីជាន់ខ្ពស់នៃគណបក្សសង្គ្រោះជាតិ បានអះអាងថា ចំណូលទេសចរណ៍កាលពីឆ្នាំ២០១២ កន្លងទៅ បើគណនាតាមចំនួនភ្ញៀវ គឺប្រហែល ២០០លានដុល្លារអាមេរិក ក៏ប៉ុន្តែ ភាពពិត ចំណូលនោះបានបាត់បង់ជាច្រើន។
មន្ត្រីនាយកដ្ឋានផ្សព្វផ្សាយរបស់អាជ្ញាធរអប្សរា គឺលោក អ៊ឹម សុរិទ្ធី។ លោកបានមានប្រសាសន៍កាលពីរសៀលថ្ងៃសៅរ៍ ទី១៣ ខែកក្កដា ថា តាមជំរឿនរបស់ក្រសួងទេសចរណ៍ បានឱ្យដឹងថា កាលពីឆ្នាំ២០១២ កន្លងទៅ ចំនួនភ្ញៀវទេសចរបរទេសដែលមកទស្សនាកម្ពុជា គឺសរុបប្រមាណជាង ៣លាន ៥សែននាក់ ក៏ប៉ុន្តែ ចំនួននេះមិនមែនចូលមកទស្សនាខេត្តសៀមរាប ទាំងអស់ទេ។ ចំនួនអ្នកទេសចរដែលបានមកទស្សនាខេត្តសៀមរាប កាលពីឆ្នាំ២០១២ គឺមានជាង ២លាន ៦ម៉ឺននាក់ ហើយចំនួននេះក៏មិនបានទិញសំបុត្រចូលទស្សនាអង្គរទាំងអស់ដែរ។
លោក អ៊ឹម សុរិទ្ធី បានបញ្ជាក់ថា គណបក្សសង្គ្រោះជាតិ ដែលគណនាតួលេខចំណូលទេសចរណ៍ប្រមាណ ២០០លានដុល្លារនោះ គឺខុសពីការពិត៖ «យើងឱ្យមហាជនទាំងអស់ជួយពិចារណាមើល សូម្បីបើសិនជាចំនួនភ្ញៀវជាង ៣លាននាក់មែន យើងយក ៣លានហ្នឹង គុណនឹង ៤០ដុល្លារ ក៏មិនដូចការដែលលើកឡើងថា ២០០លានដុល្លារដែរ។ ខ្ញុំសុំឱ្យបងប្អូនមហាជនទូទៅពិចារណាលើតួលេខហ្នឹង។ យើងផ្ញើតួលេខចេញទៅឱ្យមហាជនគិតមើលខ្លួនឯងទៅ ឃើញច្បាស់ហើយ»។
កាលពីថ្ងៃទី១១ ខែកក្កដា កន្លងទៅ អាជ្ញាធរអប្សរាបានបញ្ជាក់ជាលាយលក្ខណ៍អក្សរថា ក្នុងចំណោមភ្ញៀវទេសចរបរទេសជាង ២លាន ៦ម៉ឺននាក់ ដែលមកទស្សនាអង្គរកាលពីឆ្នាំ២០១២ កន្លងទៅ គឺមានភ្ញៀវតែជាង ១លាន ៨សែននាក់ប៉ុណ្ណោះ ដែលបានទិញសំបុត្រចូលទស្សនាអង្គរ។ ក្រៅពីនោះ ជាភ្ញៀវរបស់រដ្ឋាភិបាល ក្រុមអ្នកស្រាវជ្រាវរបស់គម្រោងអន្តរជាតិ ដើម្បីជួសជុល និងអភិរក្សអង្គរ អាណិកជនមានសញ្ជាតិដើមជាខ្មែរ និងកុមារអាយុក្រោម ១២ឆ្នាំជាដើម។ អ្នកទាំងនោះបានចូលទៅទស្សនាអង្គរដោយមិនទិញសំបុត្រ ដូច្នេះ តើគណបក្សសង្គ្រោះជាតិ បានតួលេខពីណាយកទៅគណនាចំណូលទេសចរណ៍រហូតដល់ ២០០លានដុល្លារ?
ទោះយ៉ាងណា មន្ត្រីគណបក្សសង្គ្រោះជាតិ នៅតែអះអាងថា ការគណនារបស់គេ គឺផ្អែកទៅលើជំនាញ និងបច្ចេកទេសយ៉ាងត្រឹមត្រូវ។
លោក កឹម សុខា អនុប្រធានគណបក្សសង្គ្រោះជាតិ បានមានប្រសាសន៍ថា អ្នកជំនាញការ និងអ្នកបច្ចេកទេសរបស់គណបក្សសង្គ្រោះជាតិ បានស្រាវជ្រាវរកឃើញថា ចំណូលដែលបានពីទេសចរណ៍ចូលទៅទស្សនាអង្គរវត្ត កាលពីឆ្នាំ២០១២ កន្លងទៅប្រមាណជាង ២០០លានដុល្លារយ៉ាងពិតប្រាកដ ក៏ប៉ុន្តែ រដ្ឋាភិបាលបែរជាអះអាងថា ប្រាក់ចំណូលនោះបានប្រហែលជាង ៣០លានដុល្លារទៅវិញ៖ «ចង់បានភស្តុតាងចាំប្រជាពលរដ្ឋបោះឆ្នោតឱ្យយើងឈ្នះឆ្នោតឆ្នាំ២០១៣ នេះ អាណត្តិទី៥ យើងដឹកនាំរដ្ឋាភិបាល គឺយើងនឹងរកចំណូលទេសចរណ៍ឱ្យបានដូចអ្វីដែលយើងបានថាអីចឹងមែន»។
មន្ត្រីគណបក្សសង្គ្រោះជាតិ បានព្រមានថា បើសិនជាគណបក្សនេះឈ្នះឆ្នោតដឹកនាំរដ្ឋាភិបាល បើទោះបីជារដ្ឋមិនយកតំបន់ទេសចរណ៍អង្គរមកកាន់កាប់ក៏ដោយ ក៏រដ្ឋាភិបាលនឹងធ្វើការដេញថ្លៃទៅឱ្យក្រុមហ៊ុនឯកជនដោយតម្លាភាព។ លោក កឹម សុខា បានអះអាងថា ប្រសិនបើគណបក្សសង្គ្រោះជាតិ បានដឹកនាំរដ្ឋាភិបាល គឺនឹងទប់ស្កាត់អំពើពុករលួយ ហើយអាចនឹងបង្កើនប្រាក់ចំណូលជាតិបាន ១ពាន់លានដុល្លារថែមទៀតលើសពីរដ្ឋាភិបាលបច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។