សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (C-CAWDU) ដែលមានលោក អាត់ ធន់ ជាប្រធានបានដឹកនាំធ្វើមហាសន្និបាត នៅភោជនីយដ្ឋានណាំទ្រា សង្កាត់ផ្សារដើមថ្កូវ។ ការចូលរួមសន្និបាតនេះ ដែលមានសហជីពមកពីបណ្ដារោងចក្រនៅរាជធានីភ្នំពេញ និងរោងចក្រមកពីបណ្ដាខេត្តមួយចំនួនបានចូលរួមប្រមាណជា ៣០០នាក់។
ការចូលរួមនេះ ត្រូវបានប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ បានលើកឡើងពីគោលបំណងសំខាន់ៗថា៖ «ចង់បង្ហាញរបាយការណ៍សមិទ្ធផលកន្លងមក ដែលខ្ញុំបានលើកឡើងអម្បាញ់មិញ ហើយទីពីរ គឺផែនការយុទ្ធសាស្ត្រសម្រាប់ ៤ឆ្នាំទៀត និងទី៣ ជ្រើសរើសថ្នាក់ដឹកនាំថ្មី ដើម្បីសម្រេចនៅក្នុងគោលបំណងហ្នឹង។ នៅក្នុងនេះក្នុងមហាសន្និបាត គឺគោលបំណងសំខាន់អ៊ីចឹង ហើយវាស្របទៅតាមធម្មនុញ្ញដែលយើងបានចែង»។
អ្វីដែលសំខាន់នៅក្នុងមហាសន្និបាតនេះ គឺទាក់ទងនៅនឹងការបោះឆ្នោតជ្រើសរើសសមាសភាពថ្មី ដើម្បីធ្វើការដឹកនាំសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា តទៅទៀត។
មានសហជីពមកពីរោងចក្រមួយចំនួនដែលបានចូលរួមក្នុងសន្និបាតនោះ បានសម្ដែងនូវចំណាប់អារម្មណ៍ផ្សេងៗគ្នា។
ប្រធានសហជីពមកពីរោងចក្រសាប្រ៊ីណា (Sabrina) លោក ឈា វិនុត បានបង្ហាញពីអារម្មណ៍រីករាយចំពោះដំណើរការបោះឆ្នោតជ្រើសរើសមេដឹកនាំ ស៊ីខាវឌូ ថ្មី ពីព្រោះវាជាឱកាសល្អសម្រាប់ការពង្រឹងកេរ្តិ៍ឈ្មោះរបស់ ស៊ីខាវឌូ ឱ្យកាន់តែប្រសើរ។
លោកបានបន្តទៀតថា ក្នុងនាមជាសហជីពថ្នាក់មូលដ្ឋាន លោកគ្រាន់តែចង់បានមេដឹកនាំសហព័ន្ធមួយដែលស្រលាញ់កម្មករ បម្រើកម្មករ និងមិនយកកម្មករធ្វើជាឈ្នាន់ដើម្បីលាភសក្ការៈឡើយ៖ «គូសសន្លឹកឆ្នោតថ្ងៃនេះ គឺខ្ញុំគ្រាន់តែចង់បានថ្នាក់ដឹកនាំសហព័ន្ធមួយដែលគាត់ចេះស្រលាញ់កម្មករ បម្រើកម្មករ មិនក្បត់កម្មករ ហើយមិនយកកម្មករជាឈ្នាន់ដើម្បីជាប្រយោជន៍ដល់ពួកគាត់។ អាហ្នឹងហើយជាអ្វីដែលយើងចង់បានខ្លាំងជាងគេបំផុត»។
ប្រតិភូបុគ្គលិកមកពីរោងចក្រ ហ្រ្គេត អរន័រ (Great Honor) អ្នកស្រី ហង្ស ស្រីលក្ខណ៍ ក៏បានបង្ហាញថា អ្នកស្រីត្រូវការជ្រើសរើសមេដឹកនាំ ស៊ីខាវឌូ ថ្មីដែលចេះយល់ចិត្តកម្មករនិងមានទំនួលខុសត្រូវក្នុងការងារ។
អ្នកស្រី ហង្ស ស្រីលក្ខណ៍៖ «ក្នុងការបោះឆ្នោតនេះ ខ្ញុំត្រូវជ្រើសរើសតំណាងបន្តអាណត្តិទៅបួនឆ្នាំទៀតនេះ ខ្ញុំត្រូវការជ្រើសរើសយកគាត់ដែលខ្ញុំអាចទុកចិត្តគាត់ ក្នុងការដែលគាត់ធ្វើការហ្នឹង គឺថាមានការមោះមុតមកលើពួកខ្ញុំ និងភាពទទួលខុសត្រូវ បែងចែកច្បាស់លាស់»។
ដោយសារតែការជ្រើសរើសអ្នកដឹកនាំសម្ព័ន្ធសហជីព ស៊ីខាវឌូ នេះជារឿងយ៉ាងសំខាន់សម្រាប់សហជីពតាមរោងចក្រមួយចំនួន។ ស្រដៀងគ្នា អនុប្រធានសហជីពនៃរោងចក្រ ញ៉ូវ អូរេណថ៍ (New Orien) នៅតំបន់កាណាឌីយ៉ា លោក ស្រស់ វុទ្ធី បានបង្ហើបឱ្យដឹងថា ការមកចូលរួមជ្រើសរើសមេដឹកនាំសហព័ន្ធ ស៊ីខាវឌូ ថ្មី គឺជាឱកាសដែលគាត់អាចទាមទារនូវកង្វះខាតរបស់កម្មករនៅពេលកន្លងមក តាមរយៈមេដឹកនាំ ស៊ីខាវឌូ ថ្មី។ មិនតែប៉ុណ្ណោះ អ្វីលោករំពឹងសម្រាប់មេដឹកនាំសហព័ន្ធ ស៊ីខាវឌូ ថ្មីនោះ គឺសូមឱ្យមានការសហការល្អជាមួយសហជីពតាមមូលដ្ឋានដើម្បីដោះស្រាយបញ្ហារបស់កម្មករ។
លោក ស្រស់ វុទ្ធី៖ «ការងារបន្តជាមួយថ្នាក់ដឹកនាំសហព័ន្ធសហជីព និងសហជីព សមាជិកតាមមូលដ្ឋានហ្នឹង ដើម្បីដោះស្រាយវិវាទការងារមួយចំនួនធំ ជាពិសេសយុទ្ធនាការនៃការប្រាក់ឈ្នួល ពីព្រោះប្រាក់ឈ្នួលយើងសព្វថ្ងៃមិនទាន់បានសមរម្យទេ»។
ប្រធានសហជីពនៃរោងចក្រ ជូ ស៊ីង សង្កាត់ព្រែកលៀប អ្នកស្រី ស្រ៊ុន សុភី បានបញ្ជាក់ថា ការបោះឆ្នោតនេះប្រកបដោយភាពសុក្រឹត និងយុត្តិធម៌។ ដោយឡែកអ្នកស្រីសង្ឃឹមថា មេដឹកនាំថ្មីអាណត្តិទី៦នេះ នឹងជួយដោះស្រាយលក្ខខណ្ឌការងាររបស់កម្មករឱ្យបានប្រសើរ ពិសេសបញ្ហាប្រាក់បៀវត្ស។
មហាសន្និបាតពេញមួយព្រឹកធំ បានសម្រេចជ្រើសរើសមេដឹកនាំសម្ព័ន្ធ ស៊ីខាវឌូ ថ្មីចំនួន ៣រូប ក្នុងចំណោមបេក្ខជន ៨រូប ដែលបានឈរឈ្មោះ។ លោក អាត់ ធន់ ដែលជាប្រធានដឹកនាំ ស៊ីខាវឌូ អាណត្តិចាស់ នៅតែរក្សាតំណែងជាប្រធានសហព័ន្ធ ស៊ីខាវឌូ ដដែល ដោយទទួលបានសំឡេង ១៩៤។ ចំណែកលោក គង់ អាទិត្យ ត្រូវបានជាប់ជាអនុប្រធានសហព័ន្ធ ស៊ីខាវឌូ ដោយទទួលបានសំឡេង ១៨៧ និងចុងក្រោយលោក ឯក សុភក្តី ត្រូវបានជាប់ជាអគ្គលេខា ស៊ីខាវឌូ ដោយទទួលបានសំឡេង ១៥៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។