ក្រុមអ្នកធ្វើការងារទាក់ទងសុវត្ថិភាពចរាចរណ៍ ផ្ដល់ឱកាសឲ្យអ្នកកាសែតយកអត្ថបទរបស់ខ្លួនស្ដីពីការជំរុញការពាក់មួកសុវត្ថិភាព ដែលចេញផ្សាយចាប់ពីថ្ងៃទី៤ ខែឧសភា រហូតដល់ខែកក្កដា ឆ្នាំ២០១៦ ចូលរួមប្រកួតប្រជែងជាផ្លូវការ។
កម្មវិធីប្រឡងប្រណាំងនេះមានគោលបំណងទទួលស្គាល់ការប្ដេជ្ញាចិត្តខ្ពស់របស់អ្នកសារព័ត៌មានក្នុងការលើកកម្ពស់សុវត្ថិភាពចរាចរណ៍ ទាក់ទងនឹងការមិនពាក់មួកសុវត្ថិភាពតាមរយៈអត្ថបទរបស់ខ្លួន។
នាយកអង្គការមូលនិធិបង្ការរបួសអាស៊ីប្រចាំកម្ពុជា លោក គឹម បញ្ញា យល់ថា អ្នកសារព័ត៌មានមានតួនាទីសំខាន់ក្នុងការផ្សាយព័ត៌មានជូនសាធារណជន និងថ្នាក់ដឹកនាំអនុវត្តគោលនយោបាយតាមរយៈអត្ថបទរបស់ខ្លួន៖ «យើងឃើញអ្នកសារព័ត៌មានដើរតួនាទីសំខាន់ណាស់ សំឡេងរបស់គាត់ អត្ថបទរបស់គាត់ អាចបានឃើញ ឬបានឮដល់សាធារណជនរាប់ម៉ឺននាក់។ នេះជាផ្នែកមួយដើម្បីចូលរួមកាត់បន្ថយគ្រោះថ្នាក់ចរាចរណ៍»។
អត្ថបទរបស់អ្នកប្រកួតប្រជែងនឹងត្រូវឆ្លងកាត់ការវាយតម្លៃចំនួនពីរដំណាក់កាល ដោយក្រុមអ្នកជំនាញសារព័ត៌មាន និងអ្នកពាក់ព័ន្ធ។ អ្នកកាសែត ៧រូប នឹងក្លាយជាជយលាភី។
ប្រធានកម្មវិធីលើកកម្ពស់បរិយាកាសអំណោយផលនៃអង្គការមូលនិធិបង្ការរបួសអាស៊ីប្រចាំកម្ពុជា អ្នកស្រី ម៉ែន វណ្ណាវី បញ្ជាក់បន្ថែមថា អត្ថបទដែលដាក់ប្រកួតប្រជែង ត្រូវតែជាអត្ថបទប្រកបដោយវិជ្ជាជីវៈ គ្មានការលួចចម្លង មិនបំផ្លើសសម្ដីប្រភព និងជាអត្ថបទទាន់សភាពការណ៍ ទាំងទិន្នន័យ រូបភាព និងសំឡេង។
ឧត្ដមសេនីយ៍ទោ ទី ឡុង អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិ ក្រសួងមហាផ្ទៃ គាំទ្រសកម្មភាពអ្នកសារព័ត៌មានដែលជំរុញឲ្យពលរដ្ឋគោរពច្បាប់ចរាចរណ៍៖ «សារព័ត៌មានដែលជាអំណាចទី៤នេះជួយជំរុញបន្ថែមដល់ប្រជាពលរដ្ឋ យល់ថា ការពាក់មួកសុវត្ថិភាព»។
អ្នកចូលរួមអាចទាក់ទងដាក់ពាក្យ និងអត្ថបទប្រកួតរបស់ខ្លួនជូនអង្គការមូលនិធិបង្ការរបួសអាស៊ីប្រចាំកម្ពុជា តាមរយៈទូរស័ព្ទលេខ ០១៧ ៩៩០ ៨៨២ ឬសារអេឡិចត្រូនិក vannavy.men@aipf-cambodia.org។
លទ្ធផលនៃការប្រកួតប្រជែងនឹងប្រកាសនៅចន្លោះខែកក្កដា-សីហា ឆ្នាំ២០១៦ ហើយរង្វាន់មានពាន វិញ្ញាបនបត្រចូលរួម ដំណើរទស្សនកិច្ចក្រៅប្រទេស និងថវិកាពី ៥០ម៉ឺនរៀល ដល់ ២,៦លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។