លេខាទី២នៃស្ថានទូតប្រទេសអូស្ត្រាលី ប្រចាំកម្ពុជា ឈ្មោះ បែនចាមីន នីកូល (Benjamin Nichols) បានសរសេរតាមអ៊ីមែល (E-mail) ថា រដ្ឋាភិបាលអូស្ត្រាលី មានការព្រួយបារម្ភចំពោះការបាត់បង់ជីវិត និងរងរបួសក្នុងកំឡុងពេលបាតុកម្មកន្លងមក។ លោកបន្តថា រដ្ឋាភិបាលអូស្ត្រាលី ជំរុញភាគីពាក់ព័ន្ធទាំងអស់ឲ្យមានភាពអត់ធ្មត់ និងជំរុញឲ្យមានការដោះស្រាយបញ្ហាតាមរយៈការពិភាក្សាដោយចំហ។
ដោយឡែក ស្ថានទូតប្រទេសឥណ្ឌា ប្រចាំនៅកម្ពុជា នៅថ្ងៃទី១០ មករា បានបដិសេធមិនធ្វើអត្ថាធិប្បាយចំពោះព្រឹត្តិការណ៍ហិង្សានេះទេ។ លេខាទី១នៃស្ថានទូតប្រទេសឥណ្ឌា ប្រចាំកម្ពុជា ឈ្មោះ រ៉ាចាមូរូហ្កាន (Rajamurugan) បានសរសេរសារតាមអ៊ីមែលថា រដ្ឋាភិបាលឥណ្ឌា ពុំមានគោលនយោបាយផ្តល់អត្ថាធិប្បាយលើកិច្ចការផ្ទៃក្នុងរបស់រដ្ឋអធិបតេយ្យណាមួយនោះទេ។
បន្ទាប់ពីមានព្រឹត្តិការណ៍បង្ក្រាបដោយហិង្សារបស់កងកម្លាំងអាជ្ញាធររដ្ឋាភិបាលលើកម្មករតវ៉ា កាលពីថ្ងៃទី២ និងទី៣ ខែមករា ឆ្នាំ២០១៤ ដែលបានបណ្ដាលឲ្យមនុស្សយ៉ាងតិច ៤នាក់បាត់បង់ជីវិត និងច្រើននាក់ផ្សេងទៀតរងរបួស និងចាប់ខ្លួន រដ្ឋាភិបាលបរទេសមួយចំនួន រួមមាន ជប៉ុន អាល្លឺម៉ង់ សហភាពអឺរ៉ុប និងសហរដ្ឋអាមេរិក បានសម្ដែងក្ដីព្រួយបារម្ភចំពោះអំពើហិង្សានោះ និងអំពាវនាវឱ្យគ្រប់ភាគី និងគណបក្សនយោបាយក្នុងប្រទេសកម្ពុជា ជួបចរចាដោះស្រាយបញ្ហាដោយសន្តិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។